ନୂଆଦିଲ୍ଲୀ,୨୦/୦୫: ଭାରତ ଏବେ ବିଶ୍ୱର ୫ମ ବୃହତ ଅର୍ଥ ବ୍ୟବସ୍ଥା । ୨୦୨୭ ସୁଦ୍ଧା ଦେଶ ଶୀର୍ଷ ୩ ଅର୍ଥନୀତି ହେବାର ସାମର୍ଥ୍ୟ ରଖୁଛି ବୋଲି ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍) କହିଛି । ମାତ୍ର ଭାରତର ଦ୍ରୁତ ଅଭିବୃଦ୍ଧି ପାଇଁ ଗରମ ଚିନ୍ତାଜନକ ହୋଇପାରେ । ଉତ୍ତାପ ବୃଦ୍ଧିର ପ୍ରଭାବ ଦେଶର ଅଭିବୃଦ୍ଧି ଉପରେ ପଡୁଛି । ୨୦୩୦ ସୁଦ୍ଧା ଏଭଳି କାରଣ ଯୋଗୁ ଜିଡିପି ୨.୫%ରୁ ୪.୫% କ୍ଷତି ହୋଇ ପାରେ ବୋଲି ମ୍ୟାକେଞ୍ଜିଂର ଏକ ରିପୋର୍ଟରେ ଆଶଙ୍କା କରାଯାଇଛି ।
ଉତ୍ତାପ ବୃଦ୍ଧି ଯୋଗୁ କୃଷି, ଖନନ, ନିର୍ମାଣ,ପରିବହନ ଭଳି କ୍ଷେତ୍ର ଗୁଡିକ ବିଶେଷ ଭାବେ କ୍ଷତି ସହିବେ ବୋଲି କୁହାଯାଇଛି । ଏଭଳି ସମସ୍ୟା ଯୋଗୁ ଜିଡିପିର ୨୫୦ବିଲିୟନ ଡଲାର ଯାଏ କ୍ଷତିଗ୍ରସ୍ତ ହୋଇପାରେ । ଆର୍ଥିକ ଦୃଷ୍ଟିକୋଣରୁ ଏହା ଭାରତ ପାଇଁ ଭଲ ଖବର ନୁହେଁ । ଭୀଷଣ ଗରମ ଯୋଗୁ ଦେଶର ଶ୍ରମ ଶକ୍ତି ଉପରେ ବଡ ପ୍ରଭାବ ଦେଖାଯିବ ବୋଲି ବଜାର ବିଶେଷଜ୍ଞ କହିଛନ୍ତି ।
ଏକ ରିପୋର୍ଟ ମୁତାବକ, ଦେଶର ମାତ୍ର ୧୦% ଲୋକଙ୍କ ଘରେ ଏସି ରହିଛି । ଜଳବାୟୁ ପରିବର୍ତ୍ତନ ଯୋଗୁ ଦକ୍ଷିଣ ଏସିଆରେ ୩୦ ଦିନର ଗ୍ରୀଷ୍ଣ ୪୫ ଗୁଣା ଗରମ ବୃଦ୍ଧି କରିଛି । ଏହାର ପ୍ରଭାବ ଫସଲ ଉପରେ ମଧ୍ୟ ପଡିଛି । ବିଭିନ୍ନ ଶସ୍ୟ ଉତ୍ପାଦନ କ୍ଷତିଗ୍ରସ୍ତ ହେଉଛି । କେବଳ ଘରୋଇ ବଜାର ନୁହେଁ ଉତ୍ତାପ ବୃଦ୍ଧି ସାରା ବିଶ୍ୱର ଅର୍ଥନୀତି ଗୁଡିକ ଲାଗି ଚିନ୍ତାର କାରଣ ପାଲଟିଲାଣି ।
ତେବେ ବିଭିନ୍ନ କାରଣ ଯୋଗୁ ଭାରତ ବଜାର ଉପରେ ଏହାର ପ୍ରଭାବ ମଧ୍ୟ ଚିନ୍ତା ବଢ଼ାଇଛି । ମ୍ୟାକେଞ୍ଜିଂ ଗ୍ଲୋବାଲ ଇନଷ୍ଟିଚ୍ୟୁଟର ପାର୍ଟନର ମେକଲା କୃଷ୍ଣନ କହିଛନ୍ତି, ଘରୋଇ ବଜାର ଏହି ଦିଗ ପ୍ରତି ଏତେଟା ଯତ୍ନବାନ ନୁହେଁ । ଏଥି ଯୋଗୁ ଲୋକଙ୍କ ଜୀବନ ଏବଂ ଅର୍ଥନୀତି ଉଭୟ କ୍ଷତିଗ୍ରସ୍ତ ହେଉଛି । ଏହି ଦିଗ ପ୍ରତି ଧ୍ୟାନ ଦେବାର ଆବଶ୍ୟକତା ରହିଛି । ଅତ୍ୟଧିକ ଗରମ ମାନବ ଜୀବନ ଏବଂ ଅର୍ଥନୀତି ଉପରେ କିଭଳି କ୍ଷତିପହଞ୍ଚାଉଛି ସେ ସମ୍ପର୍କିତ ୨୦୨୦ରେ ଆସିଥିବା ଏକ ପୁସ୍ତକର ସହ ରଚୟିତା ହେଉଛନ୍ତି କୃଷ୍ଣନ ।
ଗରମ ଲଗାତର ବଢ଼ୁଥିବାରୁ ଲୋକଙ୍କୁ କାମ କରିବାରେ ସମସ୍ୟା ହେବ । ଫଳରେ ନିର୍ମାଣ ସମ୍ପର୍କିତ କାର୍ଯ୍ୟକୁ ସକାଳ କିମ୍ବା ସଂଧ୍ୟାରେ କରିବାକୁ ପଡିବ । ଲୋକଙ୍କ ମଧ୍ୟରେ ହିଟ୍ ଷ୍ଟ୍ରୋକ ମାମଲା ବଢ଼ିବ । ଏହାବାଦ କୃଷି କ୍ଷେତ୍ରରେ ଫସଲ ନଷ୍ଟ ମଧ୍ୟ ହେବ । ଭାରତୀୟ ଅର୍ଥବ୍ୟବସ୍ଥା ବିଶେଷ କରି ଶ୍ରମ କୈନ୍ଦ୍ରିକ । ବିଭିନ୍ନ କାର୍ଯ୍ୟ ଘର ବାହାରେ ହୋଇଥାଏ । ଗରମ ବଢ଼ିବା ଯୋଗୁ ଘରୋଇ ବଜାର ପାଇଁ ଏହା ବଡ ଆହ୍ୱାନ ପାଲଟିବ ବୋଲି କହିଛନ୍ତି ବଜାର ବିଶେଷଜ୍ଞ ।
ଏବେ ଦେଶର୧୦% ଘରେ ଏସି ରହିଛି ।୨୦୩୭ ବେଳକୁ ଏହା ୪୦% ଯାଏ ବଢ଼ିପାରେ । ଏଭଳି ଗ୍ରୀଷ୍ଣ ପ୍ରବାହ ସମୟରେ ଲୋକଙ୍କ ପାଇଁ ଶୀତଳ ଗୃହ ସ୍ଥାପନ କରିବାକୁ ପଡିପାରେ । ଗରମରୁ ମୁକ୍ତି ପାଇଁ ଦେଶକୁ କିଛି ସ୍ୱତନ୍ତ୍ର କାର୍ଯ୍ୟ କରିବାକୁ ହେବ ।
ଗାନ୍ଧୀ ନଗର ସ୍ଥିତ ଭାରତୀୟ ଜନ ସ୍ୱାସ୍ଥ୍ୟ ସଂସ୍ଥାନର ପ୍ରଫେସର ଡ.ଦିଲ୍ଲୀପ ମାମ୍ବଲକର କହିଛନ୍ତି, ହିଟ୍ ଷ୍ଟ୍ରୋକ ୨ ପ୍ରକାର ହୋଇଥାଏ । ଦୀର୍ଘ ସମୟ ଯାଏ ଖରାରେ ରହିବା କିମ୍ବା କାମ କରିବା ଓ ଦ୍ୱିତୀୟ ବର୍ଗ ହେଉଛି ବୟୋଜ୍ୟେଷ୍ଠଙ୍କ ସମସ୍ୟା ।
ବୟୋଜ୍ୟେଷ୍ଠଙ୍କ କ୍ଷେତ୍ରରେ ୮୦% ରୁ ୯୦% ସମସ୍ୟା ରହୁଛି । ଗରମ ଆତ୍ମଘାତୀ ହୋଇପାରେ । ଭାରତରେ ଗରମ ଏକ ସାଧାରଣ କଥା ବୋଲି ଲୋକମାନେ ବିଚାର କରନ୍ତି । ଗରମ ଜନୀତ ଷ୍ଟ୍ରୋକ ଯୋଗୁ ଜୀବନ ଚାଲି ଯାଉଥିବା କଥାକୁ ଏଡାଇ ହେବନି । ଦେଶର କେରଳ ସମେତ ଅନ୍ୟ ରାଜ୍ୟ ଗରମ ଯୋଗୁ ଫସଲ ନଷ୍ଟ ଭଳି ସମସ୍ୟା ସାମ୍ନା କରୁଛନ୍ତି ।
୪୬ ହଜାର ହେକ୍ଟର ଜମି ଏହା ଦ୍ୱାରା କ୍ଷତିଗ୍ରସ୍ତ ହୋଇଛି ବୋଲି କେରଳ ରାଜ୍ୟ ସରକାର କହିଛନ୍ତି । ଗରମ ଯୋଗୁ ପନିପରିବା ସହ ଅନ୍ୟ କିଛି ବର୍ଗର ଶସ୍ୟ ନଷ୍ଟ ହେଉଛି । ଦୁଗ୍ଧ ଉତ୍ପାଦନ କ୍ଷେତ୍ର ମଧ୍ୟ ଏହା ଦ୍ୱାରା କ୍ଷତିଗ୍ରସ୍ତ ହେଉଛି ବୋଲି ବିଶେଷଜ୍ଞ କହିଛନ୍ତି ।