ଓ୍ବାଶିଂଟନ୍,୯।୩: ସାଂସଦ, ବିଧାୟକ ଓ ମେୟର ଭଳି ପଦ ପାଇଁ ମଣିଷମାନଙ୍କ ଭିତରେ ହିଁ ନିର୍ବାଚନ ହୁଏ ଏହା ଆମେ ସମସ୍ତେ ଜାଣିଛୁ। କିନ୍ତୁ ଆମେରିକାର ଏକ ସ୍ଥାନରେ ମେୟର ପାଇଁ ପଶୁଙ୍କ ଭିତରେ ପ୍ରତିଯୋଗିତା ହୋଇଛି। ଏହି ପ୍ରତିଯୋଗିତାରେ ଲିଙ୍କନ ନାମକ ଏକ ଛେଳି ବାଜି ମାତ୍ କରିଛି। ଆମେରିକାର ଭରମୋଣ୍ଟରେ ଫେୟାର ହେଭେନ ନାମକ ସହରରେ ଚଳିତ ସପ୍ତାହ ଏହି ଛେଳିକୁ ମେୟର ଭାବରେ ଚୟନ କରାଯାଇଛି। ଲିଙ୍କନ ନିଜର ନିକଟତମ ପ୍ରତିଯୋଗୀ ସେମି ନାମକ ଏକ କୁକୁରକୁ ହରାଇଛି।
ଗତ ମଙ୍ଗଳବାର ସମ୍ପନ୍ନ ହୋଇଥିବା ନିର୍ବାଚନରେ ଲିଙ୍କନ ନାମକ ଏହି ଛେଳି ଅନ୍ୟ ୧୬ଟି ପଶୁଙ୍କୁ ହରାଇବାରେ ସମର୍ଥ ହୋଇଛି। ପ୍ରାୟ ୨,୫୦୦ ଜନସଂଖ୍ୟା ବିଶିଷ୍ଟ ଫେୟାର ହେଭେନ ସହରରେ ସରକାରୀ ଭାବରେ କେହି ମେୟର ନଥିଲେ। ଜୋଶେଫ୍ ଗୁନଟୁର ନାମକ ଜଣେ ବ୍ୟକ୍ତି ସେଠାରେ ବେସରକାରୀ ଭାବରେ ମେୟର ଭଳି ସବୁ କାର୍ଯ୍ୟର ପରିଚାଳନା କରୁଥିଲେ। ଗୁନଟୁର ଯେତେବେଳେ ଏକ ଖବର କାଗଜରେ ପଢିଥିଲେ ମିଚିଗାନର ଓମେନା ଗାଁରେ ଏକ ବିଲେଇକୁ ନିଜର ଶୀର୍ଷ ଅଧିକାରୀ ଭାବରେ ଚୟନ କରାଯାଇଛି। ସେତେବେଳେ ତାଙ୍କୁ ଖେଳ ପଡିବା ପାଇଁ ଚାନ୍ଦା ଏକାଠି କରିବାକୁ ଏହି ନିର୍ବାଚନ ଆୟୋଜନ କରିବାର ବିଚାର ଆସିଥିଲା। ଖେଳ ପଡିଆ ପାଇଁ ଚାନ୍ଦା ଏକାଠି କରିବାର ଚେଷ୍ଟାରେ ଗୁନଟୁର କେବଳ ୧୦୦ ଡଲାର ଏକାଠି କରିପାରିଛନ୍ତି। କିନ୍ତୁ ଗୁନଟୁର ଏଥିରେ ନିରାଶ ହୋଇନାହାଁନ୍ତି।