ଜାଣନ୍ତୁ ହାର୍ଦ୍ଦିକଙ୍କୁ କାହିଁକି ଚାପୁଡା ମାରିଲେ ଏହି ବ୍ୟକ୍ତି,କହିଲେ ଗର୍ଭବତୀ ସ୍ତ୍ରୀ…

ଅହମ୍ମଦାବାଦ,୧୯।୪: କଂଗ୍ରେସ ନେତା ହାର୍ଦ୍ଦିକ ପଟେଲ ଗୁଜରାଟର ସୁରେନ୍ଦ୍ରନଗରରେ ଆଜି ଏକ ରାଲିରେ ଭାଷଣ ଦେବା ପରେ ଜଣେ ବ୍ୟକ୍ତି ମଞ୍ଚ ଉପରକୁ ଆସି ତାଙ୍କୁ ଦେଇଥିଲେ ଶକ୍ତ ଚାପୁଡା। ଏହାପରେ ବ୍ୟକ୍ତିଜଣକ ସେଠାରେ ଥିବା ହାର୍ଦ୍ଦିକଙ୍କ ସମର୍ଥକଙ୍କ ହାତରୁ ନିସ୍ତୁକ ମାଡ ଖାଇ ହସ୍ପିଟାଲରେ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ତେବେ ଏହି ବ୍ୟକ୍ତି ଜଣକ କିଏ ଏବଂ ସେ କାହିଁକି ହାର୍ଦ୍ଦିକଙ୍କୁ ଚାପୁଡା ମାରିଲେ ଏଭଳି ପ୍ରଶ୍ନ ଉଠୁଛି। ଏବେ ଜଣାପଡିଛି ଯେ, ଏହି ବ୍ୟକ୍ତି ଜଣକ ହେଉଛନ୍ତି ତରୁଣ ଗଜ୍ଜର। ପୋଲିସ ପକ୍ଷରୁ କୁହାଯାଇଛି ବ୍ୟକ୍ତିଜଣକ କୌଣସି ରାଜନୈତିକ ଦଳର ନୁହଁନ୍ତି। ସେ ଜଣେ ସାଧାରଣ ଲୋକ, ଆଇନ ନିଜର କାମ କରୁଛି।

ତେବେ ତରୁଣ କିନ୍ତୁ ସାମ୍ବାଦିକଙ୍କ ଆଗରେ ହାର୍ଦ୍ଦିକଙ୍କୁ ଚାପୁଡା ମାରିବାର କାରଣ କହିଛନ୍ତି। ତରୁଣ କହିଛନ୍ତି ଯେତେବେଳେ ପଟିଦାର ଆନ୍ଦୋଳନ ଚାଲିଥିଲା ସେତେବେଳେ ତାଙ୍କ ପତ୍ନୀ ଗର୍ଭବତୀ ଥିଲେ। ତାଙ୍କୁ ଚିକିତ୍ସା ପାଇଁ ହସ୍ପିଟାଲ ତୁରନ୍ତୁ ନେବାକୁ ଯିବାର ଥିଲେ ମଧ୍ୟ ଏହି ଆନ୍ଦୋଳନ ପାଇଁ ତାଙ୍କୁ ଖୁବ୍ ହଇରାଣ ହେବାକୁ ପଡିଥିଲା। ଏହାପରେ ଖୁବ୍ କଷ୍ଟରେ ତାଙ୍କ ସ୍ତ୍ରୀ ସନ୍ତାନ ପ୍ରସବ କରିଥିଲେ। ତେବେ ଏଥିରେ ତାଙ୍କ କଷ୍ଟ କମ୍ ହୋଇନଥିଲା। ତାଙ୍କର ନବଜାତ ଶିଶୁ ପାଇଁ ଯେତେବେଳେ ସେ ଔଷଧ କିଣିବାକୁ ଯାଇଥିଲେ ସେତେବେଳେ ମଧ୍ୟ ପଟିଦାର ଆନ୍ଦୋଳନ ଯୋଗୁଁ ଚାରିଆଡେ ବନ୍ଦ ଲାଗି ରହିଥିଲା। ସେ କହିଛନ୍ତି ହାର୍ଦ୍ଦିକ ଯେତେବେଳେ ଚାହୁଁଥିଲେ ଗୁଜରାଟ ବନ୍ଦ କରିଦେଉଥିଲେ, ସେ କିଏ? ସେ କ’ଣ ଗୁଜରାଟର ହିଟଲର? ସେ ଦିନ ଠାରୁ ନିଷ୍ପତ୍ତି ନେଇଥିଲି ଏହି ବ୍ୟକ୍ତି (ହାର୍ଦ୍ଦିକ)ଙ୍କୁ ଚାପୁଡା ମାରିବି। ସେବେଠାରୁ ସୁଯୋଗ ଖୋଜୁଥିଲି ଏବେ ତାହା ମିଳିଲା ବୋଲି ଏହି ବ୍ୟକ୍ତି ଜଣକ କହିଛନ୍ତି।