ନୂଆଦିଲ୍ଲୀ: ଆମେରିକାରେ ଏକ ଭୟଙ୍କର କାର ଦୁର୍ଘଟଣାରେ ଗୁଜୁରାଟର ତିନିଜଣ ମହିଳାଙ୍କ ମୃତ୍ୟୁ ଘଟିଛି । ତିନି ଜଣ ମହିଳାଙ୍କ ପରିଚୟ ରେଖାବେନ୍ ପଟେଲ, ସଂଗୀତାବେନ୍ ପଟେଲ ଏବଂ ମନୀଷାବେନ ପଟେଲ ବୋଲି ନିଶ୍ଚିତ ହୋଇଛି । ଏମାନେ ସମସ୍ତେ ଗୁଜୁରାଟର ଆନନ୍ଦ ଜିଲ୍ଲାର ବାସିନ୍ଦା ଥିଲେ । ଦକ୍ଷିଣ କାରୋଲିନାର ଗ୍ରୀନଭିଲ୍ କାଉଣ୍ଟିରେ ମହିଳାଙ୍କ କାର ଏକ ପୋଲ ତଳକୁ ଖସି ପଡିବା କାରଣରୁ ଏହି ଦୁର୍ଘଟଣା ଘଟିଛି । ପ୍ରାୟ ୨୦ ଫୁଟ ତଳରୁ କାର୍ଟି ଖସିପଡିଥିଲା ।
ଆମେରିକୀୟ ଅଧିକାରୀ ନ୍ୟୁଜ୍ ଚ୍ୟାନେଲ୍ WSPA କୁ କହିଛନ୍ତି ଯେ, କାର୍ଟି ନିର୍ଦ୍ଧାରିତ ଗତି ସୀମା ଠାରୁ ଅଧିକ ଗତିରେ ଚାଲୁଥିଲା । ସେ ଆହୁରି ମଧ୍ୟ ସ୍ପଷ୍ଟ କରିଛନ୍ତି ଯେ, ଏହି ସଡକ ଦୁର୍ଘଟଣାରେ ଅନ୍ୟ କୌଣସି କାର ସମ୍ପୃକ୍ତ ନୁହଁନ୍ତି । କାରଟି ଏକ ଗଛରେ ଅଟକି ରହି ଥିଲା, ଏବଂ ଖଣ୍ଡ ଖଣ୍ଡ ହୋଇ ଭାଙ୍ଗି ଯାଇଥିବା ଦେଖିବାକୁ ମିଳିଛି ।
ଅଧିକାରୀ ଆହୁରି ମଧ୍ୟ କହିଛନ୍ତି, "ଏହା ଅତ୍ୟନ୍ତ ଆଶ୍ଚର୍ଯ୍ୟଜନକ ଘଟଣା । କାର୍ର ବେଗ ଏତେ ମାତ୍ରାରେ ଥିଲା ଯେ, ଏହା ୪-୬ ଲେନ୍କୁ ଅତିକ୍ରମ କରି ନିୟନ୍ତ୍ରଣ ହରାଇ ପୋଲ ତଳକୁ ଖସି ପଡିଥିଲା । ଏହି ଦୁର୍ଘଟଣାର ଏକମାତ୍ର ବଞ୍ଚିଥିବା ବ୍ୟକ୍ତି ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଥିବା ବେଳେ ତାଙ୍କ ଅବସ୍ଥା ଅନିଶ୍ଚିତ ରହିଛି ।