ଆଜିଠୁ ବିଶ୍ୱପ୍ରସିଦ୍ଧ ଅଟ୍ରୀ ମକର ମେଳା ଆରମ୍ଭ

ବେଗୁନିଆ ୧୫/୧: ମକର ସଂକ୍ରାନ୍ତି ଅବସରରେ ରାଜ୍ୟର ଅନ୍ୟତମ ପ୍ରମୁଖ ଶୈବପୀଠ ବାଘମାରୀ ଅଟ୍ରୀସ୍ଥିତ ଏକାଦଶ ରୁଦ୍ରବାବା ହଟ୍ଟକେଶ୍ୱରଙ୍କ ପୀଠରେ ମକର ଯାତ୍ରା ପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି । ବୁଧବାର ପୂର୍ବାହ୍ନରୁ ମେଳା ଆରମ୍ଭ ହେବ । ଚଳିତ ବର୍ଷ ୫ଦିନ ଯାଏ ମେଳା ଆୟୋଜନ ନେଇ ପ୍ରଶାସନ ନିଷ୍ପତ୍ତି ନେଇଛି । ବିଶ୍ୱାସ କରାଯାଏ ହଟ୍ଟକେଶ୍ୱରଙ୍କ ନିକଟରେ ମାନସିକଧାରୀ ଯାହା କାମନା କରନ୍ତି ତାହା ପ୍ରାପ୍ତ ହୋଇଥାଏ । ଏପରିକି ହଟ୍ଟକେଶ୍ୱର ମନ୍ଦିର ନିକଟରେ ଥିବା ଦହଳକୁଣ୍ଡ ତଥା ମାନସିକ କୁଣ୍ଡରେ ଗୁଆ ଖୋଜି ତାହାକୁ ଭକ୍ଷଣ କଲେ ନିସନ୍ତାନ ସନ୍ତାନ ଲାଭ କରିଥାଏ ବୋଲି ବିଶ୍ୱାସ ରହିଛି । ଫଳରେ ମକର ସଂକ୍ରାନ୍ତିରେ ରାଜ୍ୟ ତଥା ରାଜ୍ୟର କୋଣ ଅନୁକୋଣରୁ ବନ୍ଧ୍ୟା ନାରୀମାନଙ୍କ ସମାଗମ ହେବା ଦେଖାଯାଇଥାଏ ।

ପର୍ଯ୍ୟଟକ, ଭକ୍ତ ଓ ଶ୍ରଦ୍ଧାଳୁମାନଙ୍କ ସମାଗମ, ଠାକୁର ଦର୍ଶନ ଏବଂ ଠାକୁରଙ୍କ ରୀତିନୀତିକୁ ଦୃଷ୍ଟିରେ ରଖି ମନ୍ଦିର ଓ ଗ୍ରାମ୍ୟ କମିଟି ତରଫରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ମନୋରଞ୍ଜନ ପାଇଁ ମୀନାବଜାର, ଦୋଳି ଏବଂ ଯାତ୍ରା ଅପେରାମାନ ଆସ୍ଥାନ ଜମାଇଥିବା ଦେଖାଯାଇଛି । ଏଥିସହ ଉଠା ବ୍ୟବସାୟୀମାନେ ଏବେଠାରୁ ସେମାନଙ୍କ ପସରା ମେଳାଇ ଦେଲେଣି । ପ୍ରଶାସନ ତରଫରୁ ଠାକୁରଙ୍କ ଦର୍ଶନ ଏବଂ ମେଳାକୁ ଶାନ୍ତିଶୃଙ୍ଖଳାର ସହ ଶେଷ କରିବା ପାଇଁ ବ୍ୟାପକ ବ୍ୟବସ୍ଥା କରାଯାଇଛି । ଜିଲ୍ଲା ପୁଲିସ ପକ୍ଷରୁ ଅତିରିକ୍ତ ଏସପିଙ୍କ ନେତୃତ୍ୱରେ ୩ଜଣ ଡିଏସପି, ୪ଜଣ ଇନ୍‌ସପେକ୍ଟର, ୬ଜଣ ସବଇନ୍‌ସପେକ୍ଟର, ୨୭ଜଣ ଏଏସଆଇ, ୩୦ଜଣ କନଷ୍ଟେବଳ, ୪୦ଜଣ ଗୃହରକ୍ଷୀଙ୍କ ସମେତ ୪ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯାଇଛି । ଶାନ୍ତିଶୃଙ୍ଖଳା ରକ୍ଷାରେ କେତେକ ସ୍କୁଲର ଏନସିସି, ସ୍କାଉଟ୍‌, ସିଭିଲ ଛାତ୍ରଛାତ୍ରୀମାନଙ୍କୁ ମଧ୍ୟ ସାମିଲ କରାଯାଇଛି । ଏହି ମେଳାକୁ ସରସ ସୁନ୍ଦର କରାଯିବା ପାଇଁ ସ୍ଥାନୀୟ ବିଧାୟକ ରାଜେନ୍ଦ୍ର ସାହୁଙ୍କ ତତ୍ତ୍ୱାବଧାନରେ ପ୍ରତିବର୍ଷ ଭଳି ଏବର୍ଷ ମଧ୍ୟ ମକର ମହୋତ୍ସବ ଅନୁଷ୍ଠିତ ହେଉଛି । ଏଥିରେ ଲୋକକଳା, କବିତା ଆସର, ସାଂସ୍କୃତିକ କାର୍ଯ୍ୟକ୍ରମ ସମେତ ଅଞ୍ଚଳର ବିଭିନ୍ନ ପ୍ରତିଭାମାନଙ୍କୁ ସମ୍ମାନିତ କରିବାର କାର୍ଯ୍ୟକ୍ରମ ରହିଥିବା ଜଣାପଡ଼ିଛି ।

   ସମ୍ବନ୍ଧିତ ଖବର


ଦିବ୍ୟାଙ୍ଗ ଯୁବତୀ ୮ମାସର ଗର୍ଭବତୀ – ଦୁଷ୍କର୍ମ କରିଥିବା ବିବାହିତ ଯୁବକ ଫେରାର

ଯକ୍ଷ୍ମା ରୋଗୀଙ୍କ ଉପରେ ଭାରୀ ପଡ଼ିବ କରୋନା!

ରାଇଘର ଅଞ୍ଚଳରେ ସ୍ଥିତି ଅନୁଧ୍ୟାନ କଲେ ଡିଆଇଜି, କହିଲେ ମୁଖ୍ୟସ୍ରୋତକୁ ଫେରୁଛନ୍ତି ମାଓବାଦୀ

‘ପ୍ରମେୟ’ କନ୍ଧମାଳ ଜିଲ୍ଲା ପ୍ରତିନିଧି ତାରିଣୀ ପାଢ଼ୀଙ୍କୁ ଶ୍ରଦ୍ଧାଞ୍ଜଳି

ରାସ୍ତା ପାଲଟିଛି ମରଣଯନ୍ତା, ଅସରାଏ ବର୍ଷାରେ ରାସ୍ତା ବେହାଲ

ଆଞ୍ଚଳିକ ପରିବହନ କାର୍ଯ୍ୟାଳୟରେ କରୋନା ପରୀକ୍ଷା