୪ ବର୍ଷ ହେଲା ପାଇଖାନା ଘରେ ରହୁଛନ୍ତି ଭିନ୍ନକ୍ଷମ ପୁଅ ଓ ବୃଦ୍ଧା ମା: ଘର ନିର୍ମାଣର ପ୍ରତିଶୃତି ଦେଇ ଭୁଲି ଗଲେ ସରକାର

ଚୌଦ୍ୱାର ୧୪/୧: ସରକାର ଅସହାୟ ଲୋକଙ୍କୁ ସହାୟତା ପ୍ରଦାନ ପାଇଁ ବିଭିନ୍ନ ଜନକଲ୍ୟାଣ ଯୋଜନା କରୁଛନ୍ତି । କିନ୍ତୁ ସରକାରଙ୍କ ଏହି ଯୋଜନା ବେଳେବେଳେ ଅସହାୟ ଲୋକଙ୍କ ପାଇଁ ଅପହଞ୍ଚ ହୋଇଯାଇଛି । କଟକ ଜିଲ୍ଲା ଆଠଗଡ ବ୍ଲକ ଅନ୍ତର୍ଗତ ଓରନ୍ଦା ପଞ୍ଚାୟତର ବାଳି (ଧର୍ମପୁର) ଗ୍ରାମରେ ଏହାର ଉଦାହରଣ ଦେଖିବାକୁ ମିଳିଛି । ଘର ନଥିବାରୁ ଏକ ପାଇଖାନା ଘରେ ଜଣେ ବୃଦ୍ଧା ଓ ତାଙ୍କ ପୁଅଙ୍କ ଜୀବନ ବିତୁଛି ।

ଧର୍ମପୁର ଗ୍ରାମର ସୁକୃତି ମଙ୍ଗୁଆଳ(୭୫) ଓ ମାନସିକ ଭିନ୍ନକ୍ଷମ ପୁଅ ଜାକୁବ ମଙ୍ଗୁଆଳ(୪୦) ପାଇଖାନା ଘରେ ଜୀବନ ବିତାଉଛନ୍ତି । ଜମିବାଡି ବୋଲି କିଛି ନାହିଁ । ଯାହା ଅଛି ଘର ଢିହ ଖଣ୍ଡେ । ସେହି ଢିହରେ ୨ବଖରା ଛାଳ ଘରେ ସେମାନେ ରହୁଥିଲେ । ହେଲେ ୨୦୧୬ ମସିହା ଡିସେମ୍ୱର ୩ ତାରିଖରେ ରାତିରେ କୌଣସି କାରଣରୁ ନିଆଁ ଲାଗି ଘର ଜଳିପୋଡି ପାଉଁଶ ହୋଇଗଲା । ସେହିଦିନଠାରୁ ବେସାହାରା ହୋଇଗଲେ ମା’ ପୁଅ । ଆଠଗଡ ତହସିଲ ପକ୍ଷରୁ ନିଧିପୁର ଆର୍‌ଆଇ ଆସି ତଦନ୍ତ କଲେ । ତଦନ୍ତ କରି ପ୍ରଶାସନ ୩୨ଶହ ଟଙ୍କା ସହ ଜରିପାଲ ଖଣ୍ଡେ ଦେଇ କାମ ସାରିଦଲେ । ୧୫ ଦିନ ମଧ୍ୟରେ ଘର ନିର୍ମାଣ ପାଇଁ ସରକାରୀ ସହାୟତା ଦିଆଯିବ ବୋଲି କର୍ତ୍ତୃପକ୍ଷ କହିଲେ ମଧ୍ୟ କାହାର ଦେଖାମିଳିଲା ନାହିଁ । ସେହିଦିନଠାରୁ ନିଜେ କରିଥିବା ଏକ ଛୋଟ ପାଇଖାନା ଘରେ ମା ସୁକୃତି ନିଜ ମାନସିକ ଭିନ୍ନକ୍ଷମ ପୁଅକୁ ନେଇ ରହୁଛନ୍ତି । ନିର୍ବାଚନବେଳେ ନେତାମାନେ ପ୍ରତିଶ୍ରୁତି ଦେଉଥିଲେ ମଧ୍ୟ ପରେ କିଛି ସୁଫଳ ମିଳୁନାହିଁ। ସରକାରୀ ସହାୟତା କହିଲେ ମାସକୁ ମିଳୁଛି ୫ଶହ ଟଙ୍କା ଭତ୍ତା ଓ ୨ଜଣଙ୍କର ୧୦ କେଜି ଚାଉଳ । ସେଇଥିରେ ଦୁଇ ଜଣ ଚଳିବା କଷ୍ଟକର ହୋଇ ପଡୁଛି । ପାଗଳ ପୁଅ କେତେବେଳେ କୁଆଡେ ଯାଉଛି ଠିକ୍‌ ନାହିଁ । ତେଣୁ ଘର କେମିତି କରିବି ବୋଲି ଲୁହ ପୋଛି କହନ୍ତି ସୁକୃତି ।

ପାଇଖାନା ଘର ଆଗରେ ଏକ ଉଠା ଚୁଲିରେ ୭୫ ବର୍ଷ ବୟସରେ ପୁଅ ଓ ନିଜ ପାଇଁ ରୋଷେଇ କରୁଛନ୍ତି । ଉପରେ ଚିରା ଫଟା ପାଲ ଟଙ୍ଗା ହୋଇଥିବାବେଳେ ବର୍ଷା ହେଲେ ରୋଷେଇ ମଧ୍ୟ ବନ୍ଦ । ମା’ ପୁଅ ସେହି ପାଇଖାନା ଘରେ ସବୁ ଜିନିଷ ରଖି ଚଳୁଛନ୍ତି । ଅନ୍ୟପକ୍ଷରେ ପ୍ରଶାସନ କଣ ପାଇଁ ଏ ପରିବାର ପାଇଁ ସହାୟତାର ହାତ ବଢାଉ ନାହିଁ ତାହା ଅଞ୍ଚଳବାସସୀଙ୍କୁ ଆଶ୍ଚର୍ଯ୍ୟ କରିଛି । ତୁରନ୍ତ ଏନେଇ ପଦକ୍ଷେପ ନେବାକୁ ପ୍ରଶାସନ ନିକଟରେ ଦାବି ହେଉଛି ।

   ସମ୍ବନ୍ଧିତ ଖବର


ଜଳେଶ୍ୱର ଥାନା IIC ଧନେଶ୍ୱର ସାହୁ ନିଲମ୍ବିତ

ଇଏ ସେହି ମହିଳା, ଯିଏ ପୁରା ବିଶ୍ୱ ପାଇଁ ତିଆରି କରନ୍ତି Indian Flag

କାଲିଫର୍ଣ୍ଣିଆ ଷ୍ଟେଟ୍‌ ଆସେମ୍ୱଲିରୁ ସୁଶାନ୍ତ ସିଂହ ରାଜପୁତଙ୍କୁ ମିଳିଲା ସମ୍ମାନ, ଭଉଣୀ ସେୟାର କଲେ ଫଟୋ

୪ଥର ବିବାହ କରିସାରିଛନ୍ତି ଏହି ସିଙ୍ଗର – ୧୫୫ କିଲୋ ଓଜନ କମାଇ ସମସ୍ତଙ୍କୁ କରିଥିଲେ ଆଶ୍ଚର୍ଯ୍ୟ

ପିକ୍‌ଅପ୍‌ ଧକ୍କାରେ ୨ ମୃତ

ପତାକା ଉତ୍ତୋଳନ କଲେ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ