ଟ୍ବିଟର ସିଇଓଙ୍କ ଆକାଉଣ୍ଟ ହ୍ୟାକ୍, ଆସୁଛି ଏଭଳି ଆପତ୍ତିଜନକ ଟ୍ବିଟ୍ସ୍
ସାନ୍ ଫ୍ରାନ୍ସିସ୍କୋ ୩୧।୮: ଟ୍ବିଟର ପ୍ରତିଷ୍ଠାତା ତଥା ଏହାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜ୍ୟାକ୍ ଡୋର୍ସୀଙ୍କ ଟ୍ବିଟର ଆକାଉଣ୍ଟକୁ ହ୍ୟାକ୍ ହୋଇଯାଇଛି। ତାଙ୍କ ଆକାଉଣ୍ଟରୁ ହ୍ୟାକର ଆକାଉଣ୍ଟ ହ୍ୟାକ୍ କରି ସେଥିରେ ଅନେକ ଆପତ୍ତିଜନକ ଟ୍ବିଟସ କରିଛି। ଟ୍ବିଟର ପକ୍ଷରୁ ଏ ନେଇ ସୂଚନା ଦେଇ ସ୍ପଷ୍ଟ କରାଯାଇଛି।
ଟ୍ବିଟର ପ୍ରତିଷ୍ଠାତାଙ୍କ ଆକାଉଣ୍ଟ ହ୍ୟାକ୍ ହେବା ପରେ ଏହାର ବ୍ୟବହାରକାରୀ ଅନେକ ପ୍ରଶ୍ନ ଉଠାଇଛନ୍ତି। ଜ୍ୟାକ୍ ନିଜ ଆକାଉଣ୍ଟକୁ ସୁରକ୍ଷିତ ରଖିବାରେ ବିଫଳ ହୋଇଥିବାବେଳେ କୋଟି କୋଟି ବ୍ୟବହାରକାରୀଙ୍କ ଆକାଉଣ୍ଟଙ୍କ କିପରି ସୁରକ୍ଷିତ ରହିବ ବୋଲି ବ୍ୟବହାରକାରୀ ପ୍ରଶ୍ନ କରିଛନ୍ତି। ବହୁ ବ୍ୟବହାରକାରୀ କ’ଣ ପାଇଁ ଟ୍ବିଟର ପ୍ରତିଷ୍ଠାତା ନିଜ ଆକାଉଣ୍ଟକୁ ଟୁ ଫ୍ୟାକ୍ଟର ଅଥେଣ୍ଟିକେଶନ ନିରାପତ୍ତା ମଧ୍ୟରେ ରଖିନାହାନ୍ତି ବୋଲି ପ୍ରଶ୍ନ କରିଛନ୍ତି। ଟ୍ବିଟର ଏହାର ମୁଖ୍ୟଙ୍କ ଆକାଉଣ୍ଟକୁ ନିରାପଦ ରଖି ନ ପାରିବା ଅନେକ ବ୍ୟବହାରକାରୀଙ୍କୁ ବିବ୍ରତ କରିଛି।
ଟ୍ବିଟରର ଜଣେ ମୁଖପାତ୍ର କହିଛନ୍ତି, ହ୍ୟାକର୍ସ ଜ୍ୟାକ୍ଙ୍କ ଆକାଉଣ୍ଟରେ ଅନେକ ଜାତିଗତ ଆକ୍ଷେପ କରି ମେସେଜ ପୋଷ୍ଟ କରିଛନ୍ତି। ଏହା ସହିତ ‘ହାଜ୍ ଟ୍ୟାଗ୍ ଚକଲିଂ ସ୍କ୍ବାଡ୍’ ଲେଖାଯାଇଛି, ଯାହା ହ୍ୟାକରଙ୍କ ପରିଚୟ ବୋଲି ସେ କହିଛନ୍ତି। ଆଉ ଏକ ମେସେଜରେ ଜର୍ମାନୀର ନାଜିମାନଙ୍କୁ ସମର୍ଥନ କରାଯାଇଛି।
ଏହା ପୂର୍ବରୁ ୨୦୧୬ରେ ଜ୍ୟାକ୍ ଡୋର୍ସୀଙ୍କ ଆକାଉଣ୍ଟ ହ୍ୟାକ୍ ହୋଇସାରିଛି। ସେତେବେଳେ ଅବରମାଇନ ନାମକ ଜଣେ ହ୍ୟାକର ଗ୍ରୁପ ତାଙ୍କ ଆକାଉଣ୍ଟରୁ ଅନେକ ଆପତ୍ତିଜନକ ମ୍ୟାସେଜ୍ କରିଥିଲା।
