ଚଳନ୍ତା ଟ୍ରେନ୍‌ରୁ ଯୁବକଙ୍କୁ ଠେଲିଦେଲେ

ଭୁବନେଶ୍ୱର ୨୫/୮: ଲିଙ୍ଗରାଜ ଷ୍ଟେସନ ନିକଟରେ ଜଣେ ଯୁବକଙ୍କୁ ଚଳନ୍ତା ଟ୍ରେନ୍‌ରୁ ଠେଲି ଦିଆଯାଇଛି । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଯୁବକଙ୍କ ନାମ ଜୟନ୍ତ ସାହୁ । ଘର କେନ୍ଦୁଝର କରଗୋଲାରେ ବୋଲି ଜଣାପଡ଼ିଛି ।

ଯୁବକଙ୍କ ଅଭିଯୋଗ ଅନୁଯାୟୀ, ସେ ଟ୍ରେନ୍‌ରେ ଆସୁଥିବା ବେଳେ ୩/୪ଜଣ ଯୁବକ ତାଙ୍କୁ କମେଣ୍ଟ ମାରିଥିଲେ । ସେ ପ୍ରତିବାଦ କରିବାରୁ ତାଙ୍କୁ ମାଡ଼ ମାରି ଚଳନ୍ତା ଟ୍ରେନ୍‌ରୁ ଠେଲି ଦେଇଥିଲେ । ନିକଟସ୍ଥ କାର୍‌ଗିଲ ବସ୍ତିବାସିନ୍ଦା ଯୁବକଙ୍କୁ ଗୁରୁତର ଅବସ୍ଥାରେ ଦେଖି ୧୦୮ ଆମ୍ବୁଲାନ୍ସକୁ ଫୋନ୍‌ କରିଥିଲେ । ଆମ୍ବୁଲାନ୍ସ ପହଞ୍ଚିବାରେ ବିଳମ୍ବ ଘଟିବାରୁ ସେମାନେ ପ୍ରଦୀପ ସେବା ଟ୍ରଷ୍ଟ ସଂସ୍ଥାକୁ ଫୋନ୍‌ କରି ଜଣାଇଥିଲେ । ସଂସ୍ଥାର କର୍ମଚାରୀମାନେ ପହଞ୍ଚି ଜୟନ୍ତଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି । ତାଙ୍କ ଅବସ୍ଥା ସଂକଟାପନ୍ନ ଥିବା ଜଣାପଡ଼ିଛି । ଏନେଇ ପ୍ରଦୀପ ସେବା ଟ୍ରଷ୍ଟ ପକ୍ଷରୁ ଭୁବନେଶ୍ୱର ରେଳବାଇ ଥାନାରେ ଲିଖିତ ଅଭିଯୋଗ କରାଯାଇଛି ।