ନୂଆଦିଲ୍ଲୀ – ଉପରାଷ୍ଟ୍ରପତି ଜଗଦୀପ ଧନଖଡ଼ ଇରାନ ଯାତ୍ରା କରି ପାରନ୍ତି। ସେ ରାଷ୍ଟ୍ରପତି ଇବ୍ରାହିମ୍ ରଇସିଙ୍କ ଅନ୍ତିମ ସଂସ୍କାରରେ ଭାରତର ପ୍ରତିନିଧି ଭାବେ ସାମିଲ ହେବାର ସମ୍ଭାବନା ରହିଛି। ସୂତ୍ରାନୁସାରେ, ମଙ୍ଗଳବାର ଏହି ସୂଚନା ମିଳିଛି। ସୋମବାର ତାଙ୍କର ହେଲିକପ୍ଟର ଦୁର୍ଘଟଣାରେ ମୃତ୍ୟୁ ହୋଇଥିଲା। ଧନଖଡ଼ ବୁଧବାର ପ୍ରସ୍ଥାନ କରିବାର ସମ୍ଭାବନା ରହିଛି। ରଇସିଙ୍କ ସମ୍ମାନରେ ମଙ୍ଗଳବାର ପୂରା ଭାରତରେ ଏକ ଦିବସୀୟ ରାଷ୍ଟ୍ରୀୟ ଶୋକ ପାଳନ କରାଯାଉଛି।
ଇରାନର ସରକାରୀ ମିଡ଼ିଆ ମୁତାବିକ, ଦେଶର ଉତ୍ତର –ପଶ୍ଚିମୀ ଭାଗରେ କୁହୁଡ଼ି ଆଚ୍ଛାଦିତ ପାହାଡି କ୍ଷେତ୍ରରେ ହେଲିକପ୍ଟରର ଦୁର୍ଘଟଣାଗ୍ରସ୍ତ ହେବାର କିଛି ଘଣ୍ଟା ପରେ ରାଷ୍ଟ୍ରପତି ରଇସି , ବିଦେଶ ମନ୍ତ୍ରୀ ଓ ଆହୁରି ଅନେକ ଅଧିକାରୀ ସୋମବାର ମୃତ ଭାବେ ମିଳି ଥିଲେ। ରଇସି (୬୩ ବର୍ଷ) ଓ ତାଙ୍କର ଟିମ୍ ରବିବାର ଅଜରବୈଜାନ-ଇରାନ ସୀମାରେ ଏକ ଅଞ୍ଚଳର ଯାତ୍ରାରୁ ଫେରିବା ପରେ ତବରିଜ ସହର ଅଭିମୂଖେ ଯାଉଥିଲେ। ସେତିକି ବେଳେ ତାଙ୍କର ହେଲିକପ୍ଟର ଦୁର୍ଘଟଣା ଗ୍ରସ୍ତ ହୋଇଥିଲା।
ଉଲ୍ଲେଖନୀୟ ଯେ, ଦିବଙ୍ଗତ ରାଷ୍ଟ୍ରପତି ଇବ୍ରାହିମ୍ ରଇସି, ବିଦେଶ ମନ୍ତ୍ରୀ ହୁସୈନ ଅମିରାବଦୁଲ୍ଲାହିୟନ ଓ ଅନ୍ୟ ଅଧିକାରୀମାନେ ଅନ୍ତିମ ସଂସ୍କାରରେ ସାମିଲ ହେବା ଓ ଶୋକ ପାଳିବା ପାଇଁ ମଙ୍ଗଳବାର ଲୋକଙ୍କର ଏକତ୍ର ହେବା କାର୍ଯ୍ୟ ଆରମ୍ଭ ହୋଇ ଯାଇଛି। ଇରାନର ସରକାର ଦିବଙ୍ଗତ ରାଷ୍ଟ୍ରପତିଙ୍କ ସମ୍ମାନରେ ଅନେକ କାର୍ଯ୍ୟକ୍ରମ ଆୟୋଜିତ କରିଛନ୍ତି। ଏହାସହ ସେ ଏହା ମାଧ୍ୟମରେ ପଶ୍ଚିମ ଏସିଆରେ ଶକ୍ତି ପ୍ରଦର୍ଶନ ମଧ୍ୟ କରିବାକୁ ଚାହୁଁଛି ।