ପୁଣିଥରେ ଯୁଦ୍ଧ ବିମାନ ଚଳାଇ ପାରନ୍ତି ଅଭିନନ୍ଦନ, ଆଉ ଅଳ୍ପ ଦିନର ଅପେକ୍ଷା

ନୂଆଦିଲ୍ଲୀ,୨୦।୪: ଭାରତୀୟ ବାୟୁସେନାର ୱିଙ୍ଗ କମାଣ୍ଡର ଅଭିନନ୍ଦନ ବର୍ତ୍ତମାନଙ୍କୁ ଖୁବ୍‌ଶୀଘ୍ର  ଯୁଦ୍ଧ ବିମାନ ଉଡ଼ାଇବାକୁ ସୁଯୋଗ ମିଳିବ। କିନ୍ତୁ ଏଥିପାଇଁ ବେଙ୍ଗାଲୁରୁ ସ୍ଥିତ ଇନଷ୍ଟିଚ୍ୟୁଟ୍‌ ଅଫ ଏରୋସ୍ପେଶ୍‌ ମେଡିସିନ(ଆଇଏଏମ)ରୁ ସବୁଜ ସଙ୍କେତ ମିଳିବା ପରେ ସେ ଯୋଗ ଦେବେ। ଆଗାମୀ ସପ୍ତାହରେ କିଛି ପରୀକ୍ଷା କରାଯିବ। ଆଇଏଏମ ପକ୍ଷରୁ ଚୂଡ଼ାନ୍ତ ମଞ୍ଜୁରୀ ମିଳିବା ପରେ ୩୫ ବର୍ଷୀୟ ଅଭିନନ୍ଦନଙ୍କୁ କକ୍‌ପିଟରେ ବସିବାକୁ ସୁଯୋଗ ମିଳିବ ବୋଲି ଭାରତୀୟ ବାୟୁସେନାର ୨ ଜଣ ଅଧିକାରୀ କହିଛନ୍ତି।

ଜଣେ ଅଧିକାରୀ କହିଛନ୍ତି, ଅଭିନନ୍ଦନଙ୍କ କ୍ଷେତ୍ରରେ ଯାହା ଘଟିଛି ସେଭଳି ପରିସ୍ଥିତିରେ ପାଇଲଟଙ୍କୁ ଯୁଦ୍ଧ ବିମାନ ଉଡ଼ାଣ କରିବାକୁ ଚୂଡ଼ାନ୍ତ ଅନୁମତି ଦେବା ପୂର୍ବରୁ ବିଶେଷଜ୍ଞମାନେ ପ୍ରାୟ ୧୨ ସପ୍ତାହ ପର୍ଯ୍ୟନ୍ତ ପାଇଲଟ୍‌ଙ୍କ ସ୍ବାସ୍ଥ୍ୟାବସ୍ଥା ଆକଳନ କରନ୍ତି। ସେହି ଆଧାରରେ ମେ ମାସ ​‌ଶେଷ ସୁଦ୍ଧା ଅଭିନନ୍ଦନଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ଜଣାପଡ଼ିଯିବ। କିନ୍ତୁ ଅଭିନନ୍ଦନ ପୁଣିଥରେ ଯୁଦ୍ଧ ବିମାନ ଚଳାଇବା ନେଇ ଯେଉଁଭଳି ଭାବରେ  ଦୃଢ଼ ଇଚ୍ଛାଶକ୍ତି ରଖିଛନ୍ତି ଆମେ ଆଶା କରୁଛୁ ସେ ଖୁବ୍‌ଶୀଘ୍ର ଫେରିବେ।

ଉଲ୍ଲେଖନୀୟ ଯେ, ଗତ ଫେବୃୟାରୀ ୨୭ରେ ନିୟନ୍ତ୍ରଣ ରେଖା ନିକଟରେ ଭାରତୀୟ ଯୁଦ୍ଧ ବିମାନ ମିଗ୍‌-୨୧ ଉଡ଼ାଉଥିବା ଅଭିନନ୍ଦନ ପାକିସ୍ତାନୀ ଯୁଦ୍ଧ ବିମାନ ଏଫ-୧୬କୁ ଖସାଇ ଇତିହାସ ସୃଷ୍ଟି କରିଛନ୍ତି। ମିଗ୍‌-୨୧ ଦ୍ବାରା ଏଫ୍‌-୧୬ ବିମାନ ଖସାଯିବା ଘଟଣା ପ୍ରଥମ, କାରଣ ଏହି ଦୁଇଟିର ଜେନେରେସନ୍ ଅଲଗା ବୋଲି ବିଶେଷଜ୍ଞମାନେ କହିବା ସହ ଅଭିନନ୍ଦନଙ୍କୁ ପ୍ରଶଂସା କରିଛନ୍ତି। ଅଭିନନ୍ଦନଙ୍କ ଏଭଳି କାର୍ଯ୍ୟ ପାଇଁ ଦେଶର ୩ୟ ସର୍ବୋଚ୍ଚ ସାହସିକତା ପୁରସ୍କାର ବୀରଚକ୍ର ଲାଗି ତାଙ୍କ ନାମ ସୁପାରିସ କରାଯାଇପାରେ ବୋଲି ଏହି ଦୁଇ ଅଧିକାରୀ କହିଛନ୍ତି। ଅଭିନନ୍ଦନଙ୍କୁ ଦିଲ୍ଲୀରେ ଥିବା ବାୟୁସେନାର କେନ୍ଦ୍ରୀୟ ଚିକିତ୍ସାଳୟ ପ୍ରତିଷ୍ଠାନରେ ଚିକିତ୍ସା କରାଯାଇଥିଲା।  ଚିକିତ୍ସା ବେଳେ ଡାକ୍ତରମାନେ କହିଥିଲେ ଅଭିନନ୍ଦନଙ୍କ ମେରୁଦଣ୍ଡରେ ଆଘାତ ଲାଗିଛି। ଏଭଳି ପରିସ୍ଥିତିରେ ପାଇଲଟଙ୍କୁ ପୁନର୍ବାର ଯୁଦ୍ଧ ବିମାନ ଚଳାଇବାର ଅନୁମତି ମିଳିନଥାଏ। କିନ୍ତୁ ଅଭିନନ୍ଦନଙ୍କ ଉତ୍ସାହ ଦେଖି ତାଙ୍କୁ ଯୁଦ୍ଧ ବିମାନ ଚଳାଇବାକୁ ଦିଆଯିବ କି ନାହିଁ ତାହା ଆସନ୍ତା ମଇ ମାସ ସୁଦ୍ଧା ଜଣାପଡିଯିବ।

   ସମ୍ବନ୍ଧିତ ଖବର


ଚର୍ଚ୍ଚାରେ ଅଜିତ ଡୋଭାଲଙ୍କ ଶ୍ରୀଲଙ୍କା ଗସ୍ତ, ଏହି ସବୁ ବିଷୟରେ କରିଛନ୍ତି ଆଲୋଚନା

ଜହ୍ନରେ ହେବ ୧୭୪ କୋଟି ଟଙ୍କାର ଟୟଲେଟ୍, ଖର୍ଚ୍ଚ କରିବ ନାସା

ବ୍ରହ୍ମପୁତ୍ର ନଦୀରେ ଡ୍ୟାମ୍‌ ନିର୍ମାଣ କରିବ ଚୀନ୍‌ : ଭାରତ ଓ ବାଂଲାଦେଶର ବଢ଼ିଲା ଚିନ୍ତା

ଜାପାନରେ କରୋନାଠୁ ବି ବଡ ବିପଦ, ଲଗାତର ମରୁଛନ୍ତି ଲୋକ

ବିବାହରେ ଲୋକଙ୍କୁ ଏମିତି କରାଗଲା ସାନିଟାଇଜ୍‌ , ଆଇଏଏସ୍‌ ଅଫିସର କହିଲେ …

ଆଉ ଦୁଇ ଦିନ – ବୁଧବାରଠାରୁ ଏନ୍‌ଏଚ୍‌ଏସ୍‌ ହସ୍ପିଟାଲମାନଙ୍କରେ ଦିଆଯିବ କରୋନା ଟିକା