ନୂଆଦିଲ୍ଲୀ,୩୦।୩: ଲୋକସଭା ନିର୍ବାଚନ ପାଖେଇ ଆସିଛି, ସବୁଥର ଭଳି ଏଥର ମଧ୍ୟ ଇଲୋଟ୍ରୋନିକ୍ସ ଭୋଟିଂ ମେସିନ୍ (ଇଭିଏମ୍)କୁ ନେଇ ହୋହଲ୍ଲା ଆରମ୍ଭ ହୋଇଯାଇଛି। ଅନେକ ରାଜନୈତିକ ଦଳ ସବୁଥର ଭଳି ଏଥର ମଧ୍ୟ ଇଭିଏମର ବିଶ୍ବାସନୀୟତା ଉପରେ ପ୍ରଶ୍ନ ଉଠାଇଛନ୍ତି। ନିର୍ବାଚନ ବେଳେ ପ୍ରକ୍ସି ଭୋଟ ଓ ନକଲି ଭୋଟରୁ ବଞ୍ଚିବା ପାଇଁ ନିର୍ବାଚନ କମିଶନ୍ ଏଥର ଲୋକସଭା ନିର୍ବାଚନରେ ଭେରିଫିଏବଲ ପେପର ଅଡିଟ୍ ଟ୍ରେଲ(ଭିଭିପିଏଟି)ର ବ୍ୟବହାର କରିବାକୁ ଯାଉଛନ୍ତି। ନିର୍ବାଚନରେ ଭୋଟ ଦେବା ପରେ ଭୋଟରଙ୍କ ମନରେ ଆଶଙ୍କା ଥାଏ ସତରେ କ’ଣ ତାଙ୍କ ଭୋଟ ଠିକ୍ ପ୍ରାର୍ଥୀଙ୍କ ନିକଟକୁ ଯାଇଛି କି ନାହିଁ? ଏବେ ଏହି ଭ୍ରମକୁ ଦୂର କରିହେବ, ଭୋଟ ଦେବାର ୧୦ ସେକେଣ୍ଡ ଭିତରେ  ଆପଣଙ୍କୁ ଇଭିଏମ୍ ସ୍କ୍ରିନରେ ଏହାର ପ୍ରମାଣ  ମିଳିଯିବ। ଏଥିରେ ସ୍ପଷ୍ଟ ଭାବରେ ଜଣାପଡିଯିବ ଯେଉଁ ପ୍ରାର୍ଥୀଙ୍କୁ ଭୋଟ ଦେଇଛନ୍ତି ତାହା ତାଙ୍କୁ ଯାଇଛି କି ନାହିଁ। ସ୍କ୍ରିନରେ ଦେଖାଯାଉଥିବା ସ୍ଳିପ ନିଜକୁ ନିଜେ କଟିକି ବାକ୍ସ ଭିତରକୁ ଚାଲିଯିବ।

କାନପୁର ଏଡିଏମ ଗତ ଗୁରୁବାର ଏସମ୍ପର୍କରେ ସାମ୍ବାଦିକଙ୍କୁ ଇଭିଏମ ଓ ଭିଭିପିଏଟିର ଡେମୋ ଦେଖାଇଛନ୍ତି। ତେବେ ଏହାଦ୍ବାରା ଭୋଟ ଦେବାର ସମୟ ଆଉ ଟିକେ ବଢିଯିବ। ଇଭିଏମରେ ଆଲଫା, ବିଟା ଓ ଗାମାର ପ୍ରତୀକତ୍ମକ ନିର୍ବାଚନୀ ଚିହ୍ନ ରହିଥିଲା। ପ୍ରାର୍ଥୀଙ୍କ ନାମ ରୂପରେ ୩ଟି ଏ, ୩ଟି ବି ଏବଂ ୩ଟି ସି ତିଆରି କରାଯାଇଥିଲା। ପ୍ରାର୍ଥୀ ଓ ନିର୍ବାଚନୀ ଚିହ୍ନ ସାମନାରେ ବଟନ ଚିପିବା ପରେ ଭିଭିପିଏଟିର ସ୍କ୍ରିନରେ ଆସିଥିବା ସ୍ଳିପ ଦେଖାଯାଇଥିଲା। ୭ ସେକେଣ୍ଡ ପରେ ଏହି ସ୍ଳିପ ନିଜକୁ ନିଜେ କଟି ବାକ୍ସ ଭିତରେ ପଡିଥିଲା। ଏହାପରେ ବିପ୍ ସାଉଣ୍ଡ ଆସିଥିଲା। ଯାହାକି ଆପଣଙ୍କ ଭୋଟ ଦିଆଯିବାକୁ ସୁନିଶ୍ଚିତ କରିଥାଏ।