ଅମରାବତୀ: ପୋଲିଂ ବୁଥରେ ଭୋଟରଙ୍କୁ ମାଡ଼ ମାରି ହଟହଟ୍ଟା ହୋଇଛନ୍ତି ବିଧାୟକ । ଆଗୁଆ ଭୋଟ ଦେବାକୁ ନେଇ ଓ୍ବାଇଏସଆର କଂଗ୍ରେସର ବିଧାୟକ ଧାଡ଼ିରେ ଥିବା ଜଣେ ଭୋଟରଙ୍କୁ ଚାପୁଡ଼ା ମାରିଥିଲେ। ଏହାର ପ୍ରତିଜବାବ ଦେବାକୁ ଯାଇ ଭୋଟର ଜଣଙ୍କ ବିଧାୟକଙ୍କ ଗାଲକୁ ଶକ୍ତ ଚାପୁଡ଼ାଟିଏ ମାରିଥିଲେ । ଏହା ପରେ ବିଧାୟକଙ୍କ ସମର୍ଥକ ଏବଂ ଭୋଟରଙ୍କ ମଧ୍ୟରେ ଧସ୍ତାଧସ୍ତି ଆରମ୍ଭ ହୋଇଥିଲା । ଏନେଇ ଏକ ଭିଡିଓ ଆନ୍ଧ୍ରପ୍ରଦେଶର ଗୁଣ୍ଟୁର ଜିଲ୍ଲାରୁ ସାମ୍ନାକୁ ଆସିଛି ।
ଆନ୍ଧ୍ର ପ୍ରଦେଶର ସମସ୍ତ ବିଧାନସଭା ଓ ଲୋକସଭା ଆସନ ପାଇଁ ଆଜି ମତଦାନ ହେଉଛି। ଭୋଟ ଦେବାକୁ ସକାଳୁ ଲୋକମାନେ ବିଭିନ୍ନ ବୁଥରେ ଲମ୍ବା ଧାଡ଼ି କରି ଛିଡ଼ା ହୋଇଛନ୍ତି। ସେହିଭଳି ଗୁଣ୍ଟୁରର ଗୋଟିଏ ପୋଲିଂ ବୁଥରେ କ୍ଷମତାସୀନ ୱାଇଏସ୍ଆର କଂଗ୍ରେସର ତେନାଲି ବଧାୟକ ଶିବକୁମାର ଭୋଟ ଦେବାକୁ ଆସିଥିଲେ । ଲୋକମାନେ ଲମ୍ବା ଧାଡ଼ିରେ ଛିଡ଼ା ହୋଇଥିବା ବେଳେ ଶିବକୁମାର ବିଧାୟକ ହୋଇଥିବାରୁ ଆଗୁଆ ପୋଲିଂ ବୁଥରେ ପଶିବାକୁ ଚେଷ୍ଟା କରିଥିଲେ । କିନ୍ତୁ ସାମ୍ନାରେ ଛିଡ଼ା ହୋଇଥିବା ଜଣେ ଭୋଟର ଏହାକୁ ବିରୋଧ କରିଥିଲେ । ଏଥିରେ ରାଗି ଯାଇ ଶିବକୁମାର ଉକ୍ତ ଭୋଟରଙ୍କ ପାଖକୁ ଆସିଥିଲେ ଓ ତାଙ୍କୁ ଶକ୍ତ ଚାପୁଡ଼ା ମାରିଥିଲେ ।
ଭୋଟର ଜଣଙ୍କ ମଧ୍ୟ ପାଲଟା ଜବାବରେ ବିଧାୟକଙ୍କୁ ଚାପୁଡ଼ା ମାରିଥିଲେ। ଏହା ଦେଖି ବିଧାୟକଙ୍କ ସମର୍ଥକମାନେ ଉକ୍ତ ଭୋଟରଙ୍କ ଉପରେ ଆକ୍ରମଣ କରିଥିଲେ । ବୁଥରେ ସେହି ସମୟରେ ଅନେକ ଲୋକ ଥିଲେ ମଧ୍ୟ କେହି ବି ବିଧାୟକଙ୍କ ସମର୍ଥକମାନଙ୍କୁ ଅଟକାଇ ନଥିଲେ । ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, କୌଣସି ସୁରକ୍ଷାକର୍ମୀ ବିଧାୟକଙ୍କ ସମର୍ଥକଙ୍କୁ ଅଟକାଇ ନଥିଲେ । ଭିଡିଓ ସାମ୍ନାକୁ ଆସିବା ପରେ ଅନେକ ଲୋକ ବିଧାୟକଙ୍କୁ ତୀବ୍ର ସମାଲୋଚନା କରିଛନ୍ତି। ସେହିପରି ୱାଇଏସ୍ଆର କଂଗ୍ରେସ ପରାସ୍ତ ହେବାକୁ ଯାଉଥିବାରୁ ଏଭଳି କାଣ୍ଡ ଘଟାଇଛି ବୋଲି ବିରୋଧୀ ଟିଡିପି ପକ୍ଷରୁ କୁହାଯାଇଛି ।