ଭୁବନେଶ୍ୱର ୨୫/୦୮: ଜନ୍ମାଷ୍ଟମୀ ଉପଲକ୍ଷେ ନିର୍ଦ୍ଦେଶକ ଅଶୋକ ପତି ଓ ପ୍ରଯୋଜକ ଅଜୟ ରାଉତ ପ୍ରସ୍ତୁତ କରୁଛନ୍ତି ‘ତୋ ବିନୁ ଅନ୍ୟ ଗତି ନାହିଁ’ । ୨୫ ତାରିଖରେ ତରଙ୍ଗ ଟିଭିରେ ପ୍ରସାରିତ ହେଉଥିବା ଏହି ଚିତ୍ରଟି ଈଶ୍ୱରଙ୍କ ଉପରେ ଆସ୍ଥା ଓ ବିଶ୍ୱାସ ଉପରେ ଆଧାରିତ । ଧନ ସମ୍ପତ୍ତିକୁ ନେଇ ଗର୍ବ କରୁଥିବା ମଣିଷ ଅନେକ ସମୟରେ ଈଶ୍ୱରଙ୍କ ଅସ୍ତିତ୍ୱକୁ ଅସ୍ୱୀକାର କରିଥାନ୍ତି । କିନ୍ତୁ ସମୟ ସେମାନଙ୍କୁ ବେଳେବେଳେ ଏଭଳି ମୋଡ଼ରେ ଠିଆ କରିଦିଏ ଯେ ସେମାନେ ବାଧ୍ୟ ହୋଇ ଈଶ୍ୱରଙ୍କ ସାମ୍ନାରେ ହାତ ପାତିଥାନ୍ତି । 

ଶ୍ରଦ୍ଧା ସେଭଳି ସ୍ୱଭାବର ଏକ ଝିଅ, ଯାହାକୁ ଉପଯୁକ୍ତ ଶିକ୍ଷା ଦେବାକୁ ସ୍ୱୟଂ ଭଗବାନ ଏକ ବିଚିତ୍ର ପରୀକ୍ଷାରେ ପକେଇ ଦେଇଛନ୍ତି । ସେଇ ପରୀକ୍ଷାକୁ ସାମ୍ନା କରୁ କରୁ ସେ ଦିନେ ତାକୁ ନିଜ ଚରିତ୍ର ଶ୍ରଦ୍ଧାରୁ ଅନ୍ୟ ଏକ ଦୁଃଖିଝିଅ ଗୀତା ଚରିତ୍ରରେ ପାଲଟିଯାଏ । ଶ୍ରଦ୍ଧାର ବିଳାସପୂର୍ଣ୍ଣ ଜୀବନଶୈଳୀ ଓ ଗୀତାର ଅଭାବି ସଂସାର ଉଭୟକୁ ଭୋଗି ସାରିଲା ପରେ ସେ ଈଶ୍ୱରଙ୍କ ପାଖରେ ନତମସ୍ତକ ହେବାକୁ ବାଧ୍ୟ ହୁଏ । ଶ୍ରଦ୍ଧାରୁ ଗୀତା ବନିବାର କାହାଣୀକୁ ଚିତ୍ରନାଟ୍ୟରେ ସଜେଇଛନ୍ତି ଦେବୀଦତ୍ତ ମହାନ୍ତି ଓ ସଂଳାପରେ ରୂପ ଦେଇଛନ୍ତି  ଚନ୍ଦନ କୁମାର । ଉଭୟ ଗୀତା ଓ ଶ୍ରଦ୍ଧା ଭୂମିକାକୁ ସୁନ୍ଦର ଭାବେ କରିଛନ୍ତି କୁକିଜ ଓ ଶ୍ରୀକୃଷ୍ଣ ଭୂମିକାରେ ଅଛନ୍ତି ଅମିତ । ଅନ୍ୟ  ମୁଖ୍ୟ ଚରିତ୍ରମାନଙ୍କରେ ଅଛନ୍ତି ସାନୁ, ତ୍ରିଭୁବନ, ଗୌରବ, ପ୍ରଦୀପ, କାଞ୍ଚନ, କୁନି ମିଶ୍ର ପ୍ରମୁଖ।