ଭୁବନେଶ୍ୱର,୨୪/୧୨: ଜମିରେ ଧାନ ପାଚି ଅମଳ ହେବାକୁ ବସିଲାଣି । ହେଲେ ଏ ପର୍ଯ୍ୟନ୍ତ ୧୬ ଜିଲ୍ଲାରେ ଖୋଲିପାରିନି ମଣ୍ଡି । ସେପଟେ ଏହି ଜିଲ୍ଲାଗୁଡ଼ିକରେ ଧାନ ବିକିବା ପାଇଁ ପାଖାପାଖି ୪ ଲକ୍ଷ ଚାଷୀ ପଞ୍ଜୀକରଣ କରିଛନ୍ତି । କେବେ ଖୋଲିବ ମଣ୍ଡି, କେବେ ବିକିବେ ଧାନ ଅପେକ୍ଷା କରିଛନ୍ତି । ତେବେ ଏହି ଦାୟିତ୍ୱ ଜିଲ୍ଲା ପ୍ରଶାସନକୁ ଦିଆଯାଇଥିଲେ ବି ଅହେତୁକ ବିଳମ୍ବ ଯୋଗୁଁ ଚାଷୀ ଏବେ ଚିନ୍ତାରେ । ତା ସାଙ୍ଗକୁ ଅଦିନିଆ ବର୍ଷା ଏବେ ଚାଷୀକୁଳକୁ ହତାଶ କରିଦେଇଛି । ବର୍ଷ ଯାକ କଷ୍ଟ କରି ଅମଳ କରିଥିବା ଧାନ ମଣ୍ଡିରେ ବିକ୍ରି ନ କରି ନଷ୍ଟ ହେବା ଆଶଙ୍କାରେ ଚାଷୀ ଗୁମୁରି କାନ୍ଦୁଛି । ଅନୁଗୁଳ, ବାଲେଶ୍ୱର, ଭଦ୍ରକ, କଟକ, ଢ଼େଙ୍କାନାଳ, ଗଜପତି, ଗଞ୍ଜାମ, ଜଗତସିଂହପୁର, ଯାଜପୁର, କନ୍ଧମାଳ, କେନ୍ଦ୍ରାପଡ଼ା, ଖୋର୍ଦ୍ଧା, ମୟୂରଭଞ୍ଜ, ନୟାଗଡ଼, ପୁରୀ ଓ ରାୟଗଡ଼ା ଜିଲ୍ଲାରେ ମଣ୍ଡି ଖୋଲିନି । ସେଠାରେ କେହି ଧାନ ବିକ୍ରି କରିନାହାନ୍ତି ବୋଲି ରାଜ୍ୟ ଯୋଗାଣ ବିଭାଗର ‘ଫୁଡ୍ ଓଡ଼ିଶା ପୋର୍ଟାଲ’ରେ ସ୍ପଷ୍ଟ ସୂଚନା ଦିଆଯାଇଛି ।
ବାଲେଶ୍ୱର ଜିଲ୍ଲାରେ ଆସନ୍ତା ୨୭ରେ ମଣ୍ଡି ଖୋଲିବ । ହେଲେ ଏହା ପଶ୍ଚିମବଙ୍ଗର ସୀମାକୁ ଲାଗିଥିବାରୁ ଚାଷୀମାନେ ବାହାର ରାଜ୍ୟର ବ୍ୟବସାୟୀଙ୍କୁ ଧାନ ବିକିବା ଆରମ୍ଭ କଲେଣି । ବିଶେଷ କରି ଜଳେଶ୍ୱର ଓ ଚନ୍ଦନେଶ୍ୱରର ଚାଷୀମାନେ ପଶ୍ଚିମବଙ୍ଗ ବ୍ୟବସାୟୀଙ୍କୁ ଅଳ୍ପ ଦାମରେ ଧାନ ବିକ୍ରି କରିବାକୁ ବାଧ୍ୟ ହେଉଛନ୍ତି । ଭଦ୍ରକରେ ମଧ୍ୟ ୨୭ ତାରିଖରେ ମଣ୍ଡି ଖୋଲିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି । ଫଳରେ ବହୁ ଚାଷୀ ମଣ୍ଡି ଖୋଲିବା ପର୍ଯ୍ୟନ୍ତ ଅପେକ୍ଷା ନ କରି ଏବେ ସ୍ଥାନୀୟ ସାହୁକାର କିମ୍ବା ଆଞ୍ଚଳିକ ବ୍ୟବସାୟୀଙ୍କୁ କମ ଦାମରେ ଧାନ ବିକ୍ରି କରୁଛନ୍ତି । ଯାଜପୁରରେ ତ ଜାନୁଆରୀ ୭ରୁ ମଣ୍ଡି ଖୋଲିବାକୁ ସ୍ଥାନୀୟ ପ୍ରଶାସନ ନିଷ୍ପତ୍ତି ନେଇଛି । ସୁନ୍ଦରଗଡ଼ରେ ୨୦ରେ ମଣ୍ଡି ଖୋଲିଥିଲେ ବି ଏ ପର୍ଯ୍ୟନ୍ତ ମାତ୍ର ୯ଜଣ ଚାଷୀ ୩୩୨ କ୍ୟୁଣ୍ଟାଲ୍ ଧାନ ବିକ୍ରି କରିଥିବା ବିଭାଗୀୟ ପୋର୍ଟାଲ୍ ଦର୍ଶାଉଛି । କନ୍ଧମାଳ ଜିଲ୍ଲାରେ ମଧ୍ୟ ମଙ୍ଗଳବାରରୁ ଧାନ ମଣ୍ଡି ଖୋଲିବାକୁ ସ୍ଥାନୀୟ ପ୍ରଶାସନ ନିଷ୍ପତ୍ତି ନେଇଛି । ଏଭଳି କିଛି ଜିଲ୍ଲାର ସ୍ଥିତିରୁ ମଣ୍ଡି ପରିଚାଳନା କିଭଳି ଚାଲିଛି, ତାହା ସ୍ପଷ୍ଟ ବାରି ହେଉଛି ।
ଅପରପକ୍ଷେ ୩୦ଟି ଜିଲ୍ଲାରେ ପାଖାପାଖି ୧୩ ଲକ୍ଷ ୪୫ ହଜାର ଚାଷୀ ମଣ୍ଡିରେ ଧାନ ବିକ୍ରି କରିବାକୁ ଯୋଗ୍ୟ ବିବେଚିତ ହୋଇଛନ୍ତି । ୫୦୨ ପ୍ରାଥମିକ କୃଷି ସମବାୟ ସମିତି(ପାକ୍ସ), ୧୬୨ ସ୍ୱୟଂ ସହାୟକ ଗୋଷ୍ଠୀ(ଏସଏଚଜି) ଓ କିଛି ସ୍ଥାନରେ ପାଣି ପଞ୍ଚାୟତଗୁଡ଼ିକୁ ମଣ୍ଡିରେ ଧାନ ସଂଗ୍ରହ ଦାୟିତ୍ୱ ଦିଆଯାଇଛି । ତେବେ ବରଗଡ଼ ଜିଲ୍ଲାରେ ସର୍ବାଧିକ ୧ ଲକ୍ଷ ୫୩ ହଜାର ୩୮୧ ଚାଷୀ ଧାନ ବିକିବାକୁ ପଞ୍ଜୀକରଣ କରିଛନ୍ତି । ଏବେ ସୁଦ୍ଧା ୬୨ ହଜାରରୁ ଅଧିକ ଚାଷୀ ଧାନ ବିକ୍ରି କରି ସାରିଲେଣି । ୨୮ ଲକ୍ଷ ୪୫ ହଜାର କ୍ୟୁଣ୍ଟାଲ ଧାନ ସଂଗ୍ରହ ହୋଇସାରିଛି । ତେବେ ନୂଆ ସରକାର ଆସିବା ପରେ ଚାଷୀଙ୍କଠୁ କୁଇଣ୍ଟାଲ ୩୧ଶହ ଟଙ୍କାରେ ଧାନ କିଣିବେ ବୋଲି ଘୋଷଣା କରିଥିଲେ । ଧାନର ସର୍ବନିମ୍ନ ସହାୟକ ମୂଲ୍ୟ ୨୩ଶହ ଟଙ୍କା ଥିବା ବେଳେ ରାଜ୍ୟ ସରକାର କୁଇଣ୍ଟାଲ ପିଛା ୮ଶହ ଟଙ୍କା ବୋନସ୍ ଭାବେ ଦେଉଛନ୍ତି । ତେଣୁ ଚାଷୀମାନେ ମଣ୍ଡିରେ ଧାନ ବିକ୍ରି କରିବାକୁ ବେଶ ଉତ୍ସାହିତ ହୋଇ ପଡ଼ିଥିଲେ । ମାତ୍ର ମଣ୍ଡି ଖୋଲିବାରେ ଅହେତୁକ ବିଳମ୍ବ ଏବେ ଚାଷୀଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି।
