ନୂଆଦିଲ୍ଲୀ,୨୯/୦୪: ପୁଞ୍ଜି ବଜାର ନିବେଶକଙ୍କ ସଂଖ୍ୟା ଦ୍ରୁତ ବେଗରେ ବୃଦ୍ଧି ପାଉଛି । ଲୋକଙ୍କ ମଧ୍ୟରେ ନିବେଶ ଟ୍ରେଣ୍ଡ୍ ବଢୁଛି । ସେୟାର ବଜାରକୁ ତ୍ୱରାନ୍ୱିତ କରିବାରେ ତଥା ବଜାରରେ ସ୍ଥାୟିତ୍ୱ ଆଣିବାରେ ରିଟେଲ ନିବେଶକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି । ତେବେ ଏମାନଙ୍କ ସଂଖ୍ୟା ବର୍ଷକରେ ୪.୦୩ କୋଟି ବା ୩୧.୨୩% ବୃଦ୍ଧି ପାଇଥିବା ଏକ ରିପୋର୍ଟରୁ ଜଣାପଡ଼ିଛି ।
ଛୋଟ ସହରଗୁଡ଼ିକରେ ଲୋକେ ପୁଞ୍ଜି ବଜାରରେ ବଡ଼ ଆକାରରେ ନିବେଶ କରୁଥିବା ରିପୋର୍ଟରୁ ଜଣାପଡ଼ିଛି । ଉପରୋକ୍ତ ୪ କୋଟି ନୂଆ ନିବେଶକଙ୍କ ମଧ୍ୟରୁ ୧.୨୮ କୋଟି(୩୨.୧୬%) ନୂଆ ନିବେଶକ ବିହାର, ମଧ୍ୟ ପ୍ରଦେଶ, ରାଜସ୍ଥାନ ଏବଂ ଉତ୍ତର ପ୍ରଦେଶରୁ ଯୋଡ଼ି ହୋଇଛନ୍ତି । ଏଗୁଡ଼ିକ ହେଉଛି ଉକ୍ତ ରାଜ୍ୟ, ଯେଉଁମାନଙ୍କୁ ଆର୍ଥିକ ଦୃଷ୍ଟିରୁ ପଛୁଆ ଭାବେ ଗଣନା କରାଯାଇ ‘ରୁଗ୍ଣ’ ଶ୍ରେଣୀଭୁକ୍ତ କରାଯାଇଛି ।
ତେବେ ଆଶ୍ଚର୍ଯ୍ୟର ବିଷୟ ହେଉଛି ଉପରୋକ୍ତ ରାଜ୍ୟଗୁଡ଼ିକ ତୁଳନାରେ ସମୃଦ୍ଧ ମାନ୍ୟତା ହାସଲ କରିଥିବା ରାଜ୍ୟ ଯେପରି ତାମିଲନାଡୁ, କର୍ଣ୍ଣାଟକ, କେରଳ ଏବଂ ତେଲଙ୍ଗାନାରେ କେବଳ ୫୨.୧୦ ଲକ୍ଷ(୧୨.୯୨%) ରିଟେଲ ନିବେଶକ ବଢ଼ିଛନ୍ତି । ଉତ୍ତର ପ୍ରଦେଶରେ ଏବେ ମୋଟ ନିବେଶକଙ୍କ ସଂଖ୍ୟା ବଢ଼ି ୧.୮୧ କୋଟି ହୋଇଛି । ସେହିଭଳି ଏହା ଗୁଜରାଟକୁ ପଛରେ ପକାଇ ମହାରାଷ୍ଟ୍ର ପରେ ଦେଶର ଦ୍ୱିତୀୟ ବୃହତ୍ ସେୟାର ବଜାର ନିବେଶକବହୁଳ ରାଜ୍ୟ ପାଲଟିଛି । ମହାରାଷ୍ଟ୍ରରେ ମୋଟ ୩.୧୯ କୋଟି ନିବେଶକ ଅଛନ୍ତି । ସେହିଭଳି ଗୁଜରାଟରେ ସେୟାର ବଜାର ନିବେଶକଙ୍କ ସଂଖ୍ୟା ୧.୬୦ କୋଟି ରହିଛି ।
ଦେଶର ସମୃଦ୍ଧ ରାଜ୍ୟ ଭାବେ ପରିଗଣିତ କେରଳରେ ଗତ ବର୍ଷକରେ ମାତ୍ର ୭.୦୮ ଲକ୍ଷ ନିବେଶକ ବଢ଼ିଛନ୍ତି । ସେହିଭଳି କର୍ଣ୍ଣାଟକରେ ଗତ ବର୍ଷକରେ ୧୯.୦୨ ଲକ୍ଷ ନୂଆ ନିବେଶକ ସେୟାର ବଜାରରେ ଯୋଡ଼ି ହୋଇଛନ୍ତି । ମହାରାଷ୍ଟ୍ରରେ ଏ ସଂଖ୍ୟା ୬୨.୬୪ ଲକ୍ଷ ରହିଛି ।
୩ ବର୍ଷରେ ଡିମାଟ୍ ଆକାଉଣ୍ଟ ସଂଖ୍ୟା ୩ ଗୁଣାରୁ ଅଧିକ ହୋଇଯାଇଛି । ୨୦୨୧ରେ ଏହା ୫.୪ କୋଟି ଥିବାବେଳେ ଏବେ ୧୬.୯୬ କୋଟିକୁ ବୃଦ୍ଧି ପାଇଛି । ମେହେଟ୍ଟା ଇକ୍ୱିଟିଜ୍ର ନିର୍ଦ୍ଦେଶକ ପ୍ରଶାନ୍ତ ବଂଶାଳୀ କହିଛନ୍ତି ଯେ, ଆଗାମୀ ୧୨ ମାସରେ ଏହା ୨୦ କୋଟିକୁ ବଢ଼ିପାରେ ।
ଗତ ବର୍ଷକରେ ସେନ୍ସେକ୍ସରେ ୨୦% ବୃଦ୍ଧି ଘଟିଛି । ୨୦୨୩ ଏପ୍ରିଲ ୨୮ରେ ଏହା ୬୧,୧୧୨ ପଏଣ୍ଟରେ ଥିଲା, ଯାହା ଏବେ ୭୩,୭୩୦ ପଏଣ୍ଟରେ ପହଞ୍ଚିଛି । ବିଶେଷଜ୍ଞଙ୍କ ଅନୁସାରେ, ଆଗାମୀ ଦିନରେ ଏଥିରେ ବୃଦ୍ଧି ଧାରା ଜାରି ରହିବ ।
