ଆଜମେର, ୨୧।୮: ଦେଶର ସବୁଠୁ ବଡ଼ ସେକ୍ସ ସ୍କାଣ୍ଡାଲ ଭାବେ ଜଣା ରାଜସ୍ଥାନ ଆଜମେର ଘଟଣାରେ ୬ ଦୋଷୀଙ୍କୁ ଜିଲ୍ଲା ଅଦାଲତ ମଙ୍ଗଳବାର ଆଜୀବନ ଜେଲ ଦଣ୍ଡାଦେଶ ଦେଇଛନ୍ତି । ଏଥିସହ ସେମାନଙ୍କ ଉପରେ ୫ ଲକ୍ଷ ଟଙ୍କା ଲେଖାଏ ଜରିମାନା ଲଗାଯାଇଛି । ଆଜୀବନ ଜେଲଦଣ୍ଡ ପାଇଥିବା ଦୋଷୀମାନେ ହେଲେ ନଫିସ୍‌ ଚିସ୍ତି(୫୪), ନସୀମ ଓରଫ୍‌ ତାର୍ଜନ(୫୫), ସଲିମ ଚିସ୍ତି (୫୫), ଇକବାଲ୍‌ ଭାଟି(୫୨), ସୋହିଲ ଗନି (୫୩) ଏବଂ ସୟଦ ଜମିର ହୁସେନ(୬୦) । ଦଣ୍ଡାଦେଶ ବେଳେ ସଭିଏ କୋର୍ଟରେ ଉପସ୍ଥିତ ଥିଲେ । ଘଟଣାବେଳେ ସଭିଁଙ୍କ ବୟସ ୨୦ରୁ ୨୮ ବର୍ଷ ରହିଥିଲା । ଏହି ମାମଲାରେ ୧୮ ଜଣ ଦୋଷୀ ଥିବାବେଳେ ୯ ଜଣଙ୍କୁ ପୂର୍ବରୁ ଦଣ୍ଡାଦେଶ ହୋଇସାରିଛି । ଆଉ ଜଣେ ଦୋଷୀ ଅନ୍ୟ ଏକ ମାମଲାରେ ଜେଲରେ ବନ୍ଦୀ ରହିଛି । ଜଣେ ସୁଇସାଇଡ୍‌ କରିଥିବାବେଳେ ଅନ୍ୟ ଜଣେ ଅଦ୍ୟାବଧି ଫେରାର ଅଛି । ୧୯୯୨ରେ ଶହେରୁ ଊଦ୍ଧ୍ୱର୍ କଲେଜ ଛାତ୍ରୀଙ୍କୁ ଗଣ ଦୁଷ୍କର୍ମ କରାଯିବା ସହ ସେମାନଙ୍କ ଅଶ୍ଳୀଳ ଫଟୋ ଭାଇରାଲ କରାଯାଇଥିଲା । 

ଏପରିକି ଫଟୋ ପ୍ରିଣ୍ଟ ଏବଂ ଜେରକ୍ସ ବାହାର କରାଯାଇ ତାହାକୁ ସର୍କୁଲେଟ କରାଯାଇଥିଲା । ଏହାକୁ ନେଇ ଦେଶବ୍ୟାପୀ ହଇଚଇ ସୃଷ୍ଟି ହୋଇଥିଲା । ପୀଡ଼ିତାଙ୍କ ମଧ୍ୟରୁ କେତେଜଣ ଆତ୍ମହତ୍ୟା କରିଦେଇଥିଲେ । ସେତେବେଳେ ମାମଲା ସିଆଇଡି-ସିବିକୁ ହସ୍ତାନ୍ତର କରାଯାଇଥିଲା । ଆଜମେରର ବିଭିନ୍ନ ସ୍କୁଲ, କଲେଜରେ ପଢ଼ୁଥିବା ୧୭ରୁ ୨୦ ବର୍ଷୀୟ ଶହେରୁ ଊର୍ଦ୍ଧ୍ୱ ଛାତ୍ରୀଙ୍କୁ ଫସାଇ ସେମାନଙ୍କ ଅଶ୍ଳୀଳ ଫଟୋ ଉଠାଇ ଅପରାଧୀମାନେ ବ୍ଲାକମେଲ କରିଥିଲେ । ଏଥିରେ ଅନେକ ଧନୀ ବ୍ୟକ୍ତି ସମ୍ପୃକ୍ତ ଥିଲେ । ଜଣେ ବ୍ୟବସାୟୀଙ୍କ ପୁଅକୁ ଅପରାଧୀମାନେ ସାଙ୍ଗ କରି ଫସାଇବା ପରେ ତାଙ୍କ ସହ ଅପ୍ରାକୃତିକ ଯୌନକ୍ରିୟା କରିଥିଲେ । ଏହାର ଫଟୋ ମଧ୍ୟ ଉଠାଇଥିଲେ । ଫଟୋ ଜରିଆରେ ବ୍ୟବସାୟୀଙ୍କ ପୁଅଙ୍କୁ ବ୍ଲାକ୍‌ମେଲ କରି ତାଙ୍କ ପ୍ରେମିକାଙ୍କୁ ଆଣିବାକୁ ଧମକାଇଥିଲେ । ପରେ ତାଙ୍କ ପ୍ରେମିକା ତାଙ୍କ ବାନ୍ଧବୀଙ୍କୁ ଫସାଇବା ଲାଗି ଅପରାଧୀମାନେ ବ୍ଲାକମେଲ କରିଥିଲେ । ଅଶ୍ଳୀଳ ଫଟୋ ଭାଇରାଲ କରିବାକୁ ଧମକ ଦେଇ ପୀଡ଼ିତାଙ୍କ ସାଙ୍ଗସାଥୀଙ୍କ ସହ ମଧ୍ୟ ବଳାତ୍କାର କରିଥିଲେ । ଏପରିକି ଅଶ୍ଳୀଳ ଫଟୋର ଜେରକ୍ସ ପାଇଥିବା କେତେଜଣ ଅପରାଧୀ ମଧ୍ୟ ସମ୍ପୃକ୍ତ ଛାତ୍ରୀଙ୍କୁ ବ୍ଲାକ୍‌ମେଲ କରି ଦୁଷ୍କର୍ମ କରିଥିଲେ ।