ପାଟନା ୨୭/୦୧: ବିହାରରେ ଆଇଏଏସ୍ ଓ ଆଇପିଏସ୍ ଅଧିକାରୀ ସ୍ତରରେ ବଡ଼ ଧରଣ ଅଦଳବଦଳ। ରାଜନୈତକ ହଟଚମଟ ମଧ୍ୟରେ ବିହାର ସରକାର ଏହି ବଦଳି କରିଛନ୍ତି। ୨୨ IAS ଓ ୭୯ IPS ଅଧିକାରୀଙ୍କୁ ଅଦଳବଦଳ କରାଯାଇଛି। ଯେଉଁଥିରେ ପାଟନା ସହିତ ୫ ଜିଲ୍ଲାର ଜିଲ୍ଲାପାଳଙ୍କ ବଦଳି ହୋଇଥିବା ବିଜ୍ଞପ୍ତି ପ୍ରକାଶ ପାଇଛି।
ସୂଚନା ମୁତାବିକ, ଲୋକସଭା ନିର୍ବାଚନ ପୂର୍ବରୁ ବିହାର ରାଜନୀତି କଡ଼ ଲେଉଟାଇବା ଆରମ୍ଭ କଲାଣି । କେଉଁ ମୁହୂର୍ତ୍ତରେ କ’ଣ ହେବ କିଛି କହିହେଉ ନାହିଁ । କୁହାଯାଉଛି ଯେ ଜେଡିୟୁ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନୀତୀଶ କୁମାର ପୁଣି ଆର୍ଜେଡିଠାରୁ ସମ୍ପର୍କ ତୁଟାଇ ମେଣ୍ଟ ଭାଙ୍ଗିଦେଇ ପାରନ୍ତି । ଏହା ଭିତରେ ଶୁକ୍ରବାର ବିହାର ପ୍ରଶାସନିକ ସ୍ତରରେ ବଡ଼ ଧରଣ ଅଦଳବଦଳ ନେଇ ବିଜ୍ଞପ୍ତି ପ୍ରକାଶ ପାଇଛି।
୫ ଜିଲ୍ଲାପାଳଙ୍କ ସହିତ ୨୨ ଆଇଏଏସ୍ ଅଧିକାରୀ ଏବଂ ବିହାର ପ୍ରଶାସନିକ ସେବାର ୪୫ ଜଣ ଅଧିକାରୀଙ୍କୁ ବଦଳି କରାଯାଇଛି। ସେହିପରି ୭୯ ଜଣ ଆଇପିଏସ୍ ଅଧିକାରୀଙ୍କୁ ଅଦଳବଦଳ କରାଯାଇଛି।
ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ ୨୦୧୦ ବ୍ୟାଚ୍ ଭାରତୀୟ ପ୍ରଶାସନିକ ସେବା (ଆଇଏଏସ୍) ଅଧିକାରୀ ତଥା ପାଟନା ଜିଲ୍ଲା ଜିଲ୍ଲାପାଳ ଚନ୍ଦ୍ରଶେଖର ସିଂଙ୍କୁ ମୁଖ୍ୟ ଶାସନ ସଚିବଙ୍କ ସ୍ୱତନ୍ତ୍ର ସଚିବ ପଦକୁ ସ୍ଥାନାନ୍ତର କରାଯାଇଛି। ସେହିପରି ୨୦୧୧ ବ୍ୟାଚ୍ ଆଇଏଏସ୍ ଅଧିକାରୀ ଶିର୍ଷତ କପିଲ ଅଶୋକଙ୍କୁ ପାଟନାର ନୂତନ ଜିଲ୍ଲାପାଳ ଭାବରେ ନିଯୁକ୍ତ କରାଯାଇଛି।