ମୁମ୍ବାଇ,୨୯/୧ : ୬୯ତମ ଫିଲ୍ମ ଫେୟାର ଆଓ୍ବାର୍ଡ଼ ଚଳିତ ବର୍ଷ ଗୁଜୁରାଟର ଗାନ୍ଧୀନଗରରେ ଆୟୋଜିତ ହୋଇଥିଲା । ଏଥିରେ ଆଲିୟା ଭଟ୍ଟ ଏବଂ ରଣବୀର କପୁରଙ୍କୁ ବେଷ୍ଟ ଅଭିନେତା- ଅଭିନେତ୍ରୀର ଆଓ୍ବାର୍ଡ ମିଳିଛି । ସେହିଭଳି ବିକ୍କି କୌଶଲଙ୍କୁ ବେଷ୍ଟ ସପୋର୍ଟିଂ ଅଭିନେତାର ଆଓ୍ବାର୍ଡ଼ ମିଳିଛି । ୨୦୨୩ରେ ଆସିଥିବା ଫିଲ୍ମରେ ନିଜ ନିଜର ପରଫର୍ମାନ୍ସକୁ ନେଇ ଅଭିନେତାଙ୍କୁ ଭିନ୍ନ ଭିନ୍ନ କ୍ୟାଟେଗୋରୀରେ ଆଓ୍ବାର୍ଡ୍ସ ମିଳିଛି । ଏହା ପୂର୍ବରୁ ୬୮ଫିଲ୍ମ ଫେୟାର ଆଓ୍ବାର୍ଡ୍ସ ହୋଇସାରିଛି, ଯେଉଁଥିରେ କେତେକ ଅଭିନେତା-ଅଭିନେତ୍ରୀଙ୍କ ନିକଟରେ ସବୁଠାରୁ ଅଧିକ ଫିଲ୍ମ ଫେୟାର ଆଓ୍ବାର୍ଡ୍ସ ରହିଛି ।
୧୯୫୪ରେ ପ୍ରଥମ ଫିଲ୍ମଫେୟର ଆଓ୍ବାର୍ଡ଼ ହୋଇଥିଲା ଯାହାକୁ ମୁମ୍ବାଇର ମେଟ୍ରୋ ଥିଏଟରରେ ଆୟୋଜିତ କରାଯାଇଥିଲା । ଏଥିରେ ବେଷ୍ଟ ଫିଲ୍ମ, ବେଷ୍ଟ ନିର୍ଦେଶକ, ବେଷ୍ଟ ଅଭିନେତା, ବେଷ୍ଟ ଅଭିନେତ୍ରୀ ଏବଂ ବେଷ୍ଟ ମ୍ୟୁଜିକ ଡାଇରେକ୍ଟରର କ୍ୟାଟେଗୋରୀ ଥିଲା। ମାତ୍ର ଆଜିର ସମୟରେ ଫିଲ୍ମଫେୟାରରେ ବହୁ କ୍ୟାଟେଗୋରୀକୁ ସାମିଲ କରାଯାଇଛି । ହିନ୍ଦୀ ସିନେମାରେ କେଉଁ ଅଭିନେତା ଏବଂ ଅଭିନେତ୍ରୀଙ୍କୁ ଅଧିକ ଫିଲ୍ମଫେୟାର ଆଓ୍ବାର୍ଡ ମିଳିଛି ଚାଲନ୍ତୁ ଏହା ବିଷୟରେ ଜାଣିବା ।
ଦିଲୀପ କୁମାର
ଦିଲୀପ କୁମାର ନିଜ ଫିଲ୍ମ କ୍ୟାରିୟର ୧୯୪୪ରେ ଆରମ୍ଭ କରିଥିଲେ । ସେହିଭଳି ୧୯୯୮ରେ ଆସିଥିବା ଫିଲ୍ମ କିଲା ତାଙ୍କର ଶେଷ ଫିଲ୍ମ ଥିଲା । ଦିଲୀପ କୁମାର ନିଜ ଫିଲ୍ମ କ୍ୟାରିୟରରେ ୫୦ରୁ ଅଧିକ ଫିଲ୍ମରେ କାମ କରିଛନ୍ତି । ସେ ବେଷ୍ଟ ଆକ୍ଟର କ୍ୟାଟେଗୋରୀରେ ୮ଫିଲ୍ମ ଫେୟାର ଆଓ୍ବାର୍ଡ଼ ଜିତିଛନ୍ତି ।
ଶାହରୁଖ ଖାନ
ବଲିଉଡ଼ ଷ୍ଟାର ଶାହରୁଖ ଖାନ ୧୯୯୨ରେ ଫିଲ୍ମ ଦିଓ୍ବାନା ମାଧ୍ୟମରେ ନିଜ କ୍ୟାରିୟର ଆରମ୍ଭ କରିଥିଲେ । କିଙ୍ଗ ଖାନ ନାଁରେ ମଶହୁର ଶାହରୁଖ ଏବେ ବି ଲିଡ୍ ଆକ୍ଟର ଭାବେ ଫିଲ୍ମରେ ଆକ୍ଟିଭ ଅଛନ୍ତି । ଏବେ ପର୍ଯ୍ୟନ୍ତ ଶାହରୁଖ ବେଷ୍ଟ ଆକ୍ଟର ଲାଗି ୮ଥର ଫିଲ୍ମ ଫେୟାର ଆଓ୍ବାର୍ଡ଼ ଜିତିଛନ୍ତି ।
ଅମିତାଭ ବଚ୍ଚନ
ବଲିଉଡ଼ର ମହାନାୟକ ଅମିତାଭ ବଚ୍ଚନ ୧୯୬୯ରେ ଫିଲ୍ମ ସାତ ହିନ୍ଦୁସ୍ତାନୀରେ ନିଜ କ୍ୟାରିୟର ଆରମ୍ଭ କରିଥିଲେ । ଏହି ବର୍ଷରୁ ସେ କେତେକ ଫିଲ୍ମ କରିଛନ୍ତି ଏବଂ ୮୦ବର୍ଷରେ ବି ସେ ଫିଲ୍ମରେ ଆକ୍ଟିଭ ଅଛନ୍ତି । ଏବେ ପର୍ଯ୍ୟନ୍ତ ଆକ୍ଟର କ୍ୟାଟେଗୋରୀ ଲାଗି ବିଗ୍ ବି ୫ଫିଲ୍ମ ଫେୟାର ଆଓ୍ବାର୍ଡ଼ ଜିତିଛନ୍ତି ।
କାଜୋଲ
ଅଭିନେତ୍ରୀ କାଜୋଲ ୧୯୯୨ରେ ଫିଲ୍ମ ବେଖୁଦୀରୁ ନିଜ କ୍ୟାରିୟର ଆରମ୍ଭ କରିଥିଲେ । ଫିଲ୍ମରେ କାଜୋଲ ଏବେ ବି ଆକ୍ଟିଭ ଅଛନ୍ତି ଏବଂ ଏବେ ଓଟିଟିରେ ବି ଡେବ୍ୟୁ କରିସାରିଛନ୍ତି । କାଜୋଲଙ୍କୁ ତାଙ୍କ ଆକ୍ଟିଂ ପରଫର୍ମାନ୍ସ ପାଇଁ ୬ଥର ଫିଲ୍ମ ଫେୟାର ଆଓ୍ବାର୍ଡ଼ ମିଳିସାରିଛି ।
ନୂତନ
୫୦ଦଶକର ଲୋକପ୍ରିୟ ଅଭିନେତ୍ରୀ ନୂତନ ନିଜ ନାଁରେ ୫ଫିଲ୍ମ ଫେୟାର ଆଓ୍ବାର୍ଡ଼ କରିଥିଲେ ଏବଂ ତାଙ୍କର ଏହି ରେକର୍ଡ଼କୁ ତାଙ୍କ ଭାଣିଜୀ କାଜୋଲ ଭାଙ୍ଗିଛନ୍ତି । ଏହି ସମୟରେ ନୂତନ ସମସ୍ତଙ୍କ ମନ ପସନ୍ଦର ଅଭିନେତ୍ରୀ ଭାବେ ଥିଲେ, ଯାହାଙ୍କ ପୁଅ ମୋହନୀଷ ବହଲ ଅଟନ୍ତି ।
ଆଲିୟା ଭଟ୍ଟ
ବଲିଉଡ଼ ଅଭିନେତ୍ରୀ ଆଲିୟା ଭଟ୍ଟଙ୍କୁ ନିକଟରେ ଫିଲ୍ମ ରକି ଏବଂ ରାନୀର ପ୍ରେମ କାହାଣୀ ଲାଗି ବେଷ୍ଟ ଅଭିନେତ୍ରୀର ଆଓ୍ବାର୍ଡ଼ ମିଳିଛି । ଏହି ଆଓ୍ବାର୍ଡ଼କୁ ମିଶାଇ ଆଲିୟାଙ୍କ ପାଖରେ ଏବେ ପର୍ଯ୍ୟନ୍ତ ୫ଫିଲ୍ମ ଫେୟାର ଆଓ୍ବାର୍ଡ଼ ହୋଇଯାଇଛି ।
ସୂଚନାଯୋଗ୍ୟ ଯେ, ହ୍ରିତିକ ରୋଶନଙ୍କୁ ୪, ରଣବୀର କପୁର ୪, ଅମିର ଖାନ ୩, ନସୀରୁଦ୍ଦିନ ଶାହ ୩, ରାଜେଶ ଖନ୍ନା ୩, ଦେବ ଆନନ୍ଦ ୨ ଏବଂ ଇରଫାନ ଖାନ ୧ଫିଲ୍ମ ଫେୟାର ଆଓ୍ବାର୍ଡ଼ ବେଷ୍ଟ ଅଭିନେତା ଲାଗି ଜିତିଛନ୍ତି । ସେହିଭଳି ଜୟା ବଚ୍ଚନ ୪, ମୀନା କୁମାରୀ ୪, ମାଧୁରୀ ଦିକ୍ଷୀତ ୪, ଶବାନା ଆଜମୀ ୪, ବୈଜନ୍ତୀମାଳା ୩, ବିଦ୍ୟା ବାଲନ ୩, ଦୀପିକା ପାଦୁକୋନ ୩ ଏବଂ ଐଶର୍ଯ୍ୟା ରାୟ ୨ଥର ବେଷ୍ଟ ଅଭିନେତ୍ରୀ ଲାଗି ଆଓ୍ବାର୍ଡ଼ ଜିତିଛନ୍ତି ।
