କୋରାପୁଟ,୧୧/୧୧: ମିଶନ ଶକ୍ତି ଜରିଆରେ କୁଟୀର ଶିଳ୍ପ ପ୍ରତିଷ୍ଠା ପାଇଁ ଏସ୍ଏଚ୍ଜିଙ୍କୁ ପ୍ରୋତ୍ସାହନ ଦେଉଛନ୍ତି ରାଜ୍ୟ ସରକାର । ତେଣୁ ମାଟି ତିଆରି ସାମଗ୍ରୀକୁ ମଧ୍ୟ ଏସ୍ଏଚ୍ଜିରୁ ଏସ୍ଏମ୍ଇ ଯୋଜନାରେ ସାମିଲ୍ କରିବାକୁ କୁମ୍ଭାର ସମ୍ପ୍ରଦାୟ ପକ୍ଷରୁ ଦାବି କରାଯାଇଛି । କେତେକ କୁମ୍ଭକାର କହିଛନ୍ତି, ପାର୍ବଣରେ ପରମ୍ପରା ଅନୁଯାୟୀ ମାଟି ଦୀପ ଖୋଜାପଡ଼େ । ଦୀପାବଳିରେ ଏହି ଦୀପ ପରମ୍ପରାର ମୂକସାକ୍ଷୀ ହୋଇଥାଏ । ବଜାରକୁ ଯେତେ ବିଦେଶୀ ଲାଇଟ୍ ଆସିଲେ ବି ପୂଜାର୍ଚ୍ଚନାରେ ମାଟି ଦୀପ ହିଁ ବ୍ୟବହାର ହୁଏ । ତେଣୁ ମାଟି ତିଆରି ସାମଗ୍ରୀକୁ କୁଟୀର ଶିଳ୍ପର ମାନ୍ୟତା ପ୍ରଦାନ ସହ ରାଜ୍ୟ ସରକାର ପ୍ରୋତ୍ସାହନ ଯୋଗାଇ ଦିଅନ୍ତୁ ।
କୋରାପୁଟ ବ୍ଲକର ଝଡିଗୁଡ଼ା ଓ କୁମ୍ଭାରଲିଙ୍କାକୁ କୁମ୍ଭାରଙ୍କ ଗାଁ ବୋଲି କୁହାଯାଏ । ଏଠାରେ ବସବାସ କରୁଥିବା ୯୦ପ୍ରତିଶତ ପରିବାର ଏହି ସମ୍ପ୍ରଦାୟର । ମାଟିରୁ ବିଭିନ୍ନ ସାମଗ୍ରୀ ତିଆରି କରିବା ଏମାନଙ୍କ କୌଳିକ ବୃତ୍ତି । ଆବଶ୍ୟକ ମଜୁରୀ ପାଉନଥିଲେ ବି ବୃତ୍ତିକୁ ସେମାନେ ଛାଡ଼ିନାହାନ୍ତି । ଏମାନେ ଭଳିକି ଭଳି ମାଠିଆ, ସୁରେଇ, ଦୀପ, ରୋଷେଇ ସାମଗ୍ରୀ ଆଦି ତିଆରି କରନ୍ତି । ଗାଁ ବାହାରୁ ମାଟି ଆଣି ଏସବୁ ନିର୍ମାଣ କରିଥାନ୍ତି । ଜିଲ୍ଲାର କେତେକ ମନ୍ଦିର କର୍ତ୍ତୃପକ୍ଷ ଗାଁକୁ ଆସି ଦୀପ ଓ ବିଭିନ୍ନ ସାମଗ୍ରୀ କିଣିନିଅନ୍ତି । ଏହା ବାଦ୍ ସେମାନଙ୍କୁ କୋରାପୁଟ ବଜାରକୁ ଯାଇ ପସରା ମେଲାଇବାକୁ ପଡ଼େ । ସବୁଦିନ ବ୍ୟବସାୟ ନହେଲେ ମଧ୍ୟ ଏହି କାମକୁ ସେମାନେ ଛାଡ଼ି ପାରିନାହାଁନ୍ତି ବୋଲି ପଦ୍ମିନୀ କୁମ୍ଭାର କହିଛନ୍ତି ।
ସେ ଆହୁରି କହିଛନ୍ତି, ସରକାରୀ ପ୍ରୋତ୍ସାହନ ମିଳିଲେ ଏହି ବ୍ୟବସାୟ ଜୋର୍ ଧରିବ । କାରିଗରମାନେ ଉଚିତ୍ ପାରିଶ୍ରମିକ ପାଇବା ସହ ବ୍ୟବସାୟକୁ ଏକ ସ୍ୱତନ୍ତ୍ର ପରିଚୟ ମିଳିବ । ରାଜ୍ୟ ସରକାର ଏସ୍ଏଚ୍ଜି ଗଠନ କରି ମହିଳାଙ୍କୁ ସ୍ୱାବଲମ୍ବୀ କରିଛନ୍ତି । ସେମାନଙ୍କୁ ଉଦ୍ୟୋଗୀ କରିବା ଲାଗି ଆର୍ଥିକ ପ୍ରୋତ୍ସାହନ ଯୋଗାଇ ଦେଉଛନ୍ତି । ଏହି ଗୋଷ୍ଠୀ ଗୁଡ଼ିକୁ ଆର୍ଥିକ ପ୍ରୋତ୍ସାହନ ଦେଇ ମାଟି ତିଆରି ସାମଗ୍ରୀ ନେଇ କ୍ଷୁଦ୍ର ଶିଳ୍ପ ପ୍ରତିଷ୍ଠା କରିବା ଆବଶ୍ୟକ । ଯାହାଦ୍ୱାରା ବ୍ୟବସାୟ ବଢ଼ିବା ସହ ବ୍ୟବସାୟୀକରଣ ମଧ୍ୟ ହୋଇପାରିବେ । ଏହାଦ୍ୱାରା କୁମ୍ଭାର ସମ୍ପ୍ରଦାୟର ଆର୍ଥିକ ଓ ସାମାଜିକସ୍ତରରେ ବିକାଶ ହୋଇପାରିବ । କାର୍ତ୍ତିକ କୁମ୍ଭାର କହିଛନ୍ତି, ପ୍ରତିବର୍ଷ ଦୀପାବଳିରେ ମାଟି ଦୀପର ଚାହିଦା ରହିଥାଏ ।
ବଜାରରେ ଭଳିକିଭଳି ବିଦ୍ୟୁତ୍ ଲାଇଟ୍ ମିଳିବା ପରେ ମାଟି ଦୀପରୁ ଗ୍ରାହକମାନେ ମୁହଁ ଫେରାଉଛନ୍ତି । ମାଟିଦୀପ ପାଇଁ ଗ୍ରାହକଙ୍କ ମଧ୍ୟରେ ପୂର୍ବ ଭଳି ଆଉ ଉତ୍ସାହ ଦେଖିବାକୁ ମିଳୁନି । ବ୍ୟବସାୟ ନେଇ ଯେଉଁ ଆଶା କରାଯାଉଥିଲା ତାହା ପୂରାହେଉନି । ଚାହିଦା ବଢ଼ାଇବା ପାଇଁ ରାଜ୍ୟ ସରକାର ବିକଳ୍ପ ବ୍ୟବସ୍ଥା କରିବା ଭଲ । ମିଶନ ଶକ୍ତି ଜରିଆରେ କୁଟୀର ଶିଳ୍ପ ଓ ଉତ୍ପାଦନକୁ ରାଜ୍ୟ ସରକାର ପ୍ରୋତ୍ସାହନ ଦେଉଛନ୍ତି । ମାଟି ଦୀପ ତିଆରି ପାଇଁ ମଧ୍ୟ ପ୍ରୋତ୍ସାହନ ଯୋଗାଇ ଦିଅନ୍ତୁ ।
