ବ୍ରହ୍ମପୁର,୨୩/୦୧: ଗୋପାଳପୁର ବେଳାଭୂମି ମହୋତ୍ସବ ଏଥର ମଧ୍ୟ ଧୁମ୍ଧାମ୍ରେ ଆୟୋଜନ ହେବ । ଗଞ୍ଜାମ ଓ ଓଡ଼ିଶାର କଳା, ସଂସ୍କୃତି ବିକାଶ ପାଇଁ ଗୋପଳପୁର ବେଳାଭୂମି ମହୋତ୍ସବ ଉତ୍କୃଷ୍ଟ ମଞ୍ଚ ହେବ । ମହୋତ୍ସବ ସମୟରେ ଏହା ବେପାର ବାଣିଜ୍ୟର ପେଣ୍ଠ ହେବ । ପ୍ରାୟ ୩୦୦ ଷ୍ଟଲ୍କୁ ନେଇ ପଲ୍ଲିଶ୍ରୀ ମେଳା ଅନୁଷ୍ଠିତ ହେବ । ଏଥିରେ ୩୦ଟି ଷ୍ଟଲ୍ ଖାଦ୍ୟ ସାମଗ୍ରୀର ରହିବ ବୋଲି ସୋମବାର ବିଏମ୍ସି ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ଗଞ୍ଜାମ ଜିଲ୍ଲା ପରିଷଦ ମୁଖ୍ୟ ନିର୍ବାହୀ ଅଧିକାରୀ ଭି. କୀର୍ତ୍ତିଭାସନ୍ କହିଛନ୍ତି ।
ସବୁଥର ଭଳି ଏଥର ମଧ୍ୟ ବେଳାଭୂମି ମହୋତ୍ସବରେ ଦୁଇଟି ମଞ୍ଚ ରହିବ । ଗୋଟିଏ ମଞ୍ଚରେ ଅପରାହ୍ନରୁ ସ୍ଥାନୀୟ କଳାକାରଙ୍କ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହେବ । ସେହିପରି ଅନ୍ୟ ଏକ ମଞ୍ଚରେ ସନ୍ଧ୍ୟା ୬ଟାରେ ମୁଖ୍ୟ କାର୍ଯ୍ୟକ୍ରମ ଅନୁଷ୍ଠିତ ହେବ । ଲୋକଙ୍କ ମନୋରଞ୍ଜନ ପାଇଁ ଓଲିଉଡ୍, ବଲିଉଡ୍, ସ୍ଥାନୀୟ ଓ ରାଜ୍ୟ ବାହାର କଳାକାରଙ୍କୁ ଗୋପାଳପୁର ମଞ୍ଚରେ ଦେଖିବାକୁ ମିଳିବ । ଉଦ୍ଘାଟନୀ ସନ୍ଧ୍ୟା ରଙ୍ଗାରଙ୍ଗ୍ ହେବ । ଦେଶର ଲୋକପ୍ରିୟ ବ୍ୟାଣ୍ଡ ପ୍ରଥମ ଦିନ ମଞ୍ଚରେ ମ୍ୟୁଜିକ୍ ଯାଦୁ ପ୍ରଦର୍ଶନ କରିବ । ବୁଧବାର ସନ୍ଧ୍ୟାରେ ସନମ୍ ବ୍ୟାଣ୍ଡ୍ ବିଶେଷ ଆକର୍ଷଣ ରହିଛି । ସେହିପରି ସୁପରହିଟ୍ ସିଙ୍ଗର୍ ଯୋଡ଼ି ସଚେତ୍-ପରମ୍ପରା ମହୋତ୍ସବ ଦ୍ୱିତୀୟ ସନ୍ଧ୍ୟାକୁ ରଙ୍ଗିନ୍ କରିବେ । ଚମତ୍କାର ଗୀତରେ ଦର୍ଶକଙ୍କୁ ବିମୋହିତ କରିବେ ।
ତୃତୀୟ ସନ୍ଧ୍ୟାକୁ ଆକର୍ଷଣୀୟ କରିବାକୁ ଜଣେ ଭର୍ସାଟାଇଲ୍ ସିଙ୍ଗର୍ଙ୍କୁ ଚୟନ କରାଯାଇଛି । ବଲିଉଡ୍ ପ୍ଲେ-ବ୍ୟାକ୍ ସିଙ୍ଗର୍ ଶିଳ୍ପା ରାଓ ତୃତୀୟ ସନ୍ଧ୍ୟାରେ ଦର୍ଶକଙ୍କୁ ନଚାଇବେ ବୋଲି ମହୋତ୍ସବ ଆୟୋଜକ କମିଟି ସୂଚନା ଦେଇଛି । ଗୋପାଳପୁର ମହୋତ୍ସବରେ ପରିମଳ ତଦାରଖ ପାଇଁ ଅଧିକ ବନ୍ଦୋବସ୍ତ କରାଯିବ ବୋଲି ବିଏମ୍ସି କମିଶନର୍ ଜେ ସୋନାଲ କହିଛନ୍ତି। ୟୁରିନାଲ୍, ସଫେଇ କର୍ମଚାରୀ ଅଧିକ ସଂଖ୍ୟାରେ ନିୟୋଜିତ ହେବେ ବୋଲି ସେ କହିଛନ୍ତି ।
ଏଥିର ଭିଆଇପି କିମ୍ବା ଭିଭିଆଇପି ଭଳି କୌଣସ ପାସ୍ ବ୍ୟବସ୍ଥା ରହିବନି । କେବଳ ଗଣମାଧ୍ୟମ ପାଇଁ ସ୍ୱତନ୍ତ୍ର ପାସ୍ କରାଯିବ । ଗଣମାଧ୍ୟମ ପ୍ରତିନିଧିଙ୍କ ପାସ୍ରେ ପରିବାରର ଦୁଇ ଜଣ ପ୍ରବେଶ କରିପାରିବେ । ଅନ୍ୟ ଅତିଥି, ନିର୍ବାଚିତ ପ୍ରତିନିଧି ଏବଂ ବରିଷ୍ଠ ପ୍ରଶାସନିକ ଅଧିକାରୀଙ୍କ ପାଇଁ ଷ୍ଟେଜ୍ ସାମ୍ନାରେ ଡି’ଜୋନ୍ କରାଯିବ । ସେଠାରେ ସେମାନଙ୍କ ପାଇଁ ବସିବାର ବନ୍ଦୋବସ୍ତ କରାଯିବ ବୋଲି ବ୍ରହ୍ମପୁର ଉପଜିଲ୍ଲାପାଳ କହିଛନ୍ତି । ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା, କଣ୍ଟ୍ରୋଲ୍ ରୁମ୍ ଏବଂ ଟ୍ରାଫିକ୍ ପରିଚାଳନା ନେଇ ବନ୍ଦୋବସ୍ତ ହେବ ।
