ଇସ୍ଲାମାବାଦ: ପାକିସ୍ତାନ ସାଧାରଣ ନିର୍ବାଚନର ଫଳାଫଳ ଉପରେ ସମଗ୍ର ବିଶ୍ବର ନଜର ରହିଛି । ହେଲେ ରେଜଲ୍ଟ ଆସିବା ପାଇଁ ବହୁ ବିଳମ୍ବ ହେଉଛି । ଏହାକୁ ନେଇ ପାକିସ୍ତାନରେ ଅସନ୍ତୋଷ ପ୍ରକାଶ ପାଇଛି । ସେପଟେ ଗୋଟିଏ ଗୋଟିଏ ଆସନରେ ଫଳାଫଳ ସାମ୍ନାକୁ ଆସୁଛି । ସବୁଠୁ ବଡ଼ କଥା ହେଉଛି ପାକିସ୍ତାନ ସାଧାରଣ ନିର୍ବାଚନରେ ଆତଙ୍କବାଦୀ ହାଫିଜ ସଇଦ ନୂଆ ଦଳ ଘୋଷଣା କରିବା ସହ ପ୍ରାର୍ଥୀ ଦେଇଥିଲା ।
ହାଫିଜର ପୁଅ ଏବଂ ଜ୍ବାଇଁ ମଧ୍ୟ ପ୍ରାର୍ଥୀ ହୋଇଥିଲେ । ହେଲେ ମିଳିଥିବା ସୂଚନା ଅନୁସାରେ, ମୁମ୍ବାଇ ଆକ୍ରମଣର ମାଷ୍ଟର ମାଇଣ୍ଡ ହାଫିଜ ସଇଦର ପୁଅ ତଲହା ସଇଦ ନିର୍ବାଚନରେ ପରାସ୍ତ ହୋଇଛି । ମର୍କାଜୀ ମୁସଲିମ୍ ଲିଗର ପ୍ରାର୍ଥୀ ତଲାହ ଲାହୋର ନ୍ୟାସନାଲ ଆସେମ୍ବଲି ୧୨୨ ଆସନରୁ ପ୍ରାର୍ଥୀ ହୋଇଥିଲା । ହେଲେ ସେ ପରାଜୟର ସାମ୍ନା କରିଛି । ପାକିସ୍ତାନର ଭୋଟରମାନେ ଆତଙ୍କବାଦକୁ ନା କହିଛନ୍ତି ।
ଫଳାଫଳରେ ତଲହା ଷଷ୍ଠ ସ୍ଥାନରେ ରହିଛି । ତାକୁ ମାତ୍ର ୨୦୪୨ ଭୋଟ୍ ମିଳିଛି । ତଲହାଙ୍କୁ ପରାସ୍ତ କରିଥିବା ନେତାଙ୍କ ନାମ ହେଉଛି ଲତିଫ ଖୋସା, ଯିଏକି ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ନିକଟତମ ସହଯୋଗୀ । ତଲହା ସଇଦ କୁଖ୍ୟାତ ଆତଙ୍କବାଦୀ ହାଫିଜ ସଇଦର ପୁଅ । ଲଶ୍କର-ଇ-ତୋଇବାରେ ଦ୍ବିତୀୟ ନେତା ତଲାହ ସଇଦ । UAPA ଅଧୀନରେ ଭାରତ ସରକାର ତଲହାକୁ ଆତଙ୍କବାଦୀ ଘୋଷଣା କରିଛନ୍ତି ।