ପ୍ରମୂଖ ଖବର
  • ରାଜ୍ୟ ବଜେଟ୍ ଉପସ୍ଥାପିତ, ଧାନ କ୍ବିଣ୍ଟାଲ ୩୧ ଶହ ଟଙ୍କା
  • ||
  • ୨୬ରେ ଅଲିମ୍ପିକ୍ସ ଉଦ୍‌ଘାଟନୀ ଉତ୍ସବ: ଅଷ୍ଟ୍ରେର୍ଲିଜ ପୋଲରୁ ଆରମ୍ଭ, ଆଇଫିଲ୍‌ ଟାୱାରରେ ଶେଷ
  • ||
  • ମୋହନ ସରକାରଙ୍କ ପ୍ରଥମ ବଜେଟ୍, ୨୦୨୪-୨୫ ପାଇଁ ଆସିବ ପୂର୍ଣ୍ଣାଙ୍ଗ ବଜେଟ୍ ଅପରାହ୍ନ ୫ଟା ଉପସ୍ଥାପନ
  • ||
  • ଆସନ୍ତା ୨୭ରେ ଲଘୁଚାପ, ୨୯ ଯାଏ ବର୍ଷା ସମ୍ଭାବନା: ଆଜି ତିନି ଜିଲ୍ଲାକୁ ଆଲର୍ଟ ଜାରି
  • ||

ଆଜିଠୁ ସଂସଦର ସ୍ୱତନ୍ତ୍ର ଅଧିବେଶନ: ଗଣେଷ ଚତୁର୍ଥୀରେ ନୂଆ ସଂସଦ ଭବନରେ ବୈଠକ

ନୂଆଦିଲ୍ଲୀ,୧୮/୦୯: ସୋମବାରଠୁ ସଂସଦର ୫ ଦିନିଆ ସ୍ୱତନ୍ତ୍ର ଅଧିବେଶନ। ଏହା ଆଗାମୀ ଶୁକ୍ରବାର ପର୍ଯ୍ୟନ୍ତ ଚାଲିବ । ପ୍ରଥମ ଦିନର ଅଧିବେଶନ ପୁରୁଣା ସଂସଦ ଭବନରେ ଅନୁଷ୍ଠିତ ହେବ । ଏହା ପରେ ଅର୍ଥାତ ୧୯ ତାରିଖ ଗଣେଷ ଚତୁର୍ଥୀ ଅବସରରେ ଲୋକସଭା ଓ ରାଜ୍ୟସଭାର ଅଧିବେଶନ ନୂଆ ସଂସଦ ଭବନରେ ବସିବ । ପ୍ରଥମ ଦିନରେ ସମ୍ବିଧାନ ସଭାଠାରୁ ଆରମ୍ଭ କରି ସଂସଦର ୭୫ ବର୍ଷ ଯାତ୍ରା ଉପରେ ଆଲୋଚନା କରାଯିବ । 

ଏହି ସ୍ୱତନ୍ତ୍ର ଅଧିବେଶନ କାଳରେ ସରକାର ୪ଟି ବିଲ୍‌ ଗୃହରେ ଆଗତ ଓ ଗୃହୀତ କରାଇବାକୁ ଯୋଜନା କରିଛନ୍ତି । ସେଥିରେ ରହିଛି ମୁଖ୍ୟ ନିର୍ବାଚନ କମିଶନ ଓ ନିର୍ବାଚନ କମିଶନ ନିଯୁକ୍ତି ବିଲ୍‌-୨୦୨୩, ଆଡଭୋକେଟ (ସଂଶୋଧନ) ବିଲ-୨୦୨୩, ପ୍ରେସ ଆଣ୍ଡ ରେଜିଷ୍ଟ୍ରେସନ ଅଫ୍‌ ପିରିଓଡିକାଲ୍ସ ବିଲ୍‌-୨୦୨୩ ଏବଂ ପୋଷ୍ଟ ଅଫିସ ବିଲ୍‌-୨୦୨୩ । ତେବେ ବିରୋଧୀ ଦଳ ଅଭିଯୋଗ କରିଛନ୍ତି କି ସରକାର ଏହି ସ୍ୱତନ୍ତ୍ର ଅଧିବେଶନ ପାଇଁ କିଛି ଗୋପନ ଏଜେଣ୍ଡା ବା ପ୍ରସଙ୍ଗ ରଖିଛନ୍ତି । ନଚେତ ବର୍ତ୍ତମାନ ଏଭଳି ସ୍ୱତନ୍ତ୍ର ଅଧିବେଶନର ଆବଶ୍ୟକତା ନଥିଲା । ଗତ କିଛିଦିନ ହେଲା ଚର୍ଚ୍ଚା ଚାଲିଛି କି ସରକାର ଏହି ସ୍ୱତନ୍ତ୍ର ଅଧିବେଶନରେ ଏକ ଦେଶ-ଏକ ନିର୍ବାଚନ ବିଲ୍‌ ଆଣିପାରନ୍ତି । ଦେଶରେ ଏକ ସମୟରେ ସଂସଦ, ବିଧାନସଭା, ପୌର ପରିଷଦ ଓ ପଞ୍ଚାୟତ ନିର୍ବାଚନ କରିବା ଲାଗି ସରକାର ବିଚାର କରୁଛନ୍ତି । ସେଥିପାଇଁ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଏକ ୮ ଜଣିଆ ଟିମ୍‌ ଗଠନ କରାଯାଇଛି । ଏହି କମିଟିର ପ୍ରଥମ ବୈଠକ ଆସନ୍ତା ୨୩ରେ ଅନୁଷ୍ଠିତ ହେବ ବୋଲି ଜଣାପଡିଛି ।

ସେପଟେ ଅଧିବେଶନ ପୂର୍ବରୁ କେନ୍ଦ୍ର ସରକାରଙ୍କ ପକ୍ଷରୁ ଆଜି ସର୍ବଦଳୀୟ ବୈଠକ ଡକାଯାଇଥିଲା । ବୈଠକରେ ଶାସକ ଓ ବିରୋଧୀ ଦଳର ସଦସ୍ୟମାନେ ଏହି ଅଧିବେଶନ କାଳରେ ମହିଳା ସଂରକ୍ଷଣ ବିଲ୍‌ ଆଗତ ଓ ଗୃହୀତ କରାଇବା ଲାଗି ଦାବି କରିଥିଲେ । ସେମାନେ ଦର୍ଶାଇଥିଲେ କି ଏହି ବିଲ୍‌ ବହୁଦିନ ଧରି ପଡି ରହିଛି । ଏହାକୁ ଆଗତ କରାଗଲେ ସର୍ବସମ୍ମତିକ୍ରମେ ଗୃହୀତ ହୋଇପାରିବ । ବିଲ୍‌ରେ ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣର ପ୍ରାବଧାନ ରହିଛି । କିଛି ଆଞ୍ଚଳିକ ଦଳ ମଧ୍ୟ ମହିଳା ସଂରକ୍ଷଣ ବିଲ୍‌ରେ ଅନୁସୂଚିତ ଜାତି ଓ ପଛୁଆ ବର୍ଗଙ୍କ ପାଇଁ କୋଟା ବ୍ୟବସ୍ଥା କରିବାକୁ ଦାବି କରିଥିଲେ । ଏହି କୋଟା ଆଡୁଆ ଯୋଗୁ ବିଲ୍‌ଟି ଗତ କିଛିବର୍ଷ ହେଲା ସେଭଳି ଅଟକି ରହିଛି ।

ବୈଠକ ପରେ କଂଗ୍ରେସ ନେତା ଅଧିର ରଞ୍ଜନ ଚୌଧୁରୀ କହିଛନ୍ତି ମହିଳା ସଂରକ୍ଷଣ ବିଲ୍‌ ଅଣାଗଲେ ତାକୁ ସବୁ ଦଳ ସମର୍ଥନ କରିବେ ବୋଲି ସମ୍ମତି ଦେଇଛନ୍ତି । ବିଜେପିର ସହଯୋଗୀ ଏନ୍‌ସିପି ନେତା ପ୍ରଫୁଲ ପଟେଲ କହିଛନ୍ତି ଏହି ଅଧିବେଶନରେ ମହିଳା ସଂରକ୍ଷଣ ବିଲ୍‌ ଗୃହୀତ କରାଇବାକୁ ଆମେ ସରକାରଙ୍କୁ ଅପିଲ କରିଛୁ । ବିଲ୍‌ ଆଗତ ହେଲେ ସବୁ ଦଳ ଏହାକୁ ସମର୍ଥନ କରିବେ ବୋଲି ଆଶା ରହିଛି । ବିଜେଡି ଓ ବିଆରଏସ୍‌ ଭଳି ଆଞ୍ଚଳିକ ଦଳ ମଧ୍ୟ ଏହି ବିଲ୍‌କୁ ସମର୍ଥନ କରିଛନ୍ତି । ବିଜେଡି ନେତା ପିନାକୀ ମିଶ୍ର କହିଛନ୍ତି ନୂଆ ସଂସଦ ଭବନରୁ ନୂଆ ଯୁଗ ଆରମ୍ଭ ହେବା ଉଚିତ ଏବଂ ମହିଳା ସଂରକ୍ଷଣ ବିଲ୍‌ ଗୃହୀତ ହେବା ଆବଶ୍ୟକ ।

ବୈଠକରେ କେନ୍ଦ୍ର ସରକାରଙ୍କ ପକ୍ଷରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, କେନ୍ଦ୍ର ବାଣିଜ୍ୟ ଓ ଶିଳ୍ପମନ୍ତ୍ରୀ ପିୟୁଷ ଗୋୟଲ ଏବଂ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଯୋଗଦେଇଥିଲେ । ସେହିଭଳି ଜେଡିଏସ୍‌ ନେତା ଏଚ୍‌ଡି ଦେବେଗୌଡା, ଡିଏମ୍‌କେ ନେତ୍ରୀ କାନିମୋଝି, ଟିଡିପି ନେତା ରାମମୋହନ ନାଇଡୁ, ଟିଏମ୍‌ସି ନେତା ଡେରେକ ଓ’ବ୍ରିଏନ ପ୍ରମୁଖ ଉପସ୍ଥିତ ଥିଲେ ।

  • Special session Parliament
  • Parliament
  • News7 Is Now On WhatsApp Join And Get Latest News Updates Delivered To You Via WhatsApp

    Copyright © 2024 - Summa Real Media Private Limited. All Rights Reserved.