ନୂଆଦିଲ୍ଲୀ,୩୦।୩: ରାଷ୍ଟ୍ରପତି ଭବନରେ ଆୟୋଜିତ ଭବ୍ୟ ସମାରୋହରେ ଶନିବାର ପ୍ରଦାନ କରାଯାଇଛି ଭାରତ ରତ୍ନ ସମ୍ମାନ । ଚଳିତ ବର୍ଷ କର୍ପୁରୀ ଠାକୁର, ଏମଏସ ସ୍ୱାମୀନାଥନ, ଚୌଧରୀ ଚରଣ ସିଂହ, ପିଭି ନରସିଂହ ରାଓଙ୍କୁ ରାଷ୍ଟ୍ରପତି ଦୌପ୍ରଦୀ ମୁର୍ମୁ ମରଣୋତ୍ତର ଭାରତ ରତ୍ନ ସମ୍ମାନରେ ସମ୍ମାନିତ କରିଛନ୍ତି। ତେବେ ପୂର୍ବତନ ଉପ-ପ୍ରଧାନମନ୍ତ୍ରୀ ଓ ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀଙ୍କୁ ଭାରତ ରତ୍ନ ଦିଆଯିବାର ଥିଲା, କିନ୍ତୁ ତାଙ୍କର ଖରାପ ସ୍ବାସ୍ଥ୍ୟ ଓ ବୟସକୁ ଦଖି ରବିବାର ରାଷ୍ଟ୍ରପତି ତାଙ୍କୁ ନିଜେ ସାକ୍ଷାତ କରି ତାଙ୍କ ବାସଭବନରେ ଏହି ସମ୍ମାନ ପ୍ରଦାନ କରିବେ।

ଉଲ୍ଲେଖନୀୟ ଯେ, କେନ୍ଦ୍ର ସରକାର ଚଳିତ ବର୍ଷ ୫ ଜଣ ପ୍ରସିଦ୍ଧ ବ୍ୟକ୍ତିଙ୍କୁ ଭାରତ ରତ୍ନ ଦେବାର ଘୋଷଣା କରିଥିଲେ। ୨୦୧୪ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ ବିଜେପି ସରକାର ଗଠନ ପରେ ମହମନା ମାଲବୀୟ, ପଣ୍ଡିତ ଅଟଳ ବିହାରୀ ବାଜପେୟୀ, ପ୍ରଣବ ମୁଖାର୍ଜୀ, ଭୂପେନ ହଜାରିକା ଓ ନାନାଜି ଦେଶମୁଖଙ୍କୁ ସର୍ବୋଚ୍ଚ ନାଗରିକ ସମ୍ମାନ ପ୍ରଦାନ କରାଯାଇ ସାରିଛି। ଏପର୍ଯ୍ୟନ୍ତ ମୋଟ ୫୩ ଜଣଙ୍କୁ ଭାରତ ରତ୍ନ ଦିଆ ଯାଇ ସାରିଛି।

୩ ଫେବୃଆରୀରେ ପ୍ରଧାନମନ୍ତ୍ରୀ ମୋଦି ନିଜେ ଆଡଭାନୀଙ୍କୁ ଭାରତ ରତ୍ନ ଦିଆଯିବାର ଘୋଷଣା କରିଥିଲେ। ଆଡଭାନୀଙ୍କ ବୟସ ଏବେ ୯୬ ବର୍ଷ ହୋଇଥିବା ବେଳେ ଏବେ ସେ ଅଧିକାଂଶ ସମୟ ଅସୁସ୍ଥ ରହୁଛନ୍ତି। ଏଭଳି ସ୍ଥିତିରେ ତାଙ୍କ ବାସଭବନରେ ପହଁଞ୍ଚି ରାଷ୍ଟ୍ରପତି ଦୌପଦୀ ମୁର୍ମୁ ତାଙ୍କୁ ସମ୍ମାନିତ କରିବେ। ବାଜପେୟୀ ଓ ନାନାଜୀ ଦେଶମୁଖ ପରେ ଆଡଭାନୀ ତୃତୀୟ ଆରଏସ୍ଏସ୍ ନେତା, ଯାହାଙ୍କୁ ଭାରତ ରତ୍ନ ଦିଆଯିବ।