ମୁମ୍ବାଇ, ୦୧/୦୨: ଭାରତୀୟ ସେୟାର୍ ବଜାର ଉପରେ ଅନ୍ତରୀଣ ବଜାରର ପ୍ରଭାବ ଦେଖିବାକୁ ମିଳିଛି । ସ୍ୱଳ୍ପ ବୃଦ୍ଧି ସହ ଗୁରୁବାର ଆରମ୍ଭ ହୋଇଥିଲା ସେୟାର ବଜାର କାରବାର । ଉଭୟ ସେନସେକ୍ସ ଓ ନିଫ୍ଟି ଆରମ୍ଭରୁ ବଢ଼ିଥିଲା । ଅନ୍ତରୀଣ ବଜେଟ୍ ପୂର୍ବରୁ ପ୍ରାରମ୍ଭିକ କାରବାରରେ ସେନସେକ୍ସ ୨୪୮.୪ ପଏଣ୍ଟ ବଢ଼ି ୭୨ ହଜାର ୦୦୫.୫୧ ପଏଣ୍ଟରେ ପହଞ୍ଚିଥିଲା ।

ସେହିଭଳି ନିଫ୍ଟି ମଧ୍ୟ ୬୨.୬୫ ପଏଣ୍ଟ ବୃଦ୍ଧି ପାଇ ୨୧ ହଜାର ୭୮୮.୩୫ ପଏଣ୍ଟରେ ପହଞ୍ଚିଥିଲା । ତେବେ ବଜାର ଖୋଲିବା ପରେ ସେନସେକ୍ସ ଓ ନିଫ୍ଟି ଖସିଥିଲା । ଏହା ପରେ ଦିନ ତମାମ୍ ସେୟାର ବଜାରରେ ହ୍ରାସ୍, ବୃଦ୍ଧି ଲାଗି ରହିଥିଲା ।

ଆଜି ଅନ୍ତରୀଣ ବଜେଟ୍ ଆଗତ ହେଉଥିବାରୁ ନିବେଶକଙ୍କ ନଜର ରହିଥିଲା ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ବଜେଟ୍ ଭାଷଣ ଉପରେ । ଆଉ ଅନ୍ତରୀଣ ବଜେଟ୍ ୨୦୨୪ ଆଗତ ପରେ ସେୟାର ବଜାରରେ ଷ୍ଟକ ଖସିବା, ବଢ଼ିବା ଲାଗି ରହିଥିଲା । ମୋଟାମୋଟି କହିବାକୁ ଗଲେ ନିବେଶକଙ୍କ ମଧ୍ୟରେ ଉତ୍ସାହ ନଥିଲା ।

ବଜାର ବନ୍ଦ ବେଳେ ସେନସେକ୍ସ ୧୦୬.୮୧ ପଏଣ୍ଟ ହ୍ରାସ୍ ପାଇ ୭୧ ହଜାର ୬୫୪.୩୦ ପଏଣ୍ଟ ରହିଥିବା ବେଳେ ନିଫ୍ଟି ୩୬.୦୫ ପଏଣ୍ଟ ଖସି ୨୧ ହଜାର ୬୮୯.୬୫ ପଏଣ୍ଟରେ ରହିଥିଲା । ଦିନ ୧୧ଟାରେ ଅର୍ଥମନ୍ତ୍ରୀଙ୍କ ବଜେଟ୍ ଅଭିଭାଷଣ ଆରମ୍ଭରେ ସେନସେକ୍ସ ୩୦୦ ପଏଣ୍ଟ ବୃଦ୍ଧି ପାଇ ୭୨ ହଜାର ପାର୍ କରିଥିଲା । ସେହିଭଳି ନିଫ୍ଟି ୨୧ ହଜାର ୮୦୦ ପଏଣ୍ଟ ଉପରେ କାରବାର କରିଥିଲା ।