ନୂଆଦିଲ୍ଲୀ,୦୯/୦୯: ଶ୍ରୀଲଙ୍କା ସରକାର ନିଜର ଶ୍ରୀଲଙ୍କାନ୍‌ ଏୟାର୍‌ଲାଇନ୍ସର ଘରୋଇକରଣ ବିକଳ୍ପଗୁଡ଼ିକ ଉପରେ ବିଚାର କରୁଛନ୍ତି । ଏହାର ଘରୋଇକରଣ ନେଇ ସରକାର ସକ୍ରିୟତା ବଢ଼ାଇ ଦେଇଛନ୍ତି । ଘରୋଇ କମ୍ପାନିଙ୍କ ହାତରେ ଏହାକୁ ଟେକି ଦେବାକୁ କଥାବାର୍ତ୍ତା ଜାରି ରହିଛି । ଏଥିପାଇଁ ଅନେକ କମ୍ପାନି ଦୌଡ଼ରେ ଅଛନ୍ତି । ତେବେ ଶ୍ରୀଲଙ୍କା ଏୟାର୍‌ଲାଇନ୍ସକୁ କିଣିବା ପାଇଁ ଟାଟା ସନ୍ସ, ଆଦାନି ଗ୍ରୁପ୍‌, ଏମିରେଟ୍‌ସ ଭଳି ବଡ଼ ବଡ଼ ନାଁ ସାମିଲ ଅଛି ।

ଶ୍ରୀଲଙ୍କା ଏୟାର୍‌ଲାଇନ୍ସର ଘରୋଇକରଣ ପାଇଁ ଶ୍ରୀଲଙ୍କା ସରକାର ଗମ୍ଭୀରତାର ସହ ବିଚାର କରୁଛନ୍ତି । କେତେକ ଘରୋଇ କମ୍ପାନି ସହ କଥାବାର୍ତ୍ତା ଚାଲିଛି । ସିଏଚ୍‌-ଆଭିଏଶନ୍‌ର ରିପୋର୍ଟ ଅନୁସାରେ ଏହି ତାଲିକାରେ କେତେକ ନାମକରା କମ୍ପାନି ସାମିଲ ଅଛନ୍ତି । ସମ୍ଭାବ୍ୟ ନିବେଶକଙ୍କ ମଧ୍ୟରେ ଏମିରେଟ୍‌ସ(ଇକେ, ଦୁବାଇ ଇଣ୍ଟର୍‌ନ୍ୟାସ୍‌ନାଲ), ଟାଟା ସନ୍ସ ଏବଂ ଆଦାନି ଗ୍ରୁପ୍‌ ସାମିଲ ଅଛନ୍ତି । ଭାରତ, ବାଂଲାଦେଶ, ନେପାଳରେ ଏହି ଏୟାର୍‌ଲାଇନ୍ସର ପହଞ୍ଚ ବଢ଼ିଛି । 

ଶ୍ରୀଲଙ୍କାନ ଏୟାର୍‌ଲାଇନ୍ସ ଆଗାମୀ ଶୀତ ଋତୁରେ କଲମ୍ବୋ ଏବଂ ଥିରୁଅନନ୍ଥପୂରମ ମଧ୍ୟରେ ଏହାର ବିମାନ ସେବାକୁ ବଢ଼ାଇବାକୁ ଯୋଜନା କରିଛି । ଏହାକୁ ସପ୍ତାହରେ ୬ରୁ ବଢ଼ାଇ ୭ ଥର କରିବା ପାଇଁ ବିଚାର ହେଉଛି । ଏହାବ୍ୟତୀତ କୋଚି ଇଣ୍ଟର୍‌ନ୍ୟାସ୍‌ନାଲ ପାଇଁ ଏହାର ସାପ୍ତାହିକ ୧୦ ଥର ଉଡ଼ାଣକୁ ଜାରି ରଖିବା ପାଇଁ ଉଦ୍ୟମ କରୁଛି । ଏହାବ୍ୟତୀତ ଏୟାର୍‌ଲାଇନ୍ସ କୋଝିକୋଡ୍‌ ପାଇଁ ନୂଆ ଉଡ଼ାଣ ମାର୍ଗ ଚିହ୍ନଟ ନେଇ କାର୍ଯ୍ୟ କରୁଛି । ରିପୋର୍ଟ ଅନୁସାରେ ଭାରତ ଏବଂ ଶ୍ରୀଲଙ୍କା ମଧ୍ୟରେ ଲଗାତର ବିମାନ ପରିବହନ ବଢିଛି । 

ଏୟାର୍‌ ଇଣ୍ଡିଆକୁ ଅଧିଗ୍ରହଣ କରିବା ପରେ ଟାଟା ସନ୍ସ ଶ୍ରୀଲଙ୍କା ଏୟାର୍‌ଲାଇନ୍ସ ପାଇଁ ଆଗ୍ରହ ଦେଖାଇଛି । ଟାଟା ସନ୍ସ ପାଖରେ ଏୟାର୍‌ ଇଣ୍ଡିଆ, ଭିସ୍ତାରା, ଏୟାର୍‌ ଇଣ୍ଡିଆ ଏକ୍ସପ୍ରେସ, ଏୟାର୍‌ ଏସିଆ ଭଳି ବିମାନ କମ୍ପାନିଗୁଡ଼ିକୁ ଚଳାଇବାର ଅନୁଭବ ରହିଛି । ଅନ୍ୟପକ୍ଷରେ, ଆଦାନି ଶ୍ରୀଲଙ୍କା ସରକାରଙ୍କ ସହ ମିଶି ସେଠାରେ ଅନେକ ପ୍ରକଳ୍ପରେ କାର୍ଯ୍ୟ କରୁଛି । ଗୌତମ ଆଦାନି ଜୁଲାଇରେ ଶ୍ରୀଲଙ୍କା ରାଷ୍ଟ୍ରପତି ରାନିଲ ବିକ୍ରମାସିଂଘେଙ୍କ ଦୁଇଦିନିଆ ଭାରତ ଗସ୍ତ ସମୟରେ ତାଙ୍କ ସହ ଆଲୋଚନା କରିଥିଲେ । ବୈଠକରେ ଶ୍ରୀଲଙ୍କାରେ ଅନେକ ପରିଯୋଜନା ଉପରେ ଧ୍ୟାନକେନ୍ଦ୍ରିତ କରାଯାଇଥିଲା ।