ଜି.ଉଦୟଗିରି,୨୦/୧୧ :  ଜି. ଉଦୟଗିରି ବିଜ୍ଞପିତ ଅଞ୍ଚଳ ପରିଷଦର ପୂର୍ବତନ ଅଧ୍ୟକ୍ଷ ପି.ସଞ୍ଜୀବ ପାତ୍ରଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରିଛି ବିଜେଡି । ଦଳର ରାଜ୍ୟ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଲମ୍ବନ ଆଦେଶ ପ୍ରତ୍ୟାହାର କରି ନେଇଥିବା ଏକ ପ୍ରେସ ବିଜ୍ଞପ୍ତିରେ ସୂଚନା ଦେଇଛନ୍ତି ଦଳର ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାଶ । ସୂଚନାଯୋଗ୍ୟ ଯେ, ସଞ୍ଜୀବ ୨୦୧୩ରୁ ୨୦୧୮ପର୍ଯ୍ୟନ୍ତ ଜି ଉଦୟଗିରି ବିଜ୍ଞପିତ ଅଞ୍ଚଳ ପରିଷଦର ଅଧ୍ୟକ୍ଷ ଥିଲେ। 

ତେବେ ୨୦୨୨ପୌର ନିର୍ବାଚନରେ ସେ ନିର୍ଦ୍ଦଳୀୟ ପ୍ରାର୍ଥୀ ଭାବେ ନିର୍ବାଚନ ଲଢି ଓ୍ବାର୍ଡ ମେମ୍ବର ହୋଇଥିଲେ । ଦଳ ବିରୋଧୀ କାର୍ଯ୍ୟ ଅଭିଯୋଗରେ ତାଙ୍କୁ ୨୦୨୨ରେ ଦଳରୁ ନିଲମ୍ବିତ କରାଯାଇଥିଲା । ଶ୍ରୀ ପାତ୍ର ବିଜେଡିର ଜଣେ ଦକ୍ଷ ସଂଗଠକ ହୋଇଥିବା ପରିପ୍ରେକ୍ଷୀରେ ଆଗାମୀ ଏନଏସି ଅଧ୍ୟକ୍ଷା ଉପ-ନିର୍ବାଚନ ଏବଂ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ତାଙ୍କ ନିଲମ୍ବନ ଆଦେଶ ପ୍ରତ୍ୟାହାର ଦଳର ସଂଗଠନକୁ ଅଧିକ ସୁଦୃଢ କରିବ ବୋଲି ସ୍ଥାନୀୟ ଅଞ୍ଚଳରେ ଚର୍ଚ୍ଚା ହେଉଛି ।