କ୍ୱାଲାଲୁମ୍ପୁର,୨୧/୧୨: ୧୯ବର୍ଷରୁ କମ୍ ମହିଳା ଏସିଆ କପ୍ ଟି-ଟ୍ୱେଣ୍ଟିରେ ଫାଇନାଲ୍ ଲାଇନ୍ ଚୂଡ଼ାନ୍ତ । ଆସନ୍ତା ୨୨ ତାରିଖରେ ଭାରତ ଓ ବାଂଲାଦେଶ ମଧ୍ୟରେ ଟାଇଟଲ୍ ପାଇଁ ଲଢ଼େଇ ହେବ ।
ଶୁକ୍ରବାର ସୁପର-୪ ରାଉଣ୍ଡର ଦ୍ୱିତୀୟ ମ୍ୟାଚ୍ରେ ଭାରତ ୪ ୱିକେଟ୍ରେ ଶ୍ରୀଲଙ୍କାକୁ ପରାସ୍ତ କରିଥିଲା । ଏଥିସହ ଦଳ ସର୍ବାଧିକ ୭ ପଏଣ୍ଟ (+୩.୨୬୬ ରନ୍ରେଟ୍) ସହ ଶୀର୍ଷ ସ୍ଥାନରେ ରହି ଫାଇନାଲ୍ରେ ପ୍ରବେଶ କରିଥିଲା । ଅନ୍ୟ ଏକ ମ୍ୟାଚ୍ରେ ବାଂଲାଦେଶ ୯ ୱିକେଟ୍ରେ ନେପାଳକୁ ହରାଇଥିଲା । ଦଳ ମୋଟ ୬ପଏଣ୍ଟ ସହ ତାଲିକାରେ ଦ୍ୱିତୀୟ ସ୍ଥାନରେ ରହିଥିଲା ।
ଶୁକ୍ରବାର ଭାରତଠୁ ବ୍ୟାଟିଂ ଆମନ୍ତ୍ରଣ ପାଇ ଶ୍ରୀଲଙ୍କା ୯ ୱିକେଟ୍ ହରାଇ ୯୮ ରନ୍ ସଂଗ୍ରହ କରିଥିଲା । ଅଧିନାୟିକା ମାନୁଦି ନାନାୟକାରା ୩୩ (୧ଚୌକା, ୨ଛକା), ସୁମୁଡୁ ନିଶାନସାଳା ୨୧ରନ୍ କରିଥିବାବେଳେ ଅନ୍ୟ କୌଣସି ବ୍ୟାଟର ୨ଅଙ୍କ ଛୁଇଁ ପାରିନଥିଲେ । ଭାରତ ପକ୍ଷରୁ ଆୟୂଷି ୪ଟି, ପାରୁଣିକା ସିସୋଦିଆ ୨ଟି ଏବଂ ସବନମ୍ ସକିଲ ଓ ଦ୍ରିତି କେଶରୀ ପ୍ରତ୍ୟେକ ଗୋଟିଏ ଲେଖାଏଁ ୱିକେଟ୍ ନେଇଥିଲେ ।
୯୯ରନ୍ର ବିଜୟ ଲକ୍ଷ୍ୟ ନେଇ ଭାରତ ବ୍ୟାଟିଂ ଆରମ୍ଭ କରି ପ୍ରାରମ୍ଭିକ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ୫ରନ୍ ମଧ୍ୟରେ ଦଳ ୨ଟି ୱିକେଟ୍ ହରାଇଥିଲା । ଇଶ୍ୱରୀ ଆୱାସାରେ (୦) ଓ ସାନିକା ଚଲକେ (୪) ସହଳ ଆଉଟ୍ ହୋଇଥିଲେ । ଅନ୍ୟ ଓପନର ଜ. କମଳିନୀ ଓ ଗଙ୍ଗୋଦି ତ୍ରିଶା ଦୃଢ଼ ବ୍ୟାଟିଂ କରି ସ୍କୋରକୁ ୬୮ରେ ପହଞ୍ଚାଇ ଥିଲେ । ତ୍ରିଶା ୨ଚୌକା ଓ ୩ଛକା ବଳରେ ୩୨ରନ୍ କରି ଆଉଟ୍ ହୋଇଥିଲେ । ପରେ ପରେ କମିଳନୀ ୨୮ (୩ଚୌକା, ୧ଛକା), ନିକି ପ୍ରସାଦ ୩ ଓ ଭାବିକା ଆହିରେ ୭ରନ୍ କରି ପାଭିଲିୟନ ଫେରିଥିଲେ । ମାତ୍ର ମିଥିଳା ବିନୋଦ ଅପରାଜିତ ୧୭ରନ୍ ଯୋଗ କରିବା ଫଳରେ ଭାରତ ୩୧ଟି ବଲ୍ ବାକି ଥାଇ ୬ ୱିକେଟ୍ ବିନିମୟରେ ବିଜୟ ହାସଲ କରିଥିଲା । ଭାରତୀୟ ସ୍ପିନର ଆୟୂଷି ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
