ହାଇଦ୍ରାବାଦ,୧୬।୯: ଆନ୍ଧ୍ର ପ୍ରଦେଶର ୩ ବରିଷ୍ଠ ଆଇପିଏସ୍ ଅଧିକାରୀ ନିଲମ୍ବିତ। ମୁମ୍ବାଇର ଜଣେ ଅଭିନେତ୍ରୀଙ୍କ ଅଭିଯୋଗ ପରେ ଉଚ୍ଚ ପଦସ୍ତ ଆଇପିଏସ ଅଧିକାରୀଙ୍କୁ ହେବାକୁ ପଡିଛି ସସପେଣ୍ଡ। ନିଲମ୍ବିତ ପୋଲିସ ଅଧିକାରୀଙ୍କ ମଧ୍ୟରେ ଜଣେ ଡାଇରେକ୍ଟର-ଜେନେରାଲ ରାଙ୍କ, ଇନ୍ସପେକ୍ଟର ଜେନେରାଲ୍ ଏବଂ ଏସପି ରାଙ୍କର ଅଧିକାରୀ ଅଛନ୍ତି। ସେମାନେ ହେଲେ- ପି ଏସ୍ ଆର ଅଞ୍ଜାନେଇଲୁ (ଡିଜି ରାଙ୍କ୍), କାନ୍ତୀ ରାଣା ଟାଟା (ଆଇଜି ରାଙ୍କ୍) ଏବଂ ବିଶାଲ ଗୁନି (ଏସପି ରାଙ୍କ୍)।
ମିଳିଥିବା ସୂଚନା ଅନୁସାରେ, ନିଲମ୍ବିତ ଆଇପିଏସ୍ ଅଧିକାରୀଙ୍କ ବିରୋଧରେ ଅଭିଯୋଗ ରହିଛି ସେମାନେ ମୁମ୍ବାଇର ଅଭିନେତ୍ରୀ ଓ ମଡେଲ କାଦମ୍ବରୀ ଜେଠଓ୍ବାନୀଙ୍କ ବିରୋଧ ଦାଖଲ କରାଯାଇଥିବା ମାମଲାର ଠିକ୍ ଭାବରେ ତଦନ୍ତ କରଥିଲେ। ତାଙ୍କୁ ତରବରିଆ ଭାବରେ ଗିରଫ କରି ନିଆଯାଇଛି। ଏହା ସହ ଅଧିକାରୀଙ୍କ ଉପରେ ଅଭିନେତ୍ରୀଙ୍କୁ ହଇରାଣ କରିବାର ଅଭିଯୋଗ ମଧ୍ୟ ରହିଛି।
ମୁମ୍ବାଇରେ ରହୁଥିବା ଅଭିନେତ୍ରୀ କାଦମ୍ବରୀ ଅଭିଯୋଗ କରିଥିଲେ, ଅଗଷ୍ଟରେ ଏନ୍ଟିଆର ପୋଲିସ କମିଶନର ଏସ୍.ଭି ରାଜଶେଖର ବାବୁଙ୍କ ନିକଟରେ ଔପଚାରିକ ଅଭିଯୋଗ ଦାଖଲ କରିଥିଲେ। ଏହି ଅଭିଯୋଗରେ ସେ କହିଥିଲେ, ଯେ, ୱାଇଏସଆର ଜଗନ ମୋହନ ରେଡ୍ଡୀଙ୍କ ସରକାର ସମୟରେ ଆନ୍ଧ୍ରପ୍ରଦେଶ ପୁଲିସ ତାଙ୍କୁ ହଇରାଣ କରିଥିଲା। YSR କଂଗ୍ରେସର ନେତା ଓ ଫିଲ୍ମ ନିର୍ମାତା ବିଦ୍ୟାସାଗର ଜମି ବିବାଦକୁ ନେଇ ତାଙ୍କ ବିରୁଦ୍ଧରେ ଅଭିଯୋଗ କରିଥିଲେ। ଫଳରେ ଆନ୍ଧ୍ର ପୁଲିସ ତାଙ୍କୁ ଏବଂ ତାଙ୍କ ବାପା-ମା’ଙ୍କୁ ଗିରଫ କରିଥିଲା। ଗିରଫ କରିବା ପରେ ବିନା କୌଣସି ପୂର୍ବ ସୂଚନାରେ ମୁମ୍ବାଇରୁ ବିଜୟଓ୍ବାଡା ନେଇଯାଇଥିଲା। ପୋଲିସ ତାଙ୍କ ବାପା-ମା’ଙ୍କୁ ଅପମାନିତ କରିଥିଲା ଓ ବେଆଇନ ଭାବରେ କଷ୍ଟଡିରେ ରଖିଥିଲା। ଏହି କାରଣରୁ ତାଙ୍କୁ ଏବଂ ତାଙ୍କ ବାପା-ମା’ଙ୍କୁ ୪୦ ଦିନରୁ ଅଧିକ ସମୟ ନ୍ୟାୟିକ ହେପାଜତରେ ରହିବାକୁ ପଡିଥିଲା। ଅଭିନେତ୍ରୀଙ୍କ ଓକିଲ. ଏନ୍ ଶ୍ରୀନିବାସ ଅଭିଯୋଗ କରିଛନ୍ତି ଯେ, ଅଭିନେତ୍ରୀ ଓ ତାଙ୍କ ପରିବାର ଲୋକଙ୍କୁ ଫଶାଇବା ପାଇଁ ବିଦ୍ୟାସାଗର ନକଲି ଦସ୍ତାବିଜ ତିଆରି କରିଥିଲା। ପୋଲିସ ତାଙ୍କୁ ବହୁ ଦିନ ପର୍ଯ୍ୟନ୍ତ ଜାମିନ୍ ଆବେଦନ ଦାଖଲ କରିବାକୁ ଅନୁମତି ଦେଇନଥିଲା। ଆନ୍ଧ୍ରପ୍ରଦେଶ ପୁଲିସ ଏହି ଅଭିଯୋଗର ଯାଞ୍ଚ କରି ୧୯୯୨, ୨୦୦୪ ଏବଂ ୨୦୧୦ ବ୍ୟାଚର ତିନି ଅଧିକାରୀଙ୍କ ବିରୋଧରେ ନିଲମ୍ବନ ଆଦେଶ ଜାରି କରିଛି।
