ନୂଆଦିଲ୍ଲୀ,୦୫/୦୨: କର୍ଣ୍ଣାଟକରେ ଏସିଆର ସବୁଠୁ ବଡ଼ ହେଲିକପ୍ଟର ତିଆରି କାରଖାନା ନିର୍ମାଣ ଶେଷହୋଇଛି । ଆସନ୍ତା ୬ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କର୍ଣ୍ଣାଟକର ତୁମକୁରୁରେ ଏଚ୍ଏଏଲ୍ର ଏହି ହେଲିକପ୍ଟର ଫ୍ୟାକ୍ଟ୍ରିର ଉଦ୍ଘାଟନ କରିବେ । ଏହା ଗ୍ରୀନ୍ଫିଲ୍ଡ ହେଲିକପ୍ଟର କାରଖାନା, ଯାହା କି ହେଲିକପ୍ଟର ନିର୍ମାଣ କ୍ଷମତା ଏବଂ ଇକୋ-ପ୍ରଣାଳୀକୁ ବଢ଼ାଇବ । ଆସନ୍ତା ୨୦ବର୍ଷରେ ଏଠାରେ ୪ ଲକ୍ଷ କୋଟି ଟଙ୍କା କାରବାର ସହ ୧ ହଜାରରୁ ଅଧିକ ହେଲିକପ୍ଟର ନିର୍ମାଣ ହେବ ବୋଲି ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି ।
୬୧୫ ଏକର ଜମିରେ ହୋଇଥିବା ଏହି କାରଖାନାରେ ପ୍ରଥମେ ଲାଇଟ୍ ୟୁଟିଲିଟି ହେଲିକପ୍ଟର(ଏଲ୍ୟୁଏଚ୍) ନିର୍ମାଣ ହେବ । ଏଲ୍ୟୁଏଚ୍ ସ୍ୱଦେଶୀ ଜ୍ଞାନକୌଶଳରେ ଡିଜାଇନ୍ ଏବଂ ବିକଶିତ ୩-ଟନ୍ ବର୍ଗର ସିଙ୍ଗଲ ଇଞ୍ଜିନ ହେଲିକପ୍ଟର । ପ୍ରାରମ୍ଭରୁ ଏହି କାରଖାନାରେ ପ୍ରତିବର୍ଷ ପ୍ରାୟ ୩୦ ହେଲିକପ୍ଟର ନିର୍ମାଣ କରାଯିବ । ପରେ ପ୍ରତିବର୍ଷ ଏହାର କ୍ଷମତା ୬୦ରୁ ୯୦ ହାର୍ରେ ବଢ଼ାଯିବ । ଏଲ୍ୟୁଏଚ୍ର ଉଡ଼ାଣ ପରୀକ୍ଷଣ ସରିଥିବା ଅଧିକାରୀମାନେ କହିଛନ୍ତି । ଏଲ୍ୟୁଏଚ୍ ପରେ ସେଠାରେ ଲାଇଟ୍ କମ୍ବାଟ୍ ହେଲିକପ୍ଟର (ଏଲ୍ସିଏଚ୍) ଏବଂ ଇଣ୍ଡିଆନ୍ ମଲ୍ଟିରୋଲ ହେଲିକପ୍ଟର (ଆଇଏମ୍ଆର୍ଏଚ୍) ନିର୍ମାଣ କରାଯିବାକୁ ଯୋଜନା ରହିଛି । ଏଥିସହ ଏଲ୍ୟୁଏଚ୍, ଏଲ୍ସିଏଚ୍, ସିଭିଲ ଏଏଲ୍ଏଚ୍ ଏବଂ ଆଇଏମ୍ଆର୍ଏଚ୍ର ମରାମତି ମଧ୍ୟ ଏଠାରେ କରାଯିବ । କାରଖାନାର ଆଖପାଖ ଅଞ୍ଚଳକୁ ବିକଶିତ କରାଯିବ ।