ଭୁବନେଶ୍ୱର ୭/୭(ବ୍ୟୁରୋ): ମହ୍ଲାର ଏଣ୍ଟରଟେନ୍ମେଣ୍ଟ୍ ଓ ଏଭି ସଲ୍ୟୁସନ୍ ମିଳିତ ବ୍ୟାନରରେ ପ୍ରସ୍ତୁତ ନୂଆ ଓଡ଼ିଆ ସିନେମା ‘ବାଏ ବାଏ ଦିଲ୍'ର ଅଡିଓ ରିଲିଜ୍ ବୁଧବାର ସନ୍ଧ୍ୟାରେ ଗୀତଗୋବିନ୍ଦ ସଦନରେ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମରେ ଅତିଥି ଭାବେ ମନ୍ତ୍ରୀ ଜଗନ୍ନାଥ ସାରକା, ମନ୍ତ୍ରୀ ଶ୍ରୀକାନ୍ତ ସାହୁ, ବିଧାୟକ ପ୍ରଭୁ ଜାନି, ବିଧାୟକ ପ୍ରୀତମ ପାଢ଼ୀ, ଓଡ଼ିଶା ମୋ ପରିବାର ଆବାହକ ଅରୂପ ପଟ୍ଟନାୟକ ପ୍ରମୁଖ ଯୋଗଦେଇ ଅଡିଓ ରିଲିଜ୍ କରିଥିଲେ । ଏହା ଏକ ଟିନ୍ ଏଜ୍ର କାହାଣୀ ହୋଇଥିବାବେଳେ ଏଥିରେ ନୂଆ ନାୟକ, ନାୟିକାଙ୍କୁ ପ୍ରାଧାନ୍ୟ ଦିଆଯାଇଛି । ନାୟକ ରାଜ୍ଙ୍କୁ ଏକ ଦମଦାର୍ ଚରିତ୍ରରେ ସୁଯୋଗ ଦିଆଯାଇଥିବାବେଳେ ତାଙ୍କ ନାୟିକା ସାଜିଛନ୍ତି ନବାଗତା ପଲ୍ଲବୀ ଓ ବିଦେଶିନୀ ସାଶା । ଋଷର ଅଭିନେତ୍ରୀ ସାଶାଙ୍କୁ ପ୍ରଥମ ଥର ଓଡ଼ିଆ ସିନେମାରେ ଦେଖିବାକୁ ପାଇବେ ଦର୍ଶକ । ତାଙ୍କ ଛଡ଼ା ଅନ୍ୟାନ୍ୟ ଚରିତ୍ରରେ ବର୍ଷିଆନ କଳାକାର ତେଲୁଗୁ ଷ୍ଟାର୍ ରାମବାବୁ, ଜୀବନ ପଣ୍ଡା, ଜୟାଲକ୍ଷ୍ମୀ, ପ୍ରୀତିରାଜ, ଶମ୍ଭୁ, ମୁମ୍ବାଇର କଳାକାର ଆଶିଷ, ଟୁଲୁ ଓ ବିଟୁ ଅଭିନୟ କରଥିବାବେଳେ ମୁଖ୍ୟ ଖଳନାୟକ ଭୂମିକାରେ ନିଜେ ନିର୍ଦ୍ଦେଶକ କୁନାଲ୍ ପଟ୍ଟନାୟକ ଗୁରୁ ଦାୟିତ୍ୱ ବହନ କରିଛନ୍ତି ।
କାହାଣୀରେ ନୂତନତ୍ୱ ସାଙ୍ଗକୁ ଲଭ୍, ରୋମାନ୍ସ, ଆକ୍ସନ୍, ଇମୋସନ୍, ଫ୍ୟାମିଲି ସେଣ୍ଟିମେଣ୍ଟ ଓ କମେଡିର ତଡ୍କା ଦେଖିବାକୁ ମିଳିବ । ସୁବ୍ରତ ଓ କୁନାଲ୍ଙ୍କ ବଳିଷ୍ଠ ସଂଳାପ ସାଙ୍ଗକୁ ଚିତ୍ରନାଟ୍ୟ ଓ ନିର୍ଦ୍ଦେଶନା ଦେଇଛନ୍ତି କୁନାଲ୍ ପଟ୍ଟନାୟକ । ବରିଷ୍ଠ ଗୀତିକାର ସଚ୍ଚି ମହାନ୍ତି ଓ ସନ୍ତୋଷଙ୍କ ଗୀତକୁ ସ୍ୱରରେ ସଜେଇଛନ୍ତି ଟୁନା ଭାଇ ଓ ଉନା ଭାଇ । ଫିଲ୍ମରେ ମୋଟ୍ ୫ଟି ଗୀତ ରହିଛି । ଏହାକୁ ଗାଇଛନ୍ତି ଅନନ୍ୟା, ବିଶ୍ୱଜିତ, ନାଭ୍ୟା ଓ କୁଲଦୀପ । କୋରିଓଗ୍ରାଫି କରିଛନ୍ତି ବିଦୁ । ଚିତ୍ର ଉତ୍ତୋଳନ ରଞ୍ଜନ ମିଶ୍ର କରିଥିବାବେଳେ ସମ୍ପାଦନା ଦାୟିତ୍ୱ ତୁଲାଇଛନ୍ତି ଦେବୀପ୍ରସାଦ କର । ଅନ୍ୟାନ୍ୟ ବିଭାଗ ଯଥାକ୍ରମେ³ ଫାଇଟ୍ସରେ ରେହମାନ୍ ଓ ଚିଣ୍ଟୁ, କଳାରେ ଲକ୍ଷ୍ମୀଧର ନିଜ ଦକ୍ଷତା ଦେଖାଇଛନ୍ତି । ଜୟଲକ୍ଷ୍ମୀ ମିଶ୍ରଙ୍କ ପ୍ରଯୋଜିତ ଏହି ସିନେମାର ଲାଇନ୍ ପ୍ରଡ୍ୟୁସର ରହିଛନ୍ତି ଦଣ୍ଡପାଣି ଦାସ । ସିନେମାଟି ତଳିତ ମାସ ଶେଷ ସପ୍ତାହର ପ୍ରେକ୍ଷାଳୟକୁ ଆସିବ ବୋଲି ରିଲିଜ୍ ଅବସରରେ ପ୍ରଯୋଜନା ସଂସ୍ଥା
ତରଫରୁ ଘୋଷଣା କରାଯାଇଛି ।