ପାଟଣାଗଡ ବିଧାୟକ ଯନ୍ତ୍ରୀଙ୍କୁ ଉଠବସ କରିବା ଘଟଣା: ତଦନ୍ତ ନିର୍ଦ୍ଦେଶ ଦେଲେ ଜିଲ୍ଲାପାଳ
ବଲାଙ୍ଗିର ୬/୬: ପାଟଣାଗଡର ନବନିର୍ବାଚିତ ବିଧାୟକ ପାଟଣାଗଡ ବ୍ଲକ୍ର ଜେଇଙ୍କୁ ଉଠବସ କରାଇବା ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ବଲାଙ୍ଗିର ଜିଲ୍ଲାପାଳ । ପାଟଣାଗଡ ଉପଜିଲ୍ଲାପାଳ ଘଟଣାର ତଦନ୍ତ କରିବେ । ଆସନ୍ତୁ ଜାଣିିବା କଣ ଥିଲା ସମ୍ପୂର୍ଣ୍ଣ ଘଟଣା..
ପାଟଣାଗଡର ନବନିର୍ବାଚିତ ବିଧାୟକଙ୍କ ଦବଙ୍ଗଗିରିର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଭିଡିଓରେ ପାଟଣାଗଡ ବ୍ଲକ୍ର ଜେଇଙ୍କୁ ବିଧାୟକ ସରୋଜ ମେହେର ଉଠବସ କରାଉଥିବା ଦେଖିବାକୁ ମିଳିଛି।
ସଂପୃକ୍ତ ଅଧିକାରୀଙ୍କୁ ୫ ମିନିଟ୍ରେ ୧୦୦ ଥର ଉଠବସ ହେବା ପାଇଁ ବିଧାୟକ ନିର୍ଦ୍ଦେଶ ଦେଇଥିବା ଭିଡିଓରେ ରହିଛି। ତେବେ ଏହି ଅଧିକାରୀ ଦୁଇଥର ଉଠବସ ହୋଇ ରହିଯାଉଛନ୍ତି। ବିଧାୟକଙ୍କ କଙ୍ଗାରୁ କୋର୍ଟରେ ଦଳୀୟ କର୍ମୀ ଓ ସମର୍ଥକମାନେ ଉପସ୍ଥିତ ଥିଲେ। ଜେଇ ଉଠବସ ନହେଲେ ତାଙ୍କୁ ମାଡ ମାରିବା ପାଇଁ ମଧ୍ୟ ବିଧାୟକ କର୍ମୀମାନଙ୍କୁ ନିର୍ଦ୍ଦେଶ ଦେଇଥିବା ଭିଡିଓରେ ଦେଖିବାକୁ ମିଳିଛି।
ସୂଚନାଯୋଗ୍ୟ ଯେ, ଗ୍ରାମାଞ୍ଚଳରେ ନିମ୍ନମାନର ରାସ୍ତାକାମ ହେଉଥିବା ଅଭିଯୋଗ ହୋଇଥିଲା। ଏହି ଅଭିଯୋଗ ଆଧାରରେ ବିଧାୟକ ସର୍ବସାଧାରଣରେ ଜେଇଙ୍କୁ ଦଣ୍ଡ ଦେଇଥିଲେ।
ବିଧାୟକଙ୍କ ଦ୍ବାରା ଦଣ୍ଡିତ ଜେଇ ଆଦିବାସୀ ସଂପ୍ରଦାୟର ହୋଇଥିବାରୁ ଏବେ ବିଭିନ୍ନ ଆଦିବାସୀ ସଂଗଠନ ଏହାର ପ୍ରତିବାଦ କରିବା ଆରମ୍ଭ କରିଦେଇଛନ୍ତି। ପାଟଣାଗଡର ବିଜେପି ପ୍ରାର୍ଥୀ କନକବର୍ଦ୍ଧନ ସିଂହଦେଓଙ୍କୁ ପରାସ୍ତ କରି ବିଜେଡିର ସରୋଜ ମେହେର ବିଧାୟକ ଭାବେ ପ୍ରଥମଥର ପାଇଁ ନିର୍ବାଚିତ ହୋଇଛନ୍ତି। ବିଧାୟକ ହେବା ପରେ ପରେ ସରୋଜ ମେହେରଙ୍କ ଏଭଳି କାର୍ଯ୍ୟକଳାପକୁ ବିଭିନ୍ନ ମହଲରେ ନାପସନ୍ଦ କରାଯାଇଛି।
ଅଧିକ ପଢନ୍ତୁ ପାଟଣାଗଡ ବିଧାୟକ ଉଠବସ କରାଇଥିବା ଜେଇଙ୍କ ପତ୍ନୀ ଥାନାରେ ଦେଲେ ଏତଲା
