ଯାଜପୁର,୨୯/୦୫:ଯାଜପୁର ଜିଲ୍ଲାରେ ଥିବା ସାତୋଟି ନିର୍ବାଚନ ମଣ୍ଡଳୀ ମଧ୍ୟରୁ ବିଞ୍ଝାରପୁର ନିର୍ବାଚନ ମଣ୍ଡଳୀରେ ୧୯୬୭ ମସିହା ଠାରୁ ପଛୁଆ ବର୍ଗଙ୍କ ପାଇଁ ଏହି ଆସନଟି ସଂରକ୍ଷିତ ରହିଛି। ବିଞ୍ଝାରପୁର ବ୍ଲକର ୨୯ ଟି ପଞ୍ଚାୟତ ଓ ଦଶରଥପୁର ବ୍ଲକର ୧୫ଟି ପଞ୍ଚାୟତକୁ ନେଇ ଏହି ନିର୍ବାଚନ ମଣ୍ଡଳୀ ଗଠିତ। ଏକଦା କଂଗ୍ରେସର ଗଡ଼ ଥିବା ଏହି ନିର୍ବାଚନ ମଣ୍ଡଳୀଟି ତିନି ଦଶନ୍ଧି ଧରି ବିଜୁ ଜନତା ଦଳ ହାତରେ ରହିଛି।

ସବୁଠୁ ଗୁରୁତ୍ୱପୂର୍ଣ କଥା ହେଲା ଏଥର ବିଞ୍ଝାରପୁରରେ ମହିଳା କାର୍ଡ ଖେଳିଛନ୍ତି ତିନି ପ୍ରମୁଖ ରାଜନୈତିକ ଦଳ ବିଜେଡି,ବିଜେପି ଓ କଂଗ୍ରେସ। ବିଜୁ ଜନତା ଦଳ ପକ୍ଷରୁ ଅଷ୍ଟମ ଥର ଲାଗି ନିର୍ବାଚନ ଲଢୁଛନ୍ତି ପୂର୍ବରୁ ଛଅଥର ବିଧାୟିକା ଥିବା ଶ୍ରୀମତୀ ପ୍ରମିଳା ମଲ୍ଲିକ। ସ୍ୱର୍ଗତ ବିଜୁ ପଟ୍ଟନାୟକଙ୍କ ସମୟରୁ ନିଜର ରାଜନୀତି ଜୀବନ ଆରମ୍ଭ କରିଥିବା ପ୍ରମିଳା ମଲ୍ଲିକ ପରବର୍ତୀ ସମୟରେ ବିଜେଡି ସରକାରରେ ବିଭିନ୍ନ ବିଭାଗରେ ମନ୍ତ୍ରୀ, ସରକାରୀ ଦଳର ମୁଖ୍ୟ ସଚେତକ, ବିଜୁ ମହିଳା ଦଳର ରାଜ୍ୟ ସଭାପତି ଏବଂ ଓଡିଶା ବିଧାନସଭାରେ ବାଚସ୍ପତି ପଦରେ ମଧ୍ୟ ରହିସାରିଛନ୍ତି। 

ଏପଟେ ତାଙ୍କ ବିପକ୍ଷରେ ନିର୍ବାଚନ ଲଢ଼ୁଥିବା ଭାରତୀୟ ଜନତା ପାର୍ଟିର ଶ୍ରୀମତୀ ବବିତା ମଲ୍ଲିକ ପୂର୍ବ ଦୁଇଟି ନିର୍ବାଚନରେ ପ୍ରମିଳା ମଲ୍ଲିକଙ୍କ ଠାରୁ ପରାଜୟ ହୋଇଥିବା ବେଳେ ଚଳିତ ନିର୍ବାଚନରେ ସେ ଚାଷୀ ଓ ଚାଷକୁ ପ୍ରସଙ୍ଗ କରିବା ସହ ମୋଦିଙ୍କ ଲୋକାଭୁମୁଖୀ ଯୋଜନା ସମ୍ପର୍କରେ ଭୋଟରଙ୍କୁ ଅବଗତ କରାଇ ଭୋଟ ଭିକ୍ଷା କରିଛନ୍ତି। 

ଅନ୍ୟପଟେ ପୂର୍ବରୁ ପଞ୍ଚାୟତ ସମିତିର ଅଧକ୍ଷା ଥିବା ଶ୍ରୀମତୀ କନକଲତା ମଲ୍ଲିକଙ୍କ ଉପରେ ଆସ୍ଥା ପ୍ରକଟ କରିଛି କଂଗ୍ରେସ। ପୂର୍ବ ଦୁଇଟି ନିର୍ବାଚନରେ କଂଗ୍ରେସ ତୃତୀୟ ସ୍ଥାନରେ ରହିଥିବା ବେଳେ ଚଳିତ ନିର୍ବାଚନରେ କଂଗ୍ରେସ ପକ୍ଷ୍ୟରୁ ଦିଆ ଯାଇଥିବା ଗ୍ୟାରେଣ୍ଟି କାର୍ଡ ବାଣ୍ଟିବା ସହ ଭୋଟରମାନଙ୍କ ନିକଟରେ ପହଂଚି ବିଜୟ ହାସଲ କରିବାକୁ ପ୍ରୟାସ କରୁଛନ୍ତି ଶ୍ରୀମତୀ କନକଲତା ମଲ୍ଲିକ। ଯଦି ଚଳିତ ନିର୍ବାଚନ କଥା ଦେଖିବା ଏଠାରେ ଶାସକ ଦଳ ବିଜେଡି ଓ ବିଜେପି ମଧ୍ୟ୍ୟରେ କଡା ଟକର ହେବ ବୋଲି ସ୍ଥାନୀୟ ଭୋଟରମାନଙ୍କ ମତ।