ଭୁବନେଶ୍ୱର, ୦୩/୦୯ : ମଙ୍ଗଳବାର ରାଜ୍ୟରେ ସଦସ୍ୟତା ଅଭିଯାନ ଆରମ୍ଭ କରିବ ବିଜେପି । ମୁଖ୍ୟମନ୍ତ୍ରୀ ମୋହନ ମାଝି ଏହି ବିଶାଳ ସାମୂହିକ ସଦସ୍ୟତା ଅଭିଯାନର ଶୁଭାରମ୍ଭ କରିବେ । ଏଥିରେ କୋଟିଏ ଲୋକଙ୍କୁ ଯୋଡ଼ିବାକୁ ଯୋଜନା ହୋଇଛି । ସଦସ୍ୟତା ଅଭିଯାନ ଜରିଆରେ ପଞ୍ଚାୟତ ଓ ବ୍ଲକ୍‌ ସ୍ତରରେ ସଂଗଠନକୁ ବଳୁଆ କରିବାକୁ ଦଳ ରଣନୀତି କରିଛି । ଏଥିପାଇଁ ବୁଥ୍‌ସ୍ତରରେ କମିଟି ଗଢ଼ି କାର୍ଯ୍ୟକର୍ତ୍ତାଙ୍କୁ ପ୍ରଶିକ୍ଷଣ ଦେଇଛି ଦଳ । ଦିଲ୍ଲୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ବିଜେପିର ସଦସ୍ୟତା ଅଭିଯାନର ଶୁଭାରମ୍ଭ କରିବା ସହ ନିଜେ ସଦସ୍ୟତା ଗ୍ରହଣ କରଥିଲେ । 

ମଙ୍ଗଳବାର ରାଜ୍ୟରେ ଏହି ଅଭିଯାନ ଆରମ୍ଭ ହେବ । ୮୮୦୦୦୦୨୦୨୪ ନମ୍ବରକୁ ମିସଡ୍‌ କଲ ଦେଇ ସଦସ୍ୟ ହୋଇପାରିବେ । କ୍ୟୁଆର ସ୍କାନର କୋଡ୍‌କୁ ସ୍କାନ୍‌ କରି ଓ ନମୋ ଆପସ୍‌କୁ ଯାଇ ନୂଆ ସଦସ୍ୟ ଭାବେ ଯୋଡ଼ି ହେବେ । ଅଫଲାଇନରେ ଫର୍ମ ପୂରଣ କରି ମଧ୍ୟ ସଦସ୍ୟ ହୋଇପାରିବେ ବୋଲି ବିଜେପି ପକ୍ଷରୁ କୁହାଯାଇଛି । ସଦସ୍ୟତା ଅଭିଯାନ ଜରିଆରେ ତୃଣମୂଳସ୍ତରରେ ନିଜ ସଂଗଠନକୁ ଅଧିକ ମଜବୁତ୍‌ କରିବାକୁ ଦଳ ଯୋଜନା କରିଛି । କାର୍ଯ୍ୟକର୍ତ୍ତାମାନେ ଗାଁରୁ ଗାଁ ଓ ସହର ବୁଲି ଲୋକଙ୍କୁ ଦଳ ସହିତ ଯୋଡ଼ିବେ । ଗାଁରେ ଘର ଘର ବୁଲି ଲୋକଙ୍କୁ ନୂଆ ସଦସ୍ୟ ଭାବେ ଯୋଡ଼ିବେ । ସୁଭଦ୍ରା ଯୋଜନା ବିଷୟରେ ଲୋକଙ୍କୁ ବୁଝାଇବେ । ଏହି ଯୋଜନା ଜରିଆରେ ମହିଳାଙ୍କ ସହ ଯୋଡ଼ି ହେବାକୁ ଦଳ ବ୍ଲୁପ୍ରିଣ୍ଟ ପ୍ରସ୍ତୁତ କରିଛି । ସୋମବାର ବିଜେପି ରାଜ୍ୟ ସଭାପତି ମନମୋହନ ସାମଲ ସାମ୍ବାଦିକ ସମ୍ମିଳନୀରେ ସଦସ୍ୟତା ଅଭିଯାନ ସମ୍ପର୍କରେ ବିସ୍ତୃତ ତଥ୍ୟ ରଖିଛନ୍ତି । ସବୁ କାର୍ଯ୍ୟକର୍ତ୍ତା ଘରକୁ ଘର ଯାଇ ସଦସ୍ୟତା ଅଭିଯାନକୁ ସଫଳ କରିବାକୁ ସେ ଆହ୍ୱାନ ଦେଇଛନ୍ତି । ମଙ୍ଗଳବାର ରାଜ୍ୟ କାର୍ଯ୍ୟାଳୟରେ ସଦସ୍ୟତା ଅଭିଯାନର ଶୁଭାରମ୍ଭ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀଙ୍କ ସମେତ ଦୁଇ ଉପମୁଖ୍ୟମନ୍ତ୍ରୀ, ସମସ୍ତ ମନ୍ତ୍ରୀ, ସାଂସଦ, ବିଧାୟକ ଓ ରାଜ୍ୟ ପଦାଧିକାରୀମାନେ ଯୋଗ ଦେବେ । ଏହି ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖପାତ୍ର ଦିଲୀପ ମଲ୍ଲିକ ଉପସ୍ଥିତ ଥିଲେ ।