ନୂଆଦିଲ୍ଲୀ, ୨୫/୦୩: ଭାରତୀୟ ଜନତା ପାର୍ଟିର ଅଧ୍ୟକ୍ଷ ଜେପି ନଡ୍ଡାଙ୍କ ପତ୍ନୀଙ୍କ କାର୍ ଚୋରି ହୋଇ ଯାଇଛି । କୁହାଯାଉଛି, ଡ୍ରାଇଭର କାର୍ ସର୍ଭିସ୍ ଲାଗି ଦିଲ୍ଲୀର ଗୋବିନ୍ଦପୁରୀ ଯାଇଥିଲେ । ମାର୍ଚ୍ଚ ୧୯ରେ ସର୍ଭିସ୍ ସେଣ୍ଟରରୁ ହିଁ ପର୍ଚ୍ୟୁନର କାର୍ ଚୋରି ହୋଇଛି । ଡ୍ରାଇଭରଙ୍କ ଅଭିଯୋଗ କ୍ରମେ ଏତଲା ରୁଜୁ କରି କାର୍ ଖୋଜୁଛି ପୋଲିସ ।
ସୂଚନାଯୋଗ୍ୟ, ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଲଗାତାର ଗାଡ଼ି ଚୋରି ସଂଖ୍ୟା ବଢ଼ିବାରେ ଲାଗିଛି । ରିପୋର୍ଟ ଅନୁସାରେ, ଦିଲ୍ଲୀ-ଏନସିଆରରେ ପ୍ରତି ୧୪ ମିନିଟରେ ଗୋଟିଏ ଗାଡ଼ି ଚୋରି ହେଉଛି । ୨୦୨୨ ଓ ୨୦୨୩ ମଧ୍ୟରେ ଦେଶରେ ଗାଡ଼ି ଚୋରି ଘଟଣା ୨.୫ ଗୁଣ ବଢ଼ିଥିବା ଏସକେଓ ରିପୋର୍ଟରେ କୁହାଯାଇଛି ।
ଏହା ଛଡ଼ା କେଉଁ କାର ଚୋରି ପାଇଁ ଡକାୟତ ଅଧିକ ନଜର ରଖିଛନ୍ତି ଉକ୍ତ ରିପୋର୍ଟରେ ତାର ଖୁଲାସା ହୋଇଥିଲା । କେଉଁ ସହରର କେଉଁ ସ୍ଥାନ ଗାଡ଼ି ଚୋରିରର ହଟସ୍ପଟ୍ ତାହା ମଧ୍ୟ ରିପୋର୍ଟରେ ରହିଛି । ଦିଲ୍ଲୀ-ଏନସିଆରରେ ପ୍ରତି ୧୪ ମିନିଟରେ ଗୋଟିଏ ଗାଡ଼ି ଚୋରି ହେଉଛି । ୨୦୨୩ ମସିହାରେ ହାରାହାରି ପ୍ରତିଦିନ ଗାଡ଼ି ଚୋରି ନେଇ ପ୍ରାୟ ୧୦୫ଟି ମାମଲା ରୁଜୁ ହେଉଛି ।
ଅଧିକାଂଶ ଗାଡ଼ି ଚୋରି ମଙ୍ଗଳବାର, ରବିବାର ଓ ଗୁରୁବାର ହେଉଥିବା ଜଣାପଡ଼ିଛି । ଏଭଳି ସ୍ଥିତିରେ ଦିଲ୍ଲୀ-ଏନସିଆରର ଲୋକଙ୍କୁ ଏହି ୩ ଦିନ ବେଶ୍ ସଜାଗ ରହିବାକୁ ପଡ଼ୁଛି । ତେବେ ଏହି ୩ ଦିନ ସର୍ବାଧିକ ଗାଡ଼ି କାହିଁକି ଚୋରି ହେଉଛି ତାହା ଜଣାପଡ଼ି ନାହିଁ ।