ଭୁବନେଶ୍ୱର,୨୨/୦୯: ମୂତ୍ରାଶୟ କର୍କଟ ଚିକିତ୍ସା କ୍ଷେତ୍ରରେ ବିଶ୍ୱ ଦରବାରରେ ପୁଣି ଓଡ଼ିଶାକୁ ଗର୍ବିତ କରିଛନ୍ତି ଦୁଇ ଓଡ଼ିଆ ପୁଅ । ଆମେରିକାରେ କାର୍ଯ୍ୟରତ ଯୁବ ବୈଜ୍ଞାନିକ ଡା. ଆର୍ଯ୍ୟମାଭ ପଟ୍ଟନାୟକ ଓ ଡା. ଶୁଭ୍ରାଂଶୁ ଶେଖର ସାହୁଙ୍କ ଗବେଷଣାତ୍ମକ ସନ୍ଦର୍ଭ ଖାତନାମା ବିଜ୍ଞାନ ପତ୍ରିକା ‘ନେଚର୍ କମ୍ୟୁନିକେସନ’ରେ ପ୍ରକାଶ ପାଇଛି । ମୂଷା ଓ କୁକୁରଙ୍କଠାରେ ସଫଳ ପରୀକ୍ଷଣ ପରେ ଏହା ଏବେ ମନୁଷ୍ୟ ପରୀକ୍ଷଣ ଅପେକ୍ଷାରେ ଅଛି ।
ବୈଜ୍ଞାନିକ ଡା. ଆର୍ଯ୍ୟମାଭ ପଟ୍ଟନାୟକ ‘ପ୍ରମେୟ’କୁ କହିଛନ୍ତି, ଆମେରିକାର ନାସ୍ନାଲ୍ ଇଷ୍ଟିଚ୍ୟୁଟ୍ ଅଫ୍ କ୍ୟାନ୍ସରରୁ ମିଳିଥିବା ଡାଟାକୁ ନେଇ ଗବେଷଣା ଜାରି ରହିଛି । କର୍କଟରେ ମୃତ ଏବଂ କର୍କଟ ଉପରେ ବିଜୟ ହାସଲ କରିଥିବା ରୋଗୀଙ୍କ ଜୀବକୋଷକୁ ନେଇ ଗବେଷଣା କରାଯାଇଥିଲା । ସେଥିରୁ କିଛି ଜିନ୍ ସଂପର୍କରେ ତଥ୍ୟ ମିଳିଥିଲା । ଟ୍ୟୁମର ହେଲେ ଏହି ଜିନ୍ ଅନ୍ୟ କୋଷକୁ ସଙ୍କେତ ଦେଇଥାଏ । ଶରୀରରେ ଏହି ଜିନ୍ର ସକ୍ରିୟତା କର୍କଟକୁ ପ୍ରତିହତ କରିଥାଏ । ତେଣୁ ଏହି ଜିନକୁ ସକ୍ରିୟ କରିବାକୁ ପ୍ରସ୍ତୁତ ଔଷଧ ଉପରେ ପ୍ରାରମ୍ଭିକ ସଫଳତା ମିଳିଛି । ଏହାକୁ ୟୁଏସ୍ ଫୁଡ୍ ଆଣ୍ଡ ଡ୍ରଗ୍ ଆଡମିନିଷ୍ଟ୍ରେସନ୍ (ଏଫ୍ଡିଏ) ସ୍ୱୀକୃତି ଦେଇଛି ।
ଖୁବ୍ ଶୀଘ୍ର ଏହାକୁ ମଣିଷ ଦେହରେ ପ୍ରୟୋଗ କରାଯିବ । ବରିଷ୍ଠ ବୈଜ୍ଞାନିକ ଡା. ମାଜିଦ କାଜେମିଆଁଙ୍କ ନେତୃତ୍ୱରେ ଗବେଷଣା ଚାଲିଛି। ଡା. ପଟ୍ଟନାୟକଙ୍କ ଘର କଟକ ଜିଲ୍ଲାର ବାଙ୍କୀରେ । ସେ ଭୀମଟାଙ୍ଗୀ ସରସ୍ୱତୀ ବିଦ୍ୟାମନ୍ଦିର ଓ ଓୟୁଏଟିରୁ ଶିକ୍ଷା ଲାଭ ପରେ ଆମେରିକାର ୟୁନିଭର୍ସିଟି ଅଫ୍ ନେବ୍ରାସ୍କାରେ ଭୂତାଣୁ ସମ୍ବନ୍ଧ ରୋଗ ପ୍ରତିଷେଧକ ଟିକା ଓ ଔଷଧ ଉପରେ ପିଏଚ୍ଡି ପାଇଛନ୍ତି । ଏବେ ଡା. ପଟ୍ଟନାୟକ ଇଣ୍ଡିଆନା ୟୁନିଭର୍ସିଟିର ସ୍କୁଲ ଅଫ୍ ମେଡିସିନରେ କାର୍ଯ୍ୟରତ । ସେହିପରି ଢେଙ୍କାନାଳ ଜିଲ୍ଲା କହେଁଇପାଳ ଗାଁରବୈଜ୍ଞାନିକ ଡା. ସାହୁ ଭୁବନେଶ୍ୱର ନାଇଜରରୁ ପିଏଚ୍ଡି କରି ଇଣ୍ଡିଆନାର ପରଡ୍ୟୁ ୟୁନିଭର୍ସିଟିରେ କାର୍ଯ୍ୟରତ।
