ଭୁବନେଶ୍ୱର,୦୫/୦୯: ନଦୀରେ ମୂର୍ତ୍ତି  ବିସର୍ଜନ କଲେ କଡ଼ା କାର୍ଯ୍ୟାନୁଷ୍ଠାନ ନେବ ବିଏମ୍‌ସି । ଆବଶ୍ୟକ ପଡିଲେ ଅନୁଷ୍ଠାନଠାରୁ ମୋଟା ଅଙ୍କର ଜରିମାନା ଆଦାୟ କରାଯିବ । ଏ  ନେଇ ବିଏମ୍‌ସି ପକ୍ଷରୁ ସ୍ୱତନ୍ତ୍ର ଅସ୍ଥାୟୀ ପୋଖରୀ କରାଯାଇଛି ।  

ପ୍ରତିବର୍ଷ କୁଆଖାଇ ଏବଂ ଦୟା ନଦୀରେ ବହୁ ମୂର୍ତ୍ତି ବିସର୍ଜନ ହେଉଛି । ମୂର୍ତ୍ତିରେ ବ୍ୟବହୃତ ନଡା ଓ କେମିକାଲ ପାଣିରେ ମିଶିବା ଦ୍ୱାରା ଜଳ ପ୍ରଦୂଷଣ ହେଉଛି । ଏହାକୁ ରୋକିବା ପାଇଁ  ଭୁବନେଶ୍ୱର ମହାନଗର ନିଗମ ପକ୍ଷରୁ ପୂର୍ବ  ବର୍ଷ ପରି ଚଳିତ ବର୍ଷ ମଧ୍ୟ ବିଭିନ୍ନ ସ୍ଥାନରେ ଅସ୍ଥାୟୀ ପୋଖରୀ ଖୋଳାଯାଇଛି । ପୋଖରୀର  ଚତୁ ପାଶ୍ୱର୍ରେ ଜରି ଦିଆଯାଇଛି । ବଡ ବଡ  ମୂର୍ତ୍ତିଗୁଡିକୁ ହାଇଡ୍ରା ସହାୟତାରେ ଗାଡିରୁ ଉଠାଇ ପୋଖରୀରେ ବିସର୍ଜନ କରାଯିବାର  ବ୍ୟବସ୍ଥା କରାଯାଇଛି । ଅଧିକାଂଶ ମୂର୍ତ୍ତି ରାତିରେ  ବିସର୍ଜନ ହେଉଥିବାରୁ ଦୁର୍ଘଟଣାକୁ ଏଡାଇବା ପାଇଁ ପୋଖରୀ ଚାରିପାଖକୁ ଆଲୋକୀକରଣ  କରାଯାଇଛି । ଟଙ୍କପାଣି ବ୍ରିଜ୍‌ ନିକଟରେ  ଗୋଟିଏ ଅସ୍ଥାୟୀ ପୋଖରୀ ଖୋଳାଯାଇଛି ।  

ଏହି ପୋଖରୀର ଦୈର୍ଘ୍ୟ ୨୬ ମିଟର, ପ୍ରସ୍ଥ ୧୬  ମିଟର ହୋଇଥିବା ବେଳେ ଏହାର ଗଭୀରତା ୩  ମିଟର ରହିଛି । ସେହିପରି ଦୟାନଦୀ କୂଳରେ  ହୋଇଥିବା ପୋଖରୀର ଦୈର୍ଘ୍ୟ ଓ ପ୍ରସ୍ଥ  ଯଥାକ୍ରମେ ୨୫ ଏବଂ ୧୨ ମିଟର ହୋଇଥିବା  ବେଳେ କୁଆଖାଇ ନଦୀକୂଳରେ ୧୬ ମିଟର  ଦୈର୍ଘ୍ୟ ଓ ୧୦ ମିଟର ଓସାରର ପୋଖରୀ ଖନନ  କରାଯାଇଛି । ସମସ୍ତଙ୍କର ଗଭୀରତା ପ୍ରାୟ ସମାନ  ରହିଛି । ବିଭିନ୍ନ ବିଦ୍ୟାଳୟ, ମହାବିଦ୍ୟାଳୟ ଓ  ବିଶ୍ୱ ବିଦ୍ୟାଳୟ, ଗଣେଶ ପୂଜା ମଣ୍ଡପ, ବିଭିନ୍ନ  ଅନୁଷ୍ଠାନ ଓ କ୍ଲବର କର୍ମକର୍ତ୍ତାଙ୍କ ସହ ଜନସାଧାରଣ  ଏହି ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ କରିବା  ପାଇଁ ବିଏମ୍‌ସି ପକ୍ଷରୁ ଅନୁରୋଧ କରାଯାଇଛି ।