ମେଲବର୍ଣ୍ଣ,୨୦/୧୨: ବର୍ଡର-ଗାଭାସ୍କର ଟ୍ରଫିର ଚତୁର୍ଥ ଟେଷ୍ଟ (ବକ୍ସିଂ ଡେ’) ଆସନ୍ତା ୨୬ ତାରିଖରୁ ଆରମ୍ଭ ହେବ । ଇତିମଧ୍ୟରେ ଭାରତୀୟ ଦଳ ମେଲବର୍ଣ୍ଣରେ ପହଞ୍ଚି ସାରିଛି । ଆଜିଠୁ ଦଳର ପ୍ରସ୍ତୁତି ଆରମ୍ଭ ହେବ । ତୃତୀୟ ଟେଷ୍ଟ (ବ୍ରିସବେନ୍) ଡ୍ର’ ହେବା ଫଳରେ ସିରିଜ ୧-୧ରେ ବରାବର ରହିଛି । ମେଲବର୍ଣ୍ଣରେ ଭାରତ ବିଜୟକୁ ଫେରିବା ଏବଂ ସିରିଜରେ ଅଗ୍ରଣୀ ହାସଲ ନେଇ ବ୍ୟାକୁଳ ରହିଛି ।
ଗତ ବୁଧବାର ତୃତୀୟ ଟେଷ୍ଟ ଶେଷ ହୋଇଥିଲା । ଅନ୍ତିମ ଦିବସରେ ପ୍ରସିଦ୍ଧ ସ୍ପିନର ରବିଚନ୍ଦ୍ରନ ଅଶ୍ୱିନ ହଠାତ୍ ଅବସର ଘୋଷଣା କରି ସମସ୍ତଙ୍କୁ ଚକିତ କରି ଦେଇଥିଲେ । ତାଙ୍କ ଅବସରକୁ ନେଇ ସାଥୀ ଖେଳାଳିମାନେ ଦୁଃଖିତ ଥିବା ସେମାନଙ୍କ ମୁହଁରୁ ବାରି ହୋଇ ପଡ଼ିଥିଲା। ମେଲବର୍ଣ୍ଣ ଟେଷ୍ଟ ପୂର୍ବରୁ ଭାରତ ବ୍ୟାଟିଂରେ ତ୍ରୁଟି ସୁଧାରିବା ଉପରେ ଗୁରୁତ୍ୱ ଦେବା ଜରୁରୀ । ଅଧିନାୟକ ରୋହିତ ଶର୍ମା, ବିରାଟ କୋହଲି, ରିଷଭ ପନ୍ତ, ଶୁଭମନ ଗିଲ୍ ପୂର୍ବ ୨ଟି ଯାକ ମ୍ୟାଚ୍ରେ ବିଫଳ ହୋଇଥିଲେ । ସିରିଜରେ ଅଗ୍ରଣୀ ହାସଲ କରିବାକୁ ହେଲେ ବ୍ୟାଟିଂ ବିଭାଗରେ ଶ୍ରେଷ୍ଠ ପ୍ରଦର୍ଶନ ଦେବାକୁ ପଡ଼ିଛି । ଆଜି ବ୍ୟାଟିଂ କୋଚ୍ ଅଭିଷେକ ନାୟାରଙ୍କ ଅଧିନରେ ଦଳ ବ୍ୟାଟିଂରେ ତ୍ରୁଟି ସୁଧାରିବାକୁ ଯୋଜନା କରୁଛି ।
