ବିହାର ୦୩/୦୬: ବିହାର ମୋତିହାରିର ଏକ ଗାଁରେ ଅଜବ ଘଟଣା ଘଟିଛି । ଟଙ୍କା ଗଣି ନପାରିବାରୁ ଜଣେ ବର ଶିଶୁପାଳ ହୋଇ ଫେରିଛନ୍ତି । କେବଳ ସେତିକି ନୁହେଁ, କନ୍ୟା ପକ୍ଷ ଲୋକେ ବରଙ୍କ ସମେତ ତାଙ୍କ ବାପା, ଭାଇ ଓ କିଛି ବରଯାତ୍ରୀଙ୍କୁ ବନ୍ଧକ ରଖିଥିଲେ । ପରଦିନ ପୁଲିସର ହସ୍ତକ୍ଷେପ ପରେ ସେମାନେ ମୁକୁଳିଛନ୍ତି ।
ଘଟଣାଟି ଏହିପରି । ମୋତିହାରି ପତାହି ଥାନା କ୍ଷେତ୍ର ଅଧୀନସ୍ଥ ଏକ ଗାଁର ଜଣେ ଝିଅଙ୍କ ବିବାହ କଦମୱା ଗାଁର ଜଣେ ଯୁବକଙ୍କ ସହ ସ୍ଥିର ହୋଇଥିଲା । ଗତ ବୁଧବାର ରାତିରେ ବରଯାତ୍ରୀ କନ୍ୟା ଘରେ ପହଞ୍ଚିବା ପରେ ଜୋରଦାର ନାଚ, ଗୀତ ହୋଇଥିଲା । ସମସ୍ତେ ଜଳଖିଆର ମଜା ନେଇଥିଲେ । ଇତିମଧ୍ୟରେ ଧୂମଧାମ୍ରେ ଜୟମାଳା କାର୍ଯ୍ୟକ୍ରମ ସରିଥିଲା । ତେବେ ତା’ ପରେ ପରମ୍ପରା ଅନୁସାରେ କନ୍ୟା ପକ୍ଷରୁ କିଛି ଟଙ୍କା ବରଙ୍କୁ ଗଣିବାକୁ ଦିଆଯାଇଥିଲା । ବର କିନ୍ତୁ ତାକୁ ଠିକ୍ ଭାବେ ଗଣିପାରିନଥିଲେ । ଏହି କଥାକୁ ନେଇ କନ୍ୟା ଅସନ୍ତୋଷ ପ୍ରକାଶ କରିଥିଲେ ଓ ବିବାହ ପାଇଁ ମନା କରିଦେଇଥିଲେ ।
ଯିଏ ଟଙ୍କା ଠିକ୍ରେ ଗଣିପାରୁନାହାନ୍ତି ସେଭଳି ନିରକ୍ଷର ଲୋକ ସହିତ ସଂସାର କେମିତି କରିବେ ବୋଲି କନ୍ୟା ପ୍ରଶ୍ନ କରିଥିଲେ । କନ୍ୟା ବିବାହ ପାଇଁ ମନା କରିଦେବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଯାଇଥିଲା । ଉଭୟ ପକ୍ଷ ମଧ୍ୟରେ ଜୋରଦାର ଯୁକ୍ତିତର୍କ ଚାଲିଥିଲା । ପରବର୍ତ୍ତୀ ସମୟରେ କନ୍ୟାଙ୍କ ପରିଜନ ବର, ତାଙ୍କ ବାପା, ଭାଇ ଓ କିଛି ବରଯାତ୍ରୀଙ୍କୁ ଘରେ ଅଟକାଇ ରଖିଥିଲେ । ପରଦିନ ପୁଲିସ ଏକଥା ଜାଣିବାକୁ ପାଇବା ପରେ ସମସ୍ତଙ୍କୁ ମୁକ୍ତ କରାଇଥିଲା । ଉଭୟ ପକ୍ଷଙ୍କୁ ବସାଇ ଆଲୋଚନା କରିଥିଲା । କିନ୍ତୁ ସେମାନଙ୍କ ମଧ୍ୟରେ ବିବାହ ଲାଗି ସହମତି ହୋଇନଥିଲା । ବାଧ୍ୟହୋଇ ବର ଶିଶୁପାଳ ସାଜି ଫେରିଯାଇଥିଲେ । ସ୍ଥାନୀୟ ଅଞ୍ଚଳର ଲୋକେ କନ୍ୟାଙ୍କର ଏହି ନିଷ୍ପତ୍ତିକୁ ସାହସିକ ଦର୍ଶାଇଛନ୍ତି ।
