ନୂଆଦିଲ୍ଲୀ: ରାଜସ୍ଥାନର ଅଲୱାର ଜିଲ୍ଲାରୁ ଏକ ବଡ଼ ଦୁର୍ଘଟଣାର ଖବର ସାମ୍ନାକୁ ଆସିଛି। ଦିଲ୍ଲୀ-ମୁମ୍ବାଇ ଏକ୍ସପ୍ରେସୱେରେ କଂଗ୍ରେସ ନେତା ମାନବେନ୍ଦ୍ର ସିଂ ଜସୋଲଙ୍କ କାର ଦୁର୍ଘଟଣାଗ୍ରସ୍ତ ହୋଇଛି । ଏହି ଦୁର୍ଘଟଣାରେ କଂଗ୍ରେସ ନେତା ମାନବେନ୍ଦ୍ର ସିଂ ଜସୋଲଙ୍କ ପତ୍ନୀ ଚିତ୍ରା ସିଂଙ୍କର ମୃତ୍ୟୁ ହୋଇଛି । ଏଥି ସହ ମାନବେନ୍ଦ୍ର ସିଂ ଜସୋଲ, ତାଙ୍କ ପୁଅ ସମେତ ତିନିଜଣ ଗୁରୁତର ଆହତ ହୋଇଛନ୍ତି । ସୂଚନାଥାଉକି, ମାନବେନ୍ଦ୍ର ସିଂ ଜସୋଲ ପୂର୍ବତନ କେନ୍ଦ୍ର ମନ୍ତ୍ରୀ ଜସୱନ୍ତ ସିଂଙ୍କ ପୁଅ । ସେ ଦୀର୍ଘ ଦିନ ଧରି ବିଜେପିରେ ଥିଲେ । କିନ୍ତୁ ୨୦୧୮ ରେ କଂଗ୍ରେସରେ ଯୋଗ ଦେଇଥିଲେ ।
ମିଳିଥିବା ସୂଚନା ଅନୁଯାୟୀ, ଅଲୱାର ଜିଲ୍ଲାର ଦିଲ୍ଲୀ-ମୁମ୍ବାଇ ଏକ୍ସପ୍ରେସୱେରେ ଖୁସପୁରୀ ନିକଟରେ ଏହି ଦୁର୍ଘଟଣା ଘଟିଛି । ଦୁର୍ଘଟଣାର ଏକ ଚିତ୍ର ସାମ୍ନାକୁ ଆସିଛି, ଯେଉଁଥିରେ ମାନବେନ୍ଦ୍ର ସିଂ ଜସୋଲ ଗୁରୁତର ଆହତ ହୋଇଥିବା ଜଣାପଡିଛି ।
ତେବେ ପ୍ରାରମ୍ଭିକ ସୂଚନା ଅନୁଯାୟୀ, ମାନବେନ୍ଦ୍ର ସିଂ ଜସୋଲ ତାଙ୍କ ପରିବାର ସହିତ ଦିଲ୍ଲୀ-ମୁମ୍ବାଇ ଏକ୍ସପ୍ରେସୱେ ଦେଇ ଯାଉଥିଲେ । ଏହି ସମୟରେ ଏହି ଦୁର୍ଘଟଣା ଘଟିଛି । ଘଟଣା ସ୍ଥଳର କିଛି ଫଟୋ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ଏକ କାର ଡିଭାଇଡର୍ ସହିତ ଧକ୍କା ହେବା ପରେ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳୁଛି । ଦୁର୍ଘଟଣାରେ ଆହତ ହୋଇଥିବା କଂଗ୍ରେସ ନେତା ମାନବେନ୍ଦ୍ର ସିଂ ଜସୋଲ, ତାଙ୍କ ପୁଅ ସୋଲଙ୍କି ସିଂ ଏବଂ ଡ୍ରାଇଭର ଆଲୱାରର ସୋଲାଙ୍କି ହସ୍ପିଟାଲରେ ଚିକିତ୍ସିତ ହେଉଛନ୍ତି ।