ନୂଆଦିଲ୍ଲୀ,୨୫ା୯(ଏଜେନ୍ସି): ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ  ଦାୟିତ୍ୱ ସମ୍ଭାଳିବା କ୍ଷଣି ରାଜଧାନୀରେ କାମ କରୁଥିବା  ଶ୍ରମିକମାନଙ୍କୁ ଏକ ବଡ଼ ଉପହାର ଦେଇଛନ୍ତି । ସେମାନଙ୍କ  ନିମନ୍ତେ ସେ ଏକ ନୂଆ ବେତନ ଢାଞ୍ଚା ଘୋଷଣା କରିଛନ୍ତି ।  ଏହା ଅନୁସାରେ ଅଣକୁଶଳୀ ଶ୍ରମିକଙ୍କ ଲାଗି ସର୍ବନିମ୍ନ  ଦରମା ୧୮,୦୬୬ ଟଙ୍କା ଏବଂ ଅର୍ଦ୍ଧକୁଶଳୀଙ୍କ ନିମନ୍ତେ  ୧୯,୯୨୯ ଟଙ୍କା ଧାର୍ଯ୍ୟ ହୋଇଛି । ସେହିଭଳି କୁଶଳୀଙ୍କ  ପାଇଁ ଏହା ୨୧,୯୧୭ ଟଙ୍କା ସ୍ଥିର ହୋଇଛି । ଦିଲ୍ଲୀରେ  ଆଉ କାହାର ଦରମା ୧୮ ହଜାରରୁ କମ୍‌ ହେବ ନାହିଁ  ବୋଲି ଆତିଶୀ ସରକାର ସ୍ପଷ୍ଟ କରିଛନ୍ତି । ଏହାର ଅର୍ଥ  ଯଦି ଅଣକୁଶଳୀ ଶ୍ରମିକଙ୍କ ମାସିକ ଦରମାକୁ ଦେଖାଯାଏ, ତେବେ ସେମାନଙ୍କର ଦୈନିକ ମଜୁରି ପ୍ରାୟ ୬୦୦ ଟଙ୍କା  ହେବ । 

ଏହି ପରିପ୍ରେକ୍ଷୀରେ ଏକ ସାମ୍ବାଦିକ ସମ୍ମିଳନୀରେ  ଆତିଶୀ କହିଛନ୍ତି, ବିଜେପି ଶାସିତ ରାଜ୍ୟଗୁଡ଼ିକରେ  ନ୍ୟୂନତମ ମଜୁରି ବୋଧେ ଦିଲ୍ଲୀରେ ଦିଆଯାଉଥିବା ମଜୁରି  ତୁଳନାରେ ଅଧା । ତାଙ୍କ ମୁତାବକ, ଦିଲ୍ଲୀବାସୀଙ୍କୁ ଭଲ  ବିଜୁଳି, ପାଣି, ସ୍କୁଲ ଏବଂ ହସ୍ପିଟାଲ ଭଳି ସୁବିଧା ସହିତ  ଅନ୍ୟାନ୍ୟ ମୌଳିକ ସେବା ଯୋଗାଇ ଦିଆଯାଉଛି । ଦିଲ୍ଲୀ  ସରକାର ଯେଉଁ ଐତିହାସିକ କାର୍ଯ୍ୟ କରୁଛନ୍ତି, ତାହା  ସମଗ୍ର ଦେଶରେ ସମ୍ଭବ ନୁହେଁ । ସର୍ବନିମ୍ନ ମଜୁରି  ଦୃଷ୍ଟିରୁ ଦିଲ୍ଲୀରେ ଏହା ସର୍ବାଧିକ ରହିଛି । ସେ କହିଛନ୍ତି,  ଦିନମଜୁରିଆ, ପାଣି ପାଇପ୍‌ ମିସ୍ତ୍ରିଙ୍କ ଭଳି ଶ୍ରମିକ ଶ୍ରେଣୀର  ଲୋକ ସର୍ବନିମ୍ନ ମଜୁରି ପାଉଛନ୍ତି । ସେମାନଙ୍କୁ ଶୋଷଣରୁ  ରକ୍ଷା କରିବା ପାଇଁ ଦିଲ୍ଲୀ ସରକାର ସର୍ବନିମ୍ନ ମଜୁରିକୁ ଐତିହାସିକ ସ୍ତରକୁ ନେଇଯାଇଛନ୍ତି।