ନୂଆଦିଲ୍ଲୀ,୨୧/୧୧: ରାଜଧାନୀ ଦିଲ୍ଲୀ ଏନସିଆରରେ ପ୍ରଦୂଷଣ ଯୋଗୁଁ ବିଗୁଡୁଛି ସ୍ଥିତି । ଅଣନିଶ୍ବାସୀ ରାଜଧାନୀବାସୀ । ଏପରି ପରିସ୍ଥିତି ଯେ ୭୫ ପ୍ରତିଶତ ପରିବାର ମଧ୍ୟରେ ଅତି କମରେ ଜଣେ ସଦସ୍ୟ ନିଶ୍ୱାସ, କାଶ କିମ୍ବା ମୁଣ୍ଡବିନ୍ଧା ଭଳି ରୋଗର ସମ୍ମୁଖୀନ ହେଉଛନ୍ତି ।  ଏକ ଅନଲାଇନ୍ କମ୍ୟୁନିଟି ପ୍ଲାଟଫର୍ମ ‘ଲୋକାଲ୍ ସର୍କଲ୍ସ’ସର୍ଭେ ରିପୋର୍ଟ ଅନୁଯାୟୀ, ୫୮ ପ୍ରତିଶତ ପରିବାରଙ୍କ ମଧ୍ୟରୁ କିଛି ସଦସ୍ୟଙ୍କ ମୁଣ୍ଡବିନ୍ଧା ହେଉଥିବା ଅଭିଯୋଗ କରିଛନ୍ତି । ଏଥି ସହିତ, ୫୦ପ୍ରତିଶତ ପରିବାର ଅଛନ୍ତି ଯେଉଁଠାରେ ଜଣେ କିମ୍ବା ଅନ୍ୟ ସଦସ୍ୟ ଶ୍ୱାସକ୍ରିୟାରେ ସମ୍ମୁଖୀନ ହେଇଥିବା ଜଣାପଡିଛି । 

ଗୁରୁଗ୍ରାମ, ଦିଲ୍ଲୀ, ଫରିଦାବାଦ, ନୋଏଡା ଏବଂ ଗାଜିଆବାଦର ୨୧୦୦୦ ରୁ ଅଧିକ ଲୋକଙ୍କୁ ନେଇ ଏହି ସର୍ଭେ କରାଯାଇଥିଲା । ଏହି ସର୍ଭେରେ ୩୭ ପ୍ରତିଶତ ମହିଳା ଏବଂ ୬୩ ପ୍ରତିଶତ ପୁରୁଷ ଅଂଶଗ୍ରହଣ କରିଥିଲେ । ଯେତେବେଳେ ଦିଲ୍ଲୀର ଏୟାର କ୍ୱାଲିଟି ଇଣ୍ଡେକ୍ସ ରେକର୍ଡ ସ୍ତରରେ ପହଞ୍ଚିଥିଲା ସେତେବେଳେ ଏହି ସର୍ଭେ ଆରମ୍ଭ ହୋଇଥିଲା ।  ଲୋକମାନେ କିପରି ବିଷାକ୍ତ ବାୟୁ ସହିତ ମୁକାବିଲା କରୁଛନ୍ତି ତାହା ସର୍ଭେରୁ ଜଣାପଡିଛି । ତେବେ ପ୍ରଦୂଷଣକୁ ଏଡାଇବା ପାଇଁ  କୌଣସି ବ୍ୟବସ୍ଥା  ହୋଇନଥିବା ଲୋକେ ଅଭିଯୋଗ କରିଛନ୍ତି। ଅନ୍ୟମାନେ କହିଛନ୍ତି ଯେ ରୋଗ ପ୍ରତିରୋଧକ ଶକ୍ତି ବଢାଇବା ପାଇଁ ସେମାନେ ଫଳ, ପନିପରିବା ଖାଇବା ସହ ପାଣି ପିଉଛନ୍ତି ।