ଭୁବନେଶ୍ୱର,୧୧/୧୧: ଦୀପାବଳି ଅବସରରେ ବିଏମ୍‌ସିର ଖାଦ୍ୟ ନିରାପତ୍ତା ଦଳ ଉତ୍ତର ଭୁବନେଶ୍ୱରରେ  ଖାଦ୍ୟ ଦୋକାନ ବିଶେଷ କରି ମିଷ୍ଟାନ୍ନ ଭଣ୍ଡାରଗୁଡିକୁ ଯାଞ୍ଚ  କରିଛନ୍ତି । ପ୍ରଥମେ ଚନ୍ଦ୍ରଶେଖରପୁର ପେଟ୍ରୋଲ ପମ୍ପ  ନିକଟରୁ ବାହାରି ଶୈଳଶ୍ରୀ ବିହାର, ନିଳାଦ୍ରୀ ବିହାର,  କିଟ୍‌, ପଟିଆ, ଡମଣା ଇତ୍ୟାଦି ଅଞ୍ଚଳର ପ୍ରାୟ ୨୦ଟି  ଦୋକାନକୁ ଯାଇ ଖାଦ୍ୟ ଯାଞ୍ଚ କରିଥିଲେ । ଏହି ସମୟରେ  ଉପସ୍ଥିତ ଗ୍ରାହକଙ୍କୁ ମଧ୍ୟ ଖାଦ୍ୟର ଗୁଣବତ୍ତା, ଅପମିଶ୍ରଣ,  ରଙ୍ଗ ଦିଆ ଖାଦ୍ୟ, ଫଏଲ ଚପା ହୋଇଥିବା ଖାଦ୍ୟ  ଇତ୍ୟାଦିରୁ ଦୂରେଇ ରହିବାକୁ ସଚେତନ କରାଇଥିଲେ ।  ସଂପୃକ୍ତ ଦୋକାନୀମାନଙ୍କୁ ମଧ୍ୟ ନାଗରିକଙ୍କ ସ୍ୱାସ୍ଥ୍ୟରକ୍ଷାକୁ  ଧ୍ୟାନ ଦେବାକୁ କହିଥିଲେ । 

ଖାଦ୍ୟଗୁଡିକରୁ ନମୁନା  ଆଣି ମୋବାଇଲ ଟେଷ୍ଟିଂ ଲାବ୍ରୋଟାରୀରେ ପରୀକ୍ଷା  କରାଯାଇଥିଲା । ଯାଞ୍ଚରୁ ମିଳିଥିବା ପ୍ରାୟ ୨୦-୨୫ କିଲୋ ଖରାପ ମିଠା ଦ୍ରବ୍ୟକୁ ପୋତି ନଷ୍ଟ କରିଦିଆଯାଇଛି । ୪  ଦୋକାନରୁ ୭ ହଜାର ଟଙ୍କା ଫାଇନ ଆଦାୟ କରାଯାଇଛି ।  ଫୁଡ୍‌ ସେଫ୍‌ଟି ଏବଂ ଟିମ୍‌ ସାଇନ୍‌ ଏହି ଅଭିଯାନରେ  ସାମିଲ ହୋଇଥିଲେ । ସ୍ୱତନ୍ତ୍ର ଖାଦ୍ୟ ନିରାପତ୍ତା ଅଧିକାରୀ  ସତ୍ୟଜିତ୍‌ ପଟେଲଙ୍କ ନେତୃତ୍ୱରେ ଯାଞ୍ଚ ଚାଲିଥିଲା ।