କଟକ,୦୭/୦୫: ରାତି ଅଧରେ ମଦ ପିଇ କାର୍ ଚଳାଇବା କିଛି ଗାଡ଼ି ଚାଳକଙ୍କୁ ମହଙ୍ଗା ପଡ଼ିଛି । ଟ୍ରାଫିକ୍ ଓ ଆର୍ଟିଓ ପକ୍ଷରୁ ମିଳିତ ଭାବେ ଯାଞ୍ଚ୍ କରାଯାଉଛି । ଆଉ ଏହି କ୍ରମରେ ପ୍ରାୟ ୨୧ଟି ଦାମୀ କାର୍ ପୁଲିସ ପକ୍ଷରୁ ଜବତ କରାଯାଇଛି । ସେଗୁଡ଼ିକ କୋର୍ଟରୁ ଜାମିନ ଆଣିବା ପରେ ଖଲାସ କରାଯିବ ବୋଲି ଟ୍ରାଫିକ୍ ଏସିପି ସୁଶାନ୍ତ ସିଂହ ସୂଚନା ଦେଇଛନ୍ତି ।
ଗତ ଦେଢ଼ ମାସ ହେବ ନିର୍ବାଚନ ପ୍ରକ୍ରିୟା ଚାଲିବା ପରଠୁ ରାତିରେ ମଦ୍ୟପ ଗାଡ଼ି ଚାଳକଙ୍କ ଉପରେ ପୁଲିସ କଡ଼ା ନଜର ରଖିଛି । ପ୍ରତିଦିନ ରାତିରେ ଯୁଗ୍ମ ଭାବେ ପୁଲିସ ଓ ଆର୍ଟିଓଙ୍କ ପକ୍ଷରୁ ମଦ୍ୟପ ଗାଡ଼ି ଚାଳକ ଧରପଗଡ଼ କରାଯାଉଛି । ମଧୁପାଟଣା ଟ୍ରାଫିକ୍ ଛକ, ବେଲିଭିଉ ଛକ, ଯୋବ୍ରା ଆନିକଟ ଛକ ପାଖରେ ଯାଞ୍ଚ୍ କରାଯାଉଛି । ଆଉ ମେସିନ୍ରେ ଚାଳକଙ୍କର ପାଟି ଯାଞ୍ଚ୍ କରିବା ପରେ ଯାହାର ରିପୋର୍ଟ ପଜିଟିଭ୍ ଓ ମାତ୍ରାଧିକ ମଦ୍ୟପାନ କରୁଥିବା ଜଣାପଡ଼ୁଛି ସେମାନଙ୍କୁ ତୁରନ୍ତ ଗାଡ଼ିରୁ ଓହ୍ଲାଇ ଦିଆଯାଉଛି ।
ଏପରିକ ଗାଡ଼ିକୁ ଜବତ କରି ଉଭୟ ଚାଳକ ଓ ଗାଡ଼ି ନାଁରେ ମାମଲା ରୁଜୁ ହେଉଛି । ଆଉ ଏଭଳି ଭାବେ ମଦ ପିଇ ଗାଡ଼ି ଚଲାଇବା ଅଭିଯୋଗରେ ପୁଲିସ ପକ୍ଷରୁ ୩୦ରୁ ଅଧିକ କାର୍ ଜବତ କରାଗଲାଣି । ଏହା ମଧ୍ୟରୁ ପ୍ରାୟ ୧୦ଟି କାର୍ ଜାମିନ ମିଲିବା ପରେ ଖଲାସ ହୋଇଛି । ମାତ୍ର ଏବେ ମଧୁପାଟଣା ଟ୍ରାଫିକ୍ ଥାନା ପରିସରରେ ପ୍ରାୟ ୨୧ଟି ଦାମୀ କାର୍ ଜବତ ହୋଇ ପଡ଼ିଛି । ସେସବୁ କାର୍ ଗୁଡ଼ିକରେ ପୁଲିସ ଷ୍ଟିକର ମାରିଛି। ‘ମଦ୍ୟପାନ ବେଳେ ଗାଡ଼ି ଜବତ’ ବୋଲି ପୁଲିସ ଉକ୍ତ ଷ୍ଟିକର୍ରେ ଲେଖିଛି । ଗୁରୁତ୍ୱପୂର୍ଣ୍ଣ ହେଉଛି, ଗାଡ଼ି ଗୁଡ଼ିକ ଜାମିନ ଏବେ ହୋଇପାରନି । ଦାୟିତ୍ୱରେ ଥିବା ମାଜିଷ୍ଟ୍ରେଟ୍ ଛୁଟିରେ ଥିବାରୁ ଜାମିନ ହେଉନି ଓ ଅନ୍ୟପଟେ ଜବତ ଗାଡ଼ି ସଂଖ୍ୟା ବଢ଼ିବଢ଼ି ଚାଲିଛି । ସ୍ଥିତି ଏମତି ହେଲାଣିଯେ, ମଧୁପାଟଣା ଥାନା ପରିସରରରେ କାର୍ ରଖିବାକୁ ସ୍ଥାନ ନାହିଁ ।
