ଭଦ୍ରକ, ୧୫/୦୮ : ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ବୈତରଣୀ ଓ ସାଳନ୍ଦୀ ନଦୀରେ ବନ୍ୟା ସୃଷ୍ଟି ହୋଇଛି। ବୈତରଣୀ ନଦୀର ଜଳସ୍ତର ବିପଦ ସଙ୍କେତ ଉପରେ ପ୍ରବାହିତ ହେଉଛି। ଆଖୁଆପଦା ଠାରେ ଥିବା ବିପଦ ସଙ୍କେତ ୧୭.୮୩ ଥିବାବେଳେ ସଖାଳ ୫ଟା ସୁଦ୍ଧା ୧୮.୫୭ ମିଟରରେ ବନ୍ୟା ଜଳ ପ୍ରବାହିତ ହେଉଥିଲା। ତେବେ ବୈତରଣୀ ନଦୀର ବନ୍ୟାଜଳ କଣ୍ଟି ଘାଇ ଦେଇ ନିଷ୍କାସିତ ହେଉଛି। ଫଳରେ ଭଣ୍ଡାରିପୋଖରୀ ବ୍ଲକର ରହଣିଆ, ମାଲଦା, ଷୋଳମପୁର, ନପଙ୍ଗ, କୁରିଗାଁ ପଞ୍ଚାୟତ ବନ୍ୟା ପ୍ରଭାବିତ ହୋଇଛି। ଚାଷ ଜମି ସବୁ ଜଳମଗ୍ନ ହୋଇଯାଇଛି। ପ୍ରାୟ ୫୦ଟି ଗାଁ ବନ୍ୟା ପ୍ରଭାବିତ ହୋଇଥିବା ସୂଚନା ମିଳିଛି।
ସେହିପରି ଭଦ୍ରକ ସହର ଦେଇ ପ୍ରବାହିତ ସାଳନ୍ଦୀ ନଦୀର ଜଳସ୍ତର ଗତ ଚାରି ଦିନ ହେବ ବୃଦ୍ଧି ପାଇବାରେ ଲାଗିଛି। ଏହି ନଦୀର ଉପର ମୁଣ୍ଡରେ ଥିବା ହଦଗଡ଼ ଡ୍ୟାମରୁ ତିନି ଗୋଟି ଗେଟ୍ ଦେଇ ୨୪୦୦ କ୍ୟୁସେକ୍ ଜଳ ସାଳନ୍ଦୀ ନଦୀ ମଧ୍ୟକୁ ଛଡାଯାଉଛି। ସେହିପରି ଧାମନଗର ବ୍ଲକର ମଲିମାହାରା ରେ ବନ୍ୟା ପରିସ୍ଥିତି ସୃଷ୍ଟି ହୋଇଛି। ସୋହଡ଼ା, କରଦା, ପଧାନୀ ପଞ୍ଚାୟତରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ସେହିପରି ତିହିଡି ବ୍ଲକର କେତେକ ଅଞ୍ଚଳକୁ ବନ୍ୟାଜଳ ପ୍ରବେଶ କରିଥିବା ସୂଚନା ମିଳିଛି ।