ନୂଆଦିଲ୍ଲୀ, ୮।୮: ଏଆଇ ଆସିବା ପରେ ଟେକ୍ନୋଲୋଜି ଜଗତରେ ଦିନକୁ ଦିନ ଅନେକ ସଫଳତା ଦେଖିବାକୁ ମିଳୁଛି । ଅନେକ ଏହାର ନକାରତ୍ମକ ପ୍ରଭାବ ବଖାଣିଲେ ତ କିଛି ଲୋକ ଏହାକୁ ଉପଯୁକ୍ତ କାର୍ଯ୍ୟରେ ଲଗାଇଛନ୍ତି । ଅଫିସ୍ଠୁ ଆରମ୍ଭ କରି ମେଡିକାଲ କ୍ଷେତ୍ରରେ ମଧ୍ୟ ଏହାର ସଫଳ ଯୋଗଦାନ ଦେଖିବାକୁ ମିଳୁଛି । ଏବେ ବୈଜ୍ଞାନିକଙ୍କୁ ମଧ୍ୟ ଅନେକ ସଫଳତା ମିଳିବାକୁ ଲାଗିଛି । ନିକଟରେ ଏଆଇ ଏକ ଏଭଳି କାର୍ଯ୍ୟ କରିଛି ଯାହା ପ୍ରଶଂସା ଯୋଗ୍ୟ । ଏଆଇ ସାହାଯ୍ୟରେ ୧୮ ବର୍ଷ ପରେ ଜଣେ ମହିଳା କଥା କହିବାରେ ସକ୍ଷମ ହୋଇପାରିଛନ୍ତି । ଏହି ମହିଳା ଜଣକ ହେଉଛନ୍ତି ୪୮ ବର୍ଷୀୟା ଆନ୍ ଜନ୍ସନ୍ । ୩୦ ବର୍ଷ ବୟସରେ ତାଙ୍କୁ ବ୍ରେନ୍ ଷ୍ଟ୍ରୋକ୍ ହୋଇଥିଲା । ଯାହା ଫଳରେ ସେ ପାରାଲିସସ୍ ପୀଡ଼ିତ ହେଲେ । ଏଥିଯୋଗୁଁ ସେ କଥା କହିପାରୁନଥିଲେ । ଏପରିକି ଶ୍ୱାସକ୍ରିୟାରେ ମଧ୍ୟ ତାଙ୍କୁ ଅସୁବିଧା ହେଉଥିଲା ।
ଏବେ ଏଆଇ ତାଙ୍କ ଜୀବନ ବଦଳାଇ ଦେଇଛି । ତାଙ୍କ ମସ୍ତିଷ୍କରେ ପାଖାପାଖି ୨୫୦ଟି ଇଲେକ୍ଟ୍ରୋନିକ୍ ତାର ଇମପ୍ଲାଣ୍ଟ କରାଯାଇଛି । ଏହି ଇଲେକ୍ଟ୍ରୋନିକ୍ ତାର ମସ୍ତିଷ୍କର ସ୍ପିଚ୍ ପ୍ରୋସେସିଂ କ୍ଷେତ୍ରକୁ ଘାରି ରହିଛି । ମସ୍କିଷ୍କ ପଠାଉଥିବା ସଙ୍କେତକୁ କମ୍ପ୍ୟୁଟର ସାହାଯ୍ୟରେ ସଂଯୋଗ ଯାଇଥିଲା । ଏହାପରେ ଜନ୍ସନ୍ଙ୍କୁ କିଛି ଚିତ୍ର ଦେଖାଯାଇଥିଲା ଏବଂ ତାହା କେଉଁ ସଙ୍କେତ ସେ ବାବଦରେ ଜନ୍ସନ୍ କହିବାକୁ ସକ୍ଷମ ହୋଇଥିଲେ । ଏଆଇ ସାହାଯ୍ୟରେ ଜନ୍ସନ୍ଙ୍କ ନିଜ ମନର ଭାବ ଓ ଚିନ୍ତାଧାରା ମଧ୍ୟ ପ୍ରକାଶ କରିପାରୁଛନ୍ତି । ଏହାର ଏକ ମଧ୍ୟ ଭିଡିଓ ସୋସିଆଲ ମିଡିଆରେ ସେୟାର କରାଯାଇଛି । ଏହି ସଙ୍କେତକୁ ଚିହ୍ନିବାକୁ ଜନ୍ସନ୍ ଏଆଇର ସାହାଯ୍ୟ ନେଇଥିଲେ ।
ଏଆଇ ଜନ୍ସନ୍ଙ୍କ ମସ୍ତିଷ୍କର ପରିଚାଳନାକୁ ନେଇ ପ୍ରତି ମିନିଟ୍କୁ ୮୦ଟି ଶବ୍ଦ ଅନୁବାଦ କରିଥାଏ । ଏଆଇ ଜନ୍ସନ୍ଙ୍କ ଆଖିର ଗତିବିଧିକୁ ଏଆଇ ଟ୍ରାକ୍ କରିଥାଏ । ରିସର୍ଚ୍ଚ ଅନୁସାରେ, ୭୫ ପ୍ରତିଶତ ସଠିକ୍ ଅନୁବାଦ କରିବାକୁ ଏଆଇ ସକ୍ଷମ ହୋଇପାରୁଛି । କମ୍ପ୍ୟୁଟରରେ ଦେଖାଉଥିବା ଏହି ଏଆଇ ମଡେଲ୍ ଜନ୍ସନ୍ଙ୍କ ନକଲ ମଧ୍ୟ କରୁଛି । ପୂର୍ବରୁ ଜନ୍ସନ୍ ଅନେକ ଫିଜିକାଲ୍ ଥେରାପି ନେଇଥିଲେ ମଧ୍ୟ କୌଣସି ସଫଳତା ମିଳିନଥିଲା । କିନ୍ତୁ, ବର୍ତ୍ତମାନ ଏଆଇ ତାଙ୍କୁ ନୂଆ ଜୀବନ ଦେଇଛି । ଜନ୍ସନ୍ଙ୍କର ଦୁଇଟି ପୁଅ, ଝିଅ ଥିବାବେଳେ ତାଙ୍କ ବିବାହକୁ ୨୬ ବର୍ଷ ବିତିଲାଣି । ତେବେ କିଛି ମାସ ପୂର୍ବରୁ ନେଦରଲ୍ୟାଣ୍ଡରେ ଜଣେ ୪୦ ବର୍ଷୀୟ ବ୍ୟକ୍ତି ଏଆଇ ସାହାଯ୍ୟରେ ଚାଲିବାକୁ ସକ୍ଷମ ହୋଇଥିଲେ ।
