ନୂଆଦିଲ୍ଲୀ,୧୭/୧୨: ପାକିସ୍ତାନ ପୁଣି ଅଶାନ୍ତ ହୋଇଛି । ପାକିସ୍ତାନ ରାୱଲପିଣ୍ଡ ସ୍ଥିତ ଆଦିଆଲା ଜେଲ୍ ବାହାରେ ହାଇଡ୍ରାମା ଦେଖିବାକୁ ମିଳିଛି । ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନଙ୍କ ଭଉଣୀ ଏବଂ ତାଙ୍କ ପାର୍ଟି ପାକିସ୍ତାନ ତହେରିକ-ଏ-ଇନସାଫର ସମର୍ଥକଙ୍କ ଉପରେ ପଞ୍ଜାବ ପୁଲିସ୍ ୱାଟର କେନନରେ କେମିକାଲ ମିଶା ପାଣି ମାଡ଼ କରିଛି । ଶୀତ ଦିନ ଚାଲିଥିବା ବେଳେ ଏହି କାର୍ଯ୍ୟାନୁଷ୍ଠାନରେ ପ୍ରଦର୍ଶନକାରୀଙ୍କ ଅବସ୍ଥା ଶୋଚନୀୟ ହୋଇଛି । ଇମ୍ରାନ ଖାନଙ୍କ ଭଉଣୀ ଅଲିମା ଖାନ କହିଛନ୍ତି ଯେ, ନ୍ୟାୟପାଳିକାର ସ୍ୱାଧୀନତା ଛଡ଼ାଇ ନିଆଯାଇଛି । ଦେଶରେ ବେକାରୀ ବୃଦ୍ଧି ପାଉଛି, ଏବଂ ସୁରକ୍ଷା ପରିସ୍ଥିତି ଖରାପ ହେଉଛି ।
ପାକିସ୍ତାନ ଆଦିଆଲା ଜେଲ୍ ଥିବା ପୂର୍ବତନ ପ୍ରଧାନମନ୍ତ୍ରୀ ଇମରାନ ଖାନଙ୍କ ସମର୍ଥକମାନେ ଚରମ ନିର୍ଯାତନାର ଶିକାର ହୋଇଛନ୍ତି । ପାକିସ୍ତାନ ତେହେରିକ୍-ଏ-ଇନସାଫ (ପିଟିଆଇ) ମୁଖ୍ୟ ଇମରାନ ଖାନ ଆଦିୟାଲା ଜେଲରେ ବନ୍ଦୀ ଅଛନ୍ତି । ପିଟିଆଇ ନେତା ଏବଂ ତାଙ୍କ ଭଉଣୀମାନଙ୍କ ନେତୃତ୍ୱରେ ତାଙ୍କ ସମର୍ଥନରେ ଜେଲ ବାହାରେ ବହୁ ସଂଖ୍ୟକ ସମର୍ଥକ ଏକାଠି ହୋଇଥିଲେ । ଅଭିଯୋଗ ହୋଇଛି ଯେ, ଏହି ପ୍ରତିବାଦ ସମୟରେ ଇମରାନଙ୍କ ସମର୍ଥକମାନଙ୍କ ଉପରେ ରାସାୟନିକ ମିଶ୍ରିତ ପାଣି ସ୍ପ୍ରେ କରାଯାଇଥିଲା । ଏହି ଘଟଣାର ଫୁଟେଜ୍ ମଧ୍ୟ ସାମ୍ନାକୁ ଆସିଛି । ଏହା ଇମ୍ରାନ ଖାନଙ୍କ ସମର୍ଥକମାନଙ୍କ କ୍ରୋଧକୁ ଆହୁରି ବଢ଼ାଇ ଦେଇଛି ଏବଂ ସରକାର ଏବଂ ସେନା ବିରୋଧରେ ପ୍ରତିବାଦ ଅଧିକ ହିଂସାତ୍ମକ ହେବାର ସମ୍ଭାବନା ରହିଛି ।
ଅନେକ ଗମ୍ଭୀର ଅଭିଯୋଗରେ ଇମରାନ ଖାନଙ୍କୁ ଜେଲରେ ରଖାଯାଇଛି। ତାଙ୍କ ବିରୁଦ୍ଧରେ ଚରମ ନିର୍ଯାତନାର ରିପୋର୍ଟ ମଧ୍ୟ ସାମ୍ନାକୁ ଆସିଛି, ଯାହା ଗୁଜବକୁ ପ୍ରୋତ୍ସାହିତ କରୁଛି । ରିପୋର୍ଟ ଅନୁଯାୟୀ, ଆଦିୟାଲା ଜେଲ ବାହାରେ ପ୍ରଦର୍ଶନକାରୀଙ୍କ ଉପରେ ରାସାୟନିକ ମିଶ୍ରିତ ପାଣି ଫିଙ୍ଗା ଯାଇଥିଲା । ଇମରାନ ଖାନଙ୍କ ଦଳ, ପିଟିଆଇ, ଅଭିଯୋଗ କରିଛି ଯେ ପ୍ରବଳ ଥଣ୍ଡା ସତ୍ତ୍ୱେ, ପୁଲିସ ପାଣି ମାଡ କରିଛି । ଦଳ ଏହାକୁ ମହିଳା ପ୍ରଦର୍ଶନକାରୀ ଏବଂ ସାଧାରଣ ନାଗରିକଙ୍କ ପ୍ରତି ଏକ ଅତ୍ୟାଚାର ବୋଲି କହିଛି । ଏହି କାର୍ଯ୍ୟ ଆଇନ ଏବଂ ଶୃଙ୍ଖଳା ନାମରେ ଦମନର ଏକ ଉଦାହରଣ । ଇମରାନ ଖାନଙ୍କ ଭଉଣୀ, ଦଳୀୟ ନେତା ଏବଂ ସମର୍ଥକମାନେ ତାଙ୍କ ସହିତ ସାକ୍ଷାତ ଦାବି କରି ଶାନ୍ତିପୂର୍ଣ୍ଣ ପ୍ରତିବାଦ ପାଇଁ ଏକାଠି ହେଉଥିବା ସମୟରେ ସେମାନଙ୍କ ଉପରେ ଅତ୍ୟାଚାର କରାଯାଇଥିବା କହିଛି ପିଟିଆଇ ।
ହାଇକୋର୍ଟଙ୍କ ଆଦେଶକୁ ଉଲ୍ଲଂଘନ କରୁଛି ପୁଲିସ- ମାର୍ଚ୍ଚ ୨୦୨୫ରେ, ଇସଲାମାବାଦ ହାଇକୋର୍ଟ ନିର୍ଦ୍ଦେଶ ଦେଇଥିଲେ ଯେ, ଇମରାନ ଖାନଙ୍କୁ ସପ୍ତାହରେ ଦୁଇଥର, ମଙ୍ଗଳବାର ଏବଂ ଗୁରୁବାର ଦିନ ତାଙ୍କ ପରିବାର ସହିତ ସାକ୍ଷାତ କରିବାକୁ ଅନୁମତି ଦିଆଯିବ। ତଥାପି, ପିଟିଆଇ ଦାବି କରିଛି ଯେ, ଏହି ନିର୍ଦ୍ଦେଶକୁ ଠିକ୍ ଭାବରେ ପାଳନ କରାଯାଉ ନାହିଁ । ପ୍ରତିବାଦକାରୀମାନେ ଏହି ନିର୍ଦ୍ଦେଶକୁ କାର୍ଯ୍ୟକାରୀ କରିବାକୁ ଦାବି କରୁଥିଲେ । ପିଟିଆଇ ଏହି ପୁଲିସ କାର୍ଯ୍ୟାନୁଷ୍ଠାନର ତୀବ୍ର ନିନ୍ଦା କରିଛି । ଦଳ ଅଭିଯୋଗ କରିଛି ଯେ, ପୋଲିସ ମହିଳା, ବୟସ୍କ ବ୍ୟକ୍ତି ଏବଂ ସାଧାରଣ ନାଗରିକଙ୍କୁ ରାସାୟନିକ ମିଶ୍ରିତ ପାଣି ମାଡ଼ କରିଛି । କିଛି କର୍ମୀଙ୍କୁ ମାଡ଼ ମଧ୍ୟ ମରାଯାଇଛି । ଅନେକଙ୍କୁ ଅଟକ ରଖାଯାଇଥିଲା । ଦମନର ଏକ ନୂତନ ଉଦାହରଣ ସ୍ଥାପନ କରୁଛନ୍ତି ସରକାର ଏବଂ ସେନା ।
