ନୂଆଦିଲ୍ଲୀ,୨୮/୦୯: ପୁଣିଥରେ କାଶ୍ମୀର ପ୍ରସଙ୍ଗ ଉଠାଇଲେ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ। ଯାହାର କଡା ଜବାବ ଦେଇଛି ଭାରତ । ମିଳିତ ଜାତିସଂଘ ସାଧାରଣ ସଭାରେ (ୟୁଏନଜିଏ) ଭାରତୀୟ  କୂଟନୀତିଜ୍ଞ ଭାବିକା ମଙ୍ଗଳନନ୍ଦନ  ୟୁଏନଜିଏରେ 'ଉତ୍ତର ଦେବାର ଅଧିକାର' ରେ ପାକିସ୍ତାନୀ ପ୍ରଧାନମନ୍ତ୍ରୀଙ୍କ ବିବୃତ୍ତିକୁ ସମାଲୋଚନା କରିଛନ୍ତି। ସେ ତାଙ୍କ ଭାଷଣକୁ ହାସ୍ୟାସ୍ପଦ ବୋଲି କହିଛନ୍ତି।

ସେ ତାଙ୍କ ଜବାବରେ ଆହୁରି ମଧ୍ୟ କହିଛନ୍ତି ଯେ, ଆଜି ସକାଳେ  ଏହି ସଭାରେ ଏକ ହାସ୍ୟାସ୍ପଦ ଘଟଣା ଦେଖିବାକୁ ମିଳିଥିଲା ।ଆତଙ୍କବାଦ, ନିଶା, ବାଣିଜ୍ୟ ଏବଂ ଆନ୍ତର୍ଜାତୀୟ ଅପରାଧ ପାଇଁ ବିଶ୍ୱରେ ଖ୍ୟାତି ଅର୍ଜନ କରିଥିବା ଏକ ସାମରିକ ଚାଳିତ ଦେଶ ବିଶ୍ୱର ସର୍ବବୃହତ ଗଣତନ୍ତ୍ର ଉପରେ ଆକ୍ରମଣ କରିବାକୁ ସାହସ କରିଥିଲା।  ଯେପରି ସମଗ୍ର ବିଶ୍ୱ ଜାଣିଛି ଯେ, ପାକିସ୍ତାନ ଦୀର୍ଘ ଦିନ ଧରି ସୀମା ଆତଙ୍କବାଦକୁ ପଡୋଶୀ ଦେଶ ବିରୁଦ୍ଧରେ ଅସ୍ତ୍ର ଭାବରେ ବ୍ୟବହାର କରିଆସୁଛି। ଏହା ଆମର ସଂସଦ, ଆମର ଆର୍ଥିକ ରାଜଧାନୀ ମୁମ୍ବାଇ, ବଜାର ଏବଂ ତୀର୍ଥଯାତ୍ରା ମାର୍ଗ ଉପରେ ଆକ୍ରମଣ କରିଥିଲା । ଏହାର ତାଲିକା ବହୁତ ଲମ୍ବା ଅଟେ । ଏପରି ଦେଶ କୌଣସି ସ୍ଥାନରେ ହିଂସା ବିଷୟରେ ଆଲୋଚନା କରିବା ଉଚିତ ନୁହେଁ ବୋଲି ସେ କହିଛନ୍ତି।

ଭାବିକା ଆହୁରି ମଧ୍ୟ କହିଛନ୍ତି ଯେ, କ ନିର୍ବାଚନ ଇତିହାସ ଥିବା ଦେଶ ପାଇଁ ଗଣତନ୍ତ୍ରରେ ରାଜନୈତିକ ବିକଳ୍ପ ବିଷୟରେ ଆଲୋଚନା କରିବା ଆହୁରି ଅସାଧାରଣ ଅଟେ । ପ୍ରକୃତ ସତ୍ୟ ହେଉଛି ପାକିସ୍ତାନ ଆମ ଅଞ୍ଚଳକୁ ଲୋଭ କରିଥାଏ ଏବଂ ବାସ୍ତବରେ ଭାରତର ଏକ ଅବିଚ୍ଛେଦ୍ୟ ଅଙ୍ଗ ଜାମ୍ମୁ କାଶ୍ମୀରରେ ନିର୍ବାଚନକୁ ଭଣ୍ଡୁର କରିବା ପାଇଁ ଆତଙ୍କବାଦ ବ୍ୟବହାର କରିଆସୁଛି। ପ୍ରକାଶ ଥାଉକି, ସେହିପରି ଏହା ପୂର୍ବରୁ ନିୟୁର୍କରେ  UNGAର ୭୯ ତମ ଅଧିବେଶନକୁ ସମ୍ବୋଧିତ କରିବାବେଳେ ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫ କାଶ୍ମୀର ପ୍ରସଙ୍ଗ ଉଠାଇଥିଲେ।