ଜେରୁଜେଲମ୍/ବିରୁଟ୍,୨୭/୦୯: ଇସ୍ରାଏଲ୍-ଲେବାନନ୍ ଯୁଦ୍ଧ ରୋକିବାକୁ ଚାହୁଁଥିବା ଆମେରିକା ଓ ଫ୍ରାନ୍ସର ସବୁ ଉଦ୍ୟମ ପଣ୍ଡ ହୋଇଛି । ଯୁଦ୍ଧବିରତି ପାଇଁ ସେମାନେ ଯେଉଁ ପ୍ରସ୍ତାବ ଦେଇଥିଲେ, ତାହାକୁ ଅଗ୍ରାହ୍ୟ କରିଦେଇଛି ଇସ୍ରାଏଲ୍ । ଲେବାନନ୍ ଉପରେ ପ୍ରଚଣ୍ଡ ତଥା ପୂର୍ଣ୍ଣାଙ୍ଗ ଆକ୍ରମଣ ଲାଗି ନିର୍ଦ୍ଦେଶ ଦିଆଯାଇଛି । ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଯୁଦ୍ଧ ରୋକିବା ପାଇଁ ରୋକ୍ଠୋକ୍ ମନାକରି ଦେଇଛନ୍ତି । ହିଜ୍ବୁଲ୍ଲାକୁ ସମ୍ପୂର୍ଣ୍ଣ ଧ୍ୱଂସ ନ କରିବା ଯାଏ ସଙ୍ଘର୍ଷ ଜାରି ରହିବ ବୋଲି ଦେଇଛନ୍ତି ହୁଙ୍କାର । ଦେଶର ସ୍ଥଳସେନାକୁ ଦକ୍ଷିଣ ଲେବାନନ୍ରେ ପଶି ପ୍ରଚଣ୍ଡ ଆକ୍ରମଣ ଲାଗି କୁହାଯାଇଛି ।
ନେତନ୍ୟାହୁଙ୍କ କାର୍ଯ୍ୟାଳୟ ପକ୍ଷରୁ କୁହାଯାଇଛି ଯେ ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଏଣିକି ସମସ୍ତ ବଳ ଖଟାଇ ସେନା ଲେବାନନ୍ରେ ଯୁଦ୍ଧ ଜାରି ରଖିବ । ଗାଜାରେ ଯେମିତି ଇସ୍ରାଏଲୀ ସେନା ପଶି ଧ୍ୱଂସଲୀଳା ରଚିଥିଲେ, ସେମିତି ଲେବାନନ୍ରେ ଦେଖିବାକୁ ମିଳିବ । ଇସ୍ରାଏଲ୍ର ବିଦେଶ ମନ୍ତ୍ରୀ ଇସ୍ରାଏଲ୍ କାଟ୍ଜ ଗୁରୁବାର ଆମେରିକା ଓ ଫ୍ରାନ୍ସର ପ୍ରସ୍ତାବକୁ ଅଗ୍ରାହ୍ୟ କରିଦେଇଛନ୍ତି ।ସୋସିଆଲ୍ ମିଡିଆ ବାର୍ତ୍ତାରେ ସେ କହିଛନ୍ତି, ଉତ୍ତର ଭାଗରେ ଯୁଦ୍ଧବିରତିର ପ୍ରଶ୍ନ ଉଠୁନାହିଁ । ହିଜ୍ବୁଲ୍ଲା ଆତଙ୍କବାଦୀ ସଙ୍ଗଠନ ବିରୋଧରେ ଆମର ଯୁଦ୍ଧ ଜାରି ରହିବ । ସମ୍ପୂର୍ଣ୍ଣ ବିଜୟ ପ୍ରାପ୍ତ ନ ହେବା ଯାଏ ଆମେ ସମସ୍ତ ବଳ ଲଗାଇ ଆକ୍ରମଣ ଜାରି ରଖିବୁ ।
‘ୱିଙ୍ଗ୍ ଅଫ୍ ଜିଅନ୍’ ବିମାନରେ ବୈଠକ କରି ନେତନ୍ୟାହୁ ସେନାକୁ ପ୍ରଚଣ୍ଡ ଆକ୍ରମଣ ଲାଗି ନିର୍ଦ୍ଦେଶ ଦେଇଥିଲେ । ନେତନ୍ୟାହୁଙ୍କ ନିର୍ଦ୍ଦେଶ ମିଳିବା କ୍ଷଣି ଇସ୍ରାଏଲ୍ ଡିଫେନ୍ସ ଫୋର୍ସ (ଆଇଡିଏଫ୍) ବୁଧବାର ରାତିତମାମ ଲେବାନନ୍ର ବେକା ଉପତ୍ୟକା ଓ ଦକ୍ଷିଣ ଲେବାନନ୍ରେ ଥିବା ହିଜ୍ବୁଲ୍ଲାର ୭୫ ଆଡ୍ଡା ଉପରେ ଆକ୍ରମଣ କରିଥିଲା । ଏହାଯୋଗୁ ବିପୁଳ ଅସ୍ତ୍ରଶସ୍ତ୍ର ନଷ୍ଟ ହୋଇଯାଇଛି । ଲେବାନନ୍ର ୟୁନାଇନ୍ ସହରରେ ବୁଧବାର ରାତିରେ ଇସ୍ରାଏଲ୍ ଏକ ୩ ମହଲା ଅଟ୍ଟାଳିକା ଉପରେ ମିସାଇଲ୍ ମାଡ଼ କରିବାରୁ ୨୩ ଜଣ ପ୍ରାଣ ହରାଇଛନ୍ତି । ମୃତକଙ୍କ ମଧ୍ୟରେ ଅଧିକାଂଶ ମହିଳା ଓ ପିଲା ଥିଲେ । ସମସ୍ତେ ସିରିୟାର ଥିଲେ । ଲେବାନନ୍ରେ ଏବେ ପ୍ରାୟ ୧୫ ଲକ୍ଷ ସିରିୟା ଲୋକ ରହୁଛନ୍ତି । ଗୃହଯୁଦ୍ଧ ବେଳେ ସେମାନେ ଦେଶ ଛାଡ଼ି ପଳାଇ ଆସିଥିଲେ । ଇସ୍ରାଏଲ୍ ସେନା ମୁତାବକ, ହିଜ୍ବୁଲ୍ଲାର ଅନେକ ଡଜନ୍ ଟାର୍ଗେଟ୍କୁ ଆକ୍ରମଣ କରାଯାଇଥିଲା । ଏଥିରେ ସାମରିକ କାର୍ଯ୍ୟାଳୟ ଏବଂ ଅସ୍ତ୍ରଶସ୍ତ ଡିପୋ ଆଦିକୁ ଧ୍ୱଂସ କରି ଦିଆଯାଇଛି । ଏହାଛଡ଼ା ହିଜ୍ବୁଲ୍ଲାର ଆଉ ଜଣେ କମାଣ୍ଡର ମହମ୍ମଦ ହୁସେନ୍ ସରୁର ଗୁରୁବାର ବିରୁଟ୍ରେ ନିପାତ ହୋଇଥିବା ଇସ୍ରାଏଲ୍ ସେନା ଦାବି କରିଛି । ମହମ୍ମଦ ସରୁର୍ ହିଜ୍ବୁଲ୍ଲାର ଡ୍ରୋନ୍ ୟୁନିଟ୍ ମୁଖ୍ୟ ଥିଲା ।
ସେପଟେ ହିଜ୍ବୁଲ୍ଲା ପକ୍ଷରୁ ମଧ୍ୟ ଇସ୍ରାଏଲ୍ ଉପରେ ଆକ୍ରମଣ ଜାରି ରହିଛି । ସଦ୍ୟ ଘଟଣାରେ ଏହା ଇସ୍ରାଏଲ୍ର ରାଫେଲ୍ ଫ୍ୟାକ୍ଟ୍ରି ଉପରେ ୪୫ ରକେଟ୍ ମାଡ଼ କରିଥିଲା । ପଶ୍ଚିମ ଗାଲିଲି ଅଞ୍ଚଳରେ ଏହି ଆକ୍ରମଣ ହୋଇଥିଲା । ଏହି ହମ୍ଲା ପରେ ଇସ୍ରାଏଲ୍ ସେନା ଆଲର୍ଟ ହୋଇଯାଇ ରକେଟ୍ଗୁଡ଼ିକୁ ଗତିରୋଧ କରି ଖୋଲା ଅଞ୍ଚଳରେ ଖସାଇ ଦେଇଥିଲା । ତେବେ ଇସ୍ରାଏଲ୍ର ରାଫେଲ୍ ଫ୍ୟାକ୍ଟ୍ରି ଧ୍ୱଂସ ହୋଇଯାଇଥିବା ହିଜ୍ବୁଲ୍ଲା ଦାବି କରିଛି । ୩ ଦିନରେ ଏହା ୩ଟି ବଡ଼ ଆକ୍ରମଣ କରିଥିବା କହିଛି ।
ଏହା ପୂର୍ବରୁ ନ୍ୟୁୟର୍କରେ ବୁଧବାର ଜାତିସଂଘ ସାଧାରଣ ପରିଷଦ ସଭାରେ ଇସ୍ରାଏଲ୍-ଲେବାନନ୍ ଯୁଦ୍ଧକୁ ରୋକିବା ପ୍ରସଙ୍ଗରେ ଜରୁରିକାଳୀନ ବୈଠକ ଡକାଯାଇଥିଲା । ଏଥିରେ ଆମେରିକା ଓ ଫ୍ରାନ୍ସ ୨୧ ଦିନିଆ ଯୁଦ୍ଧବିରତି ପାଇଁ ଦାବି କରିଥିଲେ । ଏହି ୨୧ ଦିନରେ ଇସ୍ରାଏଲ୍ ଓ ଲେବାନନ୍ ସହ ଆଲୋଚନା କରି ଯୁଦ୍ଧକୁ ରୋକିବା ସକାଶେ ଉଦ୍ୟମ ହେବା ନେଇ ଉଭୟ କହିଥିଲେ । ଅଷ୍ଟ୍ରେଲିଆ, କାନାଡା, ସାଉଦି ଆରବ, ସଂଯୁକ୍ତ ଆରବ ଏମିରେଟ୍ସ, କାତାର ସମେତ କିଛି ୟୁରୋପୀୟ ଦେଶ ଯୁଦ୍ଧବିରତି ଦାବିକୁ ସମର୍ଥନ କରିଥିଲେ । ବୈଠକରେ ଫ୍ରାନ୍ସ କହିଥିଲା କି ଯୁଦ୍ଧକୁ ତୁରନ୍ତ ରୋକାଯିବା ଆବଶ୍ୟକ । ଅନ୍ୟଥା ଏହା ବ୍ୟାପିବା ଆଶଙ୍କା ରହିଛି । କୂଟନୀତି ଦ୍ୱାରା ଏହାକୁ ରୋକାଯାଇ ପାରିବ ।
ରାଷ୍ଟ୍ରପତି ନେତନ୍ୟାୟୁଙ୍କ ନିର୍ଦ୍ଦେଶ ପରେ ଇସ୍ରାଏଲ୍ର ସ୍ଥଳସେନା ଲେବାନନ୍ରେ ଅନୁପ୍ରବେଶ ଲାଗି ପ୍ରସ୍ତୁତି ଚଳାଇଛନ୍ତି । ରିପୋର୍ଟ ମୁତାବକ, ଇସ୍ରାଏଲ୍ର ସେନା ମୁଖ୍ୟ ହର୍ଜାଇ ହାଲେୱି ବୁଧବାର କହିଥିଲେ କି ଲେବାନନ୍ରେ ହେଉଥିବା ଆକ୍ରମଣର ମୁଖ୍ୟ ଉଦ୍ଦେଶ୍ୟ ହେଉଛି ହିଜ୍ବୁଲ୍ଲାର ଭିତ୍ତିଭୂମି ଢାଞ୍ଚାକୁ ସମ୍ପୂର୍ଣ୍ଣ ବରବାଦ କରିଦେବା । ଏଥିଲାଗି ସ୍ଥଳଭାଗରେ ଅନୁପ୍ରବେଶ ଲାଗି ରାସ୍ତା ସନ୍ଧାନ କରାଯାଉଛି । ହାଲେୱି କହିଥିଲେ, ଇସ୍ରାଏଲୀ ସେନା ହିଜ୍ବୁଲ୍ଲାର ଅଞ୍ଚଳରେ ପଶି ସୈନ୍ୟ ଘାଟିଗୁଡ଼ିକୁ ବରବାଦ କରିଦେବ । ସେତେବେଳେ ସେମାନେ ଚେତିବେ ଯେ ଇସ୍ରାଏଲ୍ ସେନାର ସାମ୍ନା କରିବାର ପରିଣତି କ’ଣ । ହିଜ୍ବୁଲ୍ଲାର ଆକ୍ରମଣ ଯୋଗୁ ଇସ୍ରାଏଲ୍ର ଲୋକଙ୍କୁ ଘର ଛାଡ଼ିବାକୁ ପଡ଼ିଥିଲା ।
ଇସ୍ରାଏଲ୍ର ପ୍ରତିରକ୍ଷା ମନ୍ତ୍ରୀ ୟୋଆଭ୍ ଗାଲାଣ୍ଟ କହିଛନ୍ତି, ହିଜ୍ବୁଲ୍ଲାକୁ ଶେଷ କରିଦେବା ପାଇଁ ଆମ ପାଖରେ ‘ଅତିରିକ୍ତ ମିଶନ’ ରହିଛି । ଉତ୍ତର ଇସ୍ରାଏଲ୍ରେ ରହୁଥିବା ଲୋକେ ଯେମିତି ସୁରକ୍ଷିତ ଭାବେ ସେମାନଙ୍କ ଘରକୁ ଫେରିବେ, ତାହା ସୁନିଶ୍ଚିତ ପାଇଁ ଆମେ ସବୁ ମିଶନକୁ ଉପଯୋଗ କରିବାକୁ ପ୍ରସ୍ତୁତ । ଉଲ୍ଲେଖଯୋଗ୍ୟ, ଗତବର୍ଷ ଅକ୍ଟୋବର ୮ରୁ ଇସ୍ରାଏଲ୍-ଲେବାନନ୍ ମଧ୍ୟରେ ଯୁଦ୍ଧ ଲାଗିରହିଛି । ଇସ୍ରାଏଲ୍-ହମାସ୍ ସଙ୍ଘର୍ଷରୁ ଏହାର ସୂତ୍ରପାତ ହୋଇଥିଲା ।
