ଭୁବନେଶ୍ୱର,୨୯/୦୨: ଦୀର୍ଘ ୧୦ ଦିନର  ଲୀଳାଖେଳା ଗୁରୁବାର ସରିବ । ଖଣ୍ଡଗିରିରୁ ବିଦାୟ ନେବେ ୬ ଅପେରା ପାର୍ଟି । ବୁଧବାର ନବମ ରଜନୀରେ କେବଳ ‘ସୂର୍ଯ୍ୟ ମନ୍ଦିର’ ଓ  ‘ଶିବାନୀ’ ନିଜ ନିଜ କାହାଣୀ ବଦଳାଇଛନ୍ତି । ରଙ୍ଗ ମହଲ ‘ମୁଁ ଗୋଟେ ଝିଅର ବାପା’ ନୂଆ ନାଟକ ୨ ଦିନ ଧରି ମଞ୍ଚସ୍ଥ କରିବା ପରେ ଏହି  ନାଟକ ମଞ୍ଚସ୍ଥ କରି ବିଦାୟ ନେବ । ବାକି ୩ଟି  ପାର୍ଟି ସେମାନଙ୍କ ପୁରୁଣା କାହାଣୀ ବୁଧବାର ଓ  ଗୁରୁବାର ମଞ୍ଚସ୍ଥ କରି ମେଲାଣି ନେବେ । ଶିବାନୀ ବୁଧବାର ‘ଅଲିଅଳୀ ରାଜଜେମା’  ଦର୍ଶକଙ୍କୁ ଭେଟି ଦେଇଥିଲା । ନାଟକଟିକୁ ରଚନା  କରିଛନ୍ତି ଅରୁଣ ନାୟକ ଓ ନିର୍ଦ୍ଦେଶନା ଦେଇଛନ୍ତି  ମହେଶ ହାଜରା । 

ସେହିପରି ‘ସୂର୍ଯ୍ୟ ମନ୍ଦିର’  ଶେଷ ୨ରାତି ‘ହାତ ଧରି ବାଟ ଚାଲୁଥିବା’ ମଞ୍ଚସ୍ଥ  କରି ବିଦାୟ ନେବ । ‘ସ୍ୱର୍ଣ୍ଣ ମହଲ’ର ସେହି  ନାଟକ ‘ଯେତେ ଦୁଃଖ ଦେବୁ ଦେ’ରେ କାଳିଆ’  ରିପିଟ୍‌ ହୋଇଛି । ତୁଳସୀ ତା’ର ସେହି ନାଟକ  ‘ଅଧା ରାତିର ସାଥୀ’ ଶେଷ ୨ଦିନ ରିପିଟ୍‌ କରି  ବିଦାୟ ନେବ । ‘ସ୍ୱପ୍ନ ମହଲ’ ବି ସେଇ ନାଟକ  ‘କେତେ କାନ୍ଦିବୁରେ ଗୌର ଦାସ’ ମଞ୍ଚସ୍ଥ  କରି ବିଦାୟ ନେବ ।

ଗୁରୁବାର ବିଦାୟ ରଜନୀ ହୋଇଥିବାରୁ ୬ଟି ପାର୍ଟିର କଳାକାରମାନଙ୍କର ପରସ୍ପରକୁ ଭେଟଘାଟ୍‌ ହୋଇଥିଲା । ନିଜ ନିଜ କ୍ୟାମ୍ପରୁ ବାହାରି ଅନୁଭୂତି ବାଣ୍ଟିବା ସହ ପୁଣି ଆର ବର୍ଷକୁ ଏହି ମଞ୍ଚରେ ଦେଖା ହେବାର ଆଶ୍ୱାସନା ଦେଇଥିଲେ । ପାର୍ଟି ବଦଳିଥିବ କି ନା ଜଣାନାହିଁ, କିନ୍ତୁ ଜାଗା ସେହି ଖଣ୍ଡଗିରି ନିଶ୍ଚୟ ବୋଲି କେତେକ କଳାକାର ହାସ୍ୟରସର ସହିତ କହୁଥିବା ଦେଖିବାକୁ ମିଳିଥିଲା ।