ନୂଆଦିଲ୍ଲୀ: ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ କୌଣସି ନା କୌଣସି ପ୍ରସଙ୍ଗକୁ ନେଇ ଚର୍ଚ୍ଚାରେ ରହିଥାନ୍ତି । କେତେବେଳେ କ୍ଷେପଣାସ୍ତ୍ର ପରୀକ୍ଷା ପାଇଁ ତ ଆଉ କେତେବେଳେ ତାଙ୍କର ନିଷ୍ଠୁର ଦଣ୍ଡକୁ ନେଇ । କିନ୍ତୁ ଆଜିକାଲି କିମ ଜୋଙ୍ଗ ଉନଙ୍କ ଝିଅମାନେ ବିଶ୍ୱରେ ଚର୍ଚ୍ଚାର ବିଷୟ ପାଲଟିଛନ୍ତି । କିଛି ଦିନ ପୂର୍ବରୁ କିମ ଜୋଙ୍ଗଙ୍କ ପ୍ରଥମ ଝିଅ କିମ ଜୋ ଏଇଙ୍କ ଫଟୋ ଭାଇରାଲ ହୋଇଥିଲା । ଏବେ କିମଙ୍କ ଦ୍ୱିତୀୟ ଝିଅର ଫଟୋ ସାମ୍ନାକୁ ଆସିଛି । ଭାଇରାଲ ହୋଇଥିବା ଏହି ଝିଅକୁ ଚୀନ୍ର ବିଶେଷଜ୍ଞମାନେ କିମଙ୍କ ଦ୍ୱିତୀୟ ଝିଅ ବୋଲି ବର୍ଣ୍ଣନା କରିଛନ୍ତି । ଉତ୍ତର କୋରିଆର ସରକାରୀ ଟିଭିରେ ଦେଖାଯାଇଥିବା ଫୁଟେଜରୁ ଝିଅର ଫଟୋ ହଟାଇ ଦିଆଯାଇଛି । ଏହି ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ବାସ୍ତବରେ, ଉତ୍ତର କୋରିଆରେ ସେପ୍ଟେମ୍ବର ମାସରେ ଜାତୀୟ ଦିବସ ଆୟୋଜିତ ହୋଇଥିଲା । ଏହି ସମାରୋହରେ କିମ ଜୋଙ୍ଗଙ୍କ ଦ୍ୱିତୀୟ ଝିଅ ଅନ୍ୟ ପିଲାମାନଙ୍କ ସହିତ ଏକ ଗୀତରେ ମଧ୍ୟ ଅଭିନୟ କରିଥିଲେ । ଏହି ସମୟରେ କିମ ଏବଂ ତାଙ୍କ ପତ୍ନୀ ରି ସୋଲ ଜୁ ମଧ୍ୟ ସେଠାରେ ଉପସ୍ଥିତ ଥିଲେ । ଉତ୍ତର କୋରିଆ ଉପରେ ନଜର ରଖୁଥିବା ବିଶେଷଜ୍ଞମାନେ କହିଛନ୍ତି ଯେ ପ୍ରଦର୍ଶନ କରୁଥିବା ଝିଅ କିମ ଜୋଙ୍ଗଙ୍କ ଦ୍ୱିତୀୟ ଝିଅ ହୋଇପାରେ । ସେମାନେ କହିଛନ୍ତି ଯେ ସେ କିମଙ୍କ ପରି ଦେଖାଯାଉଛନ୍ତି ଏବଂ ତାଙ୍କୁ ଲାଇଭ ଟେଲିକଷ୍ଟରେ ବିଶେଷ ପ୍ରଦର୍ଶନ କରାଯାଇଥିଲା ।
ତେବେ ଆଶ୍ଚର୍ଯ୍ୟର କଥା ହେଉଛି, ସେହି ଝିଅର ଅଭିନୟର ଭିଡିଓ ୧୯ ନଭେମ୍ବରରେ ଦ୍ବିତୀୟଥର ପାଇଁ ପ୍ରସାରିତ ହୋଇଥିଲା । କିଛି ଘଣ୍ଟା ପୂର୍ବରୁ କିମ ଜୋଙ୍ଗଙ୍କ ଝିଅକୁ ଦେଶର ଟିଭିରେ ଦେଖିବାକୁ ମିଳିଥିଲା । କିନ୍ତୁ କିଛି ଘଣ୍ଟା ପରେ, ଯେତେବେଳେ ଚ୍ୟାନେଲ ସେହି ସମାନ ପ୍ରୋଗ୍ରାମକୁ ପୁଣିଥରେ ଟେଲିକାଷ୍ଟ କଲା, ସେହି ଝିଅ ସ୍ଥାନରେ ଅନ୍ୟ କାହାର ଚେହେରାକୁ ଲଗାଯାଇଥିଲା । ଆଉ ଏହି ପରିବର୍ତ୍ତନ ସୂଚିତ କରୁଛି ଯେ ଉତ୍ତର କୋରିଆ ଏହି ଝିଅର ଫଟୋକୁ ନେଇ କେତେ ସମ୍ବେଦନଶୀଳ ।
ଏକ ୱେବସାଇଟ୍ ଅନୁଯାୟୀ, ହୁଏତ କିମ ଜୋଙ୍ଗ ଠିକ୍ ଅନୁଭବ କରିନଥାଇ ପାରନ୍ତି ଯେ ଦ୍ୱିତୀୟ ଝିଅର ଫଟୋ ଭାଇରାଲ ହେଉ । ଯଦିଓ ସେ ଏପର୍ଯ୍ୟନ୍ତ ଝିଅ ବିଷୟରେ କୌଣସି ଘୋଷଣା କରିନାହାଁନ୍ତି । କିଛି ଲୋକଙ୍କ ଅନୁସାରେ, ଉତ୍ତର କୋରିଆର ପ୍ରଶାସନ ସଙ୍କେତ ଦେଉଛି ଯେ ଏହି ଝିଅ କିମ ଜୋଙ୍ଗଙ୍କ ଝିଅ ନୁହେଁ । ସୂଚନାଥାଉକି, କିମ ଜୋଙ୍ଗଙ୍କ ଭଉଣୀ କିମ ୟୋ ଜୋଙ୍ଗ ମଧ୍ୟ ଏକ ଶିଶୁର ମାତା । ସେ ମଧ୍ୟ ଏହି କାର୍ଯ୍ୟକ୍ରମର ଏକ ଅଂଶ ଥିଲେ ।